8
U'ywe'sx Jesusa's pi'kxna u'jusa
1 Txãa e'su' Jesusa' maazkuẽe çxhabsuwa pekũjk Dxus jxkaahwa'j ena's pta'sxna txãa yakh u'jusawe'sx docesa yakh, çxhab le'çxkuẽsu walasuwa txã'wẽy.
2 Vxite' u'ywe'sxwa pi'kxna u'ju'tx na'wẽ eçxtxi kutxi'jna kĩh weete ãçã'satxwa nuykatxhik txã'wẽ yuuniisa, aça' txãa ksxavxyte teeçxsa' Maria Magdalena yaasesa txajx ũusuh siete eçxtxi kutxi'kh txãak yu'.
3 Vxite' Herodesa's pu'çxsa Çxusa nyu Juanak yaasesa yu', vxite' Susanak yaasesa yu'. Kuh u'ysatx Jesusa's pu'çxna u'jusa yu' txãawe'sx ji'phuni kĩjkwe yakhçxáawa.
Skuutxh uuhsa's kaaja'da'jni
(Mt 13.1-9; Mr 4.1-9)
4 Txajũ' çxhabuwe'sx wala nasa kasehtx, Jesusa's thegya'. Aça' nasa txaazkuẽe pkhaakhete', Jesusa' ejemplo yakhku pta'sx na'jĩna:
5 —Skuutxh uuhsa' uujxa' kasejk. Aça' msuuíi yu' maz nxinx dxi'jsu ãasu neeyũute', nasa waakhi'khi'jiçte, vxiçxakwewa fxiwçxa ũ'tx.
6 Aça' msuuíi yu', kwet-sutx ũsxi. Nawa buçxaçxawa kiwe ew ji'phmeete', tuphaameeçxa jxuka uhdxtxi.
7 Msuuíi yu', çhũçh ksxavxysutx ũsxi. Aça' çhũçhwa ja'da buçxaçxa' skuutxha's aphçxa ivxiitutx.
8 Sa' vxite ahsu' kiwe ewsatek ũsxi. Txãa yu' walaaçxa teeçx tasxçxáa cien nxinxtxi ji'phu.
Txajũ' Jesusa' suhsku na'jĩna we'we:
—Jiyuwa'jsa ũsçxa', jiyune'kwe jĩk.
9 Txajũ' txãa yakh u'jusawe'sxa' Jesusa's pẽjxtxi txãa ejemplo's ma'jĩnitewa jiyuya'.
10 Aça' Jesus pasçxa' na'jĩk:
—Dxus jxkaahni ensu ma'wẽ yũuwa'ja'swa kim yuhwa jiyunimeesa's i'kwe'sx yuutxi's ãate kaajiyu'ju'nja. Nawa vxite yuutxi' ejemplo yakhçxáath pta'sxi', kxah makwe uyçxawa, uysamée na'wẽçxáa neeyũutxna. Sa' pta'sxni's wẽsẽ'jçxawa, jiyumée neeyũutxna.
11 Naa ejemplo' na'wẽsa': Skuutxh fxiwa' Dxus yuwe jĩni'.
12 Aça' maz nxinx dxi'jsu ũsxisá', nasa Dxus yuwe's wẽsẽ'thewa eçxthẽ'ja' kutxi'jina wẽsẽ'jçxa yu'akhni's jĩni'. Txã'wẽ Dxus yuwe's ũusuh kutxi'the', txãawe'sx ũusa' vxituna.
13 Aça' maz nxinx kwet-su ũsxisá', nasa Dxus yuwe's jxpa'gaçxa maz en yu' weçxana wẽsẽ'jna fxi'zetxna. Nawa ũuste ew yu'akhmeeçxa', thẽysa nxusu en pa'theçxáa, Dxus tasxu ki' txuteetxna jĩni'.
14 Aça' maz nxinx çhũçh ksxavxysu ũsxisá', nasa wẽsẽ'jçxawa, naa kiwetewe'sx ji'phu wẽeniçxá's yajkxna pa'pçxuna ewmeesuçxáa weçxweçxa fxi'zesa jĩni'. Sa' Dxus yuwe's peçxkanatxna, aça' kxul íiçxáa yuuna.
