11
Jesus Jerusalente u'kani
(Mt 21.1-11; Lk 19.28-40; Jn 12.12-19)
1 Txajũ' Jesusa' Jerusalenna u'jweççxa', e'z çxhabkuẽ Betania Betfxagé utxatek pa'j. Txãa çxhaba' Oliwos vxiç dxi'pgatx neeyũ'. Aça' kxtee pa'jçxa' txãa yakh u'jusawe'sx e'zsatx yaçte kaakh na'jĩna:
2 —Çxhab le'çxkuẽ vxya'k kxtee me'jwe. Sa' kxtee pa'jçxa', teeçx buçxu kim yuhwa a'jnimeesa tudni ũsna txã'sna jxũkhwedeçxa jxũna yuweene'kwe.
3 Txã'wẽ yũuçte kim pẽyiwáatxna aça' kwe'sxtxi jxpe'jsak nikxya' kaah nawa ki' kaasxwedu'juna jĩne'kwe.
4 Txã'jĩte', txãawe'sxa' u'jçxa buçxu's uytxi vxitx pukate dxi'j ju'gu tudni ũste. Aça' jxũna u'jya' jxũkhwedeçtxi yu'.
5 Naapkaçxha' kxtee thegna ũssa' we'wetx:
—Buçxu's ¿kĩh yũuya' jxũkhwedeçkwe? jĩna.
6 Txajũ' Jesus ma'wẽne' kwe'we'j txã'wẽy txãawe'sxa' pasteçxáa jxũna kaahtx.
7 Txajũ' txãa buçxu's Jesus tasxte nuykũhçxa', txãawe'sx atxhtxi tpegu'gçxa pustxi, aça' Jesusa' a'jçxa u'kh.
8 Naapkaçxha' vxite yu' Jesus u'jwa'j dxi'jsu yaçtetx txãawe'sx atxhtxi pusna u'jwe', aça' vxite' ẽjxã spẽ'thçxatx txã'wẽy dxi'jsu pusna u'jwe' yaçsu.
9 Naapkaçxha' yaçte u'jsa vxite' e'ste yuusa txãawe'sxa' na'jĩnatx weyna u'jwe':
—Dxus kaahnisa wala yuh jxtuhthesa yuja'.
10 Wala yuh ew jxkaajana, kwe'sx yaçgawe'sx Davxid na'wẽy. Dxusa's weçxaaga wala ew yũupa'ga jĩ'tx.
11 Jesusa' txã'wẽk Jerusalente u'ka dxuus yatte pa'j. Sa' dxuus yatte kĩh ũstewa jxuka thegçxaçxáa ki' kasehna u'kh Betania çxhabnay doce txãa yakh u'jusawe'sx yakh, kusuçyã'kh yu' naa pa'ga.
Higwera fxtũu tasx yũnsame's Jesus açewe'weni
(Mt 21.18-19)
12 Txajũ' kuskuskhẽ' Jesusa' Betania çxhabu ki' kasehçxa' wẽek.
13 Sa' higwera-tasx wala yehçsa ũste uyçxa', thegya' u'kh yũn ji'phwáana sũhçxa. Nawa yũnmée eççxáak ji'ph yu', yũn en meek yu' naa pa'ga.
14 Txajũ' Jesusa' na'jĩnak we'we txãa fxtũu tasxa's:
—Naa fxtũu tasxte yũnni's kim yuhwa ũ'meetxna peena yu' jĩna we'weçte', txãa yakh u'jusawe'sxa' wẽsẽ'jnatx ũsu'.
Dxuus yatte txweysaatx Jesus kasxisxni
(Mt 21.12-17; Lk 19.45-48; Jn 2.13-22)
15 Txajũ' Jesusa' Jerusalen çxhabte ki' sxawedna pa'jçxa', dxuus yatte u'kaçxa kxtee kĩjkĩhwa txweyna ki' weyna ũssatx eka kasxisxku, vxyu yu'pthehsa mesa vxite' tub çxihme txweysa kaçxni pagutx jxuka pũsxna.