15 Nawa nasa ũus ewsa Dxus yuwe's jxpa'yakx wẽsẽ'jçxa nwẽesẽ'jna Dxus yakhçxáa u'juçxa', kĩhsuwa ewçxáa yũuna fxi'zena, txã' maz nxinx yu' kiwe ewsate ũsxisáa na'wẽta'.
Ãate jiyuwa'j yu' neeyũuwa'jsamée
(Mr 4.21-25)
16 Lampara's atũu dxiite aphçxa txajxa' txã'wẽ ya'pki'taçme'. Wejxwa ẽetek ya'txaja' eena' kweethkahn, kxah maawa u'kasa' eena'te u'kakahn.
17 Makwe paaçte sũthnisaçxawa, kĩh yuhwa ãate vxyaamée yu' neeyũuwa'jme'. Sa' makwe ũusteçxáa yaakxnisa'swa, kim yuhwa ãate jiyunimée yu' neeyũuwa'jme'.
18 Txã'wẽyã'the', ew mwẽesẽ'jwe. Maawa wa'lmée wẽsẽ'the', jxthaakwe kaajiyu'juna Dxusa'. Nawa wẽsẽ'jya' wa'lsa's, kaajiyu'jnimée yuuna. Jxuka kusa'jni yuuna.
Jesus njĩ'j vxite' txajx nyakhwe'sx
(Mt 12.46-50; Mr 3.31-35)
19 Txajũ' Jesus ũsnite pa'jtx njĩ'j vxite' nyakhwe'sx. Nawa nasa wala ũste', Jesus tasxte utxaaya' ãjãmeeta'.
20 Aça' kxtee ũssa teeçxsa' Jesusa's pta'sxku na'jĩna:
—Iidx mama, iidx nyakhwe'sx, iidx npe'sxwe'sx idxa's thegya' pa'jçxa ekate ũsta', sa' idxa's peejxta' jĩte',
21 Jesus pasçxa':
—Dxus yuwe's wẽsẽ'jçxa' kxtey yuutxna txã'wẽ yuusaaçxáa, adx mama, adx nyakh, adx npe'sxwe'sx na'wẽsata' jĩk.
Marte wejxa wala's Jesus kxuuju'jni
(Mt 8.23-27; Mr 4.35-41)
22 Teeçx ente' Jesusa' txãa yakh u'jusawe'sx yakh barkote khẽeçxa':
—Vxite ahn ĩkh kuten u'jwega jĩçxa' u'jtx.
23 Nawa ĩkh pxãjũy u'jweçpkaçxha' Jesusa' dejk. Naapkaçxha' wejxaa wala seena' kiiteçxa, yu'a's barkote yuutaçku yu'. Aça' barko' ĩkh dxiikhẽ khẽeya'wak yu'.
24 Txajũ' Jesusa's fxĩtxtxi na'jĩna:
—Kwe'sxtxi jxpe'jsa mkiite, ĩkh dxiikhẽ khẽjẽçtha'w jĩte', Jesus kiiteçxa' wejxaa wala petx ĩkh yã'jçxa yujukaathe', jxuka yujuk, aça' kĩh yuhwamée ewçxáak neeyũu.
25 Txajũ' txãa yakh u'jusawe'sxtxi' na'jĩk:
—¿Mjĩiçxakwe Dxusa' pu'çxhina sũhna yajkxmée? jĩte', txãa yakh u'jusawe'sxa' ũukhçxa txãawe'sx pwe'sxçxáatx na'jĩna puutx we'we':
—Naa piçthẽ'ja' ¿kimki açki'tx wejxaa wala ĩkh txã'wẽsa yuhwa nwẽese'je'? jĩ'tx.
Gadara kiwetewe'sx eçx iiyamunisa
(Mt 8.28-34; Mr 5.1-20)
26 Txajũ' pejka Gadara kiwete pesahtx Galilea ĩkh kuteju.
27 Aça' Jesusa' txãa kiwete pa'jaçte', kxte' teeçx çxhabuwe'sx piçthẽ'j kasejk Jesus yakh puutx uyya'. Txãa piçthẽ'ja' wala txaçxyã'j eçx luuku vxitni u'ju'k. Sa' ropa athmée yattewa u'psameek yu', naasáa uusáa pedaní kwet kafxsuçxáak u'psa yu'.
28 Sa' Jesusa's uyçxa', tasxte peejxũkweçxa', na'jĩnak suhs we'we:
—Jesus, Dxus ĩtxisa Nçxi'k, adxa'sa' ¿kĩhga yũu wẽjẽ'? Adxa's nxuste ũswa'the akhkahmén pxthaath we'we' jĩk.
29 Jesusa' txãa eçx luuku vxit-sa's ũusu kaseh kajaçku yu', txãa pa'gak txã'wẽ we'we'. Txãa eçxa' ũuste khẽeçxa nasa's luuku vxitpa'gatx, kadenaju kuse petx çxida yã'jçxa tud wẽe. Nawa kĩh yuhnawa weji'meek çxuktede'. Txã'wẽ yuuçxak txãa eçx luuku vxit-sa' nasa u'pnimeesu jxũna u'jwe' txãa piçthẽ'ja's.
30 Txajũ' Jesusa' txãa eçxa's pẽjxku:
—¿Kĩh yaasega? jĩte':
—Legion yaaseth jĩnak pas.
Txãa piçthẽ'j ũuste wala kuh eçx khẽeçxa ũsu'tx, txãasak legion yaaseth jĩna pas.
31 Sa' txãa eçx luuku vxit-sa' Jesusa's pxthaa we'wetx kafx wala seena' ũukhũukhsakhẽ akhkahmén.
32 Sa' kxsũ thã'jsũ kuçxi wala ũsu'tx aphna, aça' txãa kuçxi ũussu khẽeya' u'jwa'ja'stxi Jesusa's pẽjx pxthaa we'wena. Aça' Jesusa' kuçxi ũussu khẽeya' u'khaakh.
33 Txajũ' txãa eçx luuku vxit-sa txãa piçthẽ'j ũusu kasehçxa, kuçxi ũussu khẽete', txãa kuçxi' penxakhẽ peluçxa, ĩkh walakhẽ khẽeçxa jxuka uutx.
34 Aça' kuçxi thegsa' txã'wẽ yũute uyçxa', ũukhçxa pta'sxya' wala dud u'jtx çxhabna vxite' çxhab peeku'jsuwa jxuka.
35 Aça' kĩh yũutewa uyya' nasa' thegya' pa'jtx. Sa' Jesus ũsnite kũhçxa', uytxi eçx luuku vxit-sa' txãa piçthẽ'j ũusu jxuka kasehte', Jesus tasxte wẽt yã'j ropa athçxa kaçxçxa u'pte. Sa' wala ũukhtxi.
36 Aça' txãa piçthẽ'j eçx luuku vxitnisa' ma'wẽ yũuçxa katxhitewa uysa' kxtee thegya' pa'jsatx pta'sxtxi.
37 Txãa pa'gaçxáa Gadara kiwesuwe'sx jxukaysa ũukhçxa Jesusa's txãa kiweju kasehna u'khaahtx. Txã'jĩyã'the', Jesusa' barkote khẽeçxa ki' sxawedku.
38 Aça' txãa piçthẽ'j luuku vxitnijũ katxhisa' Jesusa's pxthaa we'wek pe'jçxa u'khan. Nawa Jesusa' txajx yatnak u'khaah na'jĩna:
39 —Iidx yatna sxawedna me'j, sa' mtuuthe'j idxa's Dxus na'wẽ ew yũuni's jĩte', txãa piçthẽ'j u'jçxa', çxhabsu jxuka pta'sxku Jesus ma'wẽ ew yũuni'swa jxuka.