16 Sa' kxtee kĩjkĩhwa tu'sçxa pa'jsatx kaakũju'jme'.
17 Txajũ' na'jĩnak yu'kxpeh:
—Dxus librute' na'wẽ fxi'jni ũsa': Adx yata' Dxus yakh puutx we'wena ũswa'j yatçxá' nasa majũwe'sxwa jĩ'k. Nawa i'kwe'sxa' peswée pkhaakhena ũsni kafx na'wẽçxáa vxitçxa ji'phi'kwe jĩte',
18 Dxus leya's kaapiya'jsawe'sx vxite' sacerdote npiiçthẽ'jwe'sx wẽsẽ'jçxa', ma'wẽçxáawa yũuçxa ikhya' ãjãwa'ja's pakwetx. Nawa isa ikhya' yu' ũukhtxi, nasa thaakwe kuhsa yu' Jesus kaapiya'jni's nwẽesẽ'jsaçxaçxáa ũspa'ga.
19 Txajũ' jxuka çxhi'dxiçte', Jesusa' txãa çxhabuh kasehna u'kh.
Higwera fxtũu tasx udxni
(Mt 21.20-22)
20 Kuskuskhẽ kusíi kxuy jxkhẽuuççxa', higwera fxtũu tasxa' weçete pa'j udxni ũstetx uy.
21 Aça' Pedro' Jesus we'weni's yajkxçxa na'jĩk:
—Mtheg naa higwera fxtũu tasxa's jũ'na we'weçxa': naa fxtũu tasxte yũnni's kim yuhwa ũ'meetxna peena yu' jĩnag we'we txãa fxtũu tasxa' jxuka uhdxga jĩte',
22 Jesusa' na'wẽk pas:
—I'kwe'sxa' kĩh pẽyiççxawa, kuh jwed yajkxmée Dxusa' kxtey yuuna sũhnaçxáa mpẽjxwe.
23 Adxa' isath we'we': maawa Dxusa's txã'wẽ ũusuh jxuka yajkxna, naa vxiç wala ayjxu u'jçxa ĩkh walate me'j khẽeya' jĩtxna aça' kxtey yuuna.
24 Kxtey yuuwa'ja's adxa' jiiçxath txã'wẽ i'kwe'sxtxi' Dxus yakh puutx we'wekaja' pẽyni's jxpa'gayã'tha'w sũhna.
25 Sa' Dxus yakh puutx we'wena ũsíi yaakiwá'kwe vxitesa yakh ãhmée yũuni's. Sa' txã'wẽ yajkxçxa', txãa yakh peltunãyya' u'jwene'kwe, kxah i'kwe'sx Tata cielutewe'sxwa i'kwe'sx pkaltxi peltunaĩna.
26 Nawa i'kwe'sx txã'wẽ vxitesa yakh ãhmée yũuni's peltunaĩmeete', i'kwe'sx Tata cielutewe'sxwa i'kwe'sx pkaltxi' peltunaĩmeena jĩk.
Dxuus yatte Jesus juuna' yũuni's pẽyni
(Mt 21.23-27; Lk 20.1-8)
27 Txajũ' Jerusalente sxawedna pa'jçxa, dxuus yat-su u'jute', sacerdote npiiçthẽ'jwe'sx vxite' Dxus leya's kaapiya'jsawe'sx vxite' judiu nthẽ'jsawe'sx Jesus tasxte utxaaçxa',
28 na'jĩnatx pẽjx:
—Idxa' ¿kimga saga dxuus yatte txã'wẽ juuna' yũu? ¿Kimga txã'wẽ yũuya' jxkaah? jĩte',
29 Jesus pasçxa':
—Adxwa i'kwe'sxtxi' pẽjx ya'wath aça' adx pẽyni's pasune'kwe. Txã'wẽ yũ