Jairo niisa vxite' Jesus atxhte jxa'dxsa
(Mt 9.18-26; Mr 5.21-43)
40 Txajũ' Jesusa' Galilea kiwetey ki' sxawedna pesathe', nasa ũythãsna ũssa' wala weçxana jxpa'gatx.
41 Kxte' teeçx piçthẽ'j judiuwe'sx pkhaakhenite npiiçthẽ'jsa Jairo yaasesak pa'j. Sa' txãa piçthẽ'ja' Jesus tasxte peejxũkweçxa', pxthaa we'wek txajx yatna yuukahn.
42 Kxtee yu' txajx niisa teeçxçxáasa doce anxu ji'phsa ãçã'çxa uuwa'theçxáa yã'kh ũs yu' naa pa'ga. Aça' Jesusa' u'jweçte', txãa yakh u'jsa nasa wala kuh dxi'the utaçxáatx u'jna ũsu'.
43 Txãa nasa kuh ksxavxyte teeçx u'y doce anxu yã'j kakwe yu' vxyaate ãçã'sak kaseh. Sa' txãa u'ya' txajx vxyu's jxuka pebak yu'çe'jsatx dewena, nanwa maa yuhwa nuykatxhiya' ãjãmeeta'.
44 Aça' txãa u'ya' Jesus e'ste utxaaçxa, atxh vxiçkhẽ kpaajxa'dxku, naapkaçxha' txãa dudtey kakwe yu'a' yujuk.
45 Txajũ' Jesusa' paapẽjxku:
—¿Kimga adxa's jxa'dx? jĩna.
Aça' jxukaysa: Maa yuhwa jxa'dxmeetha'w jĩte', Pedro vxite' txãa yakh u'jusa' na'jĩtx:
—Nasaa ksxavxyte zuuna'çxáa u'jna ũsgu sayuja' ¿ma'wẽga kimga jxa'dx jĩna pẽyí'? jĩte',
46 Jesus pasçxa':
—Teeçxsa adxa's jxa'dxyujk, txã'wẽ adxa's jxa'dxpa'gaçxáa ãçã'çxawa katxhiçxak neeyũu adx pu'çxte jĩk.
47 Aça' txãa u'y ma'wẽ yũuni'swa Jesusa' jiyute', txajx tasxte ũukhna yayana kũhçxa peejxũkwek. Sa' nasaa dxi'pte jxuka pta'sxku ãçã'çxa Jesus atxhte jxa'dxçxa' txãa dudtey katxhiçxa neeyũuni's.
48 Txajũ' Jesus we'weçxa':
—Katxhi'nja sũhçxane'kwe adx tasxte txã'wẽ yũuya' yuwé' txãa pa'ga ãçxha' katxhi'kwe neeyũu na' weçxana me'jwe jĩk.
49 Kxtee nee Jesus we'wena ũsíyna, judiuwe'sx pkhaakhenite npiiçthẽ'jsa Jairo yatu yuusa teeçx pa'jçxa', Jairo's pta'sxku:
—Iidx niisa' uuyã'kh, aça' Jesusa's kuçx pe'jna yuunu jĩte',
50 Jesus wẽsẽ'jçxa':
—Nxusnu, adxçxá's myajkx aççxáa iidx niisa' katxhina jĩk.
51 Txajũ' Jairo yatte pa'jçxa', vxite yuutxi' ka'ga'jmée, naasáa Pedro, Jakobo, Juan, vxite' kna'sa neywe'sxtxiçxáak ka'ga'j.
52 Kxte' nxus we'wena ũ'nenatx ũsu'. Nawa Jesus we'weçxa':
—Ũ'nenuwe, txãa kna'sa' uunime', naasáa deeniçxá' jĩte',
53 kxtee ũssa' npeevxysxijkatx, uuníi ũste txã'jĩpa'ga.
54 Txajũ' Jesusa' uuniisa's kuseju pu'kisna' suhsku we'we:
—Kna'sa, mkiiteçx jĩna.
55 Naapkaçxha', dudtey ĩtxĩ yuuçxa kiitek, aça' Jesusa' puuçkaakh.
56 Aça' neywe'sxa' wala kuh yajkxna weçxana thegtxi. Nawa Jesusa' maa yuhtxwa pta'sxkaahme' txã'wẽ uuniitewa ĩtxĩ vxitni's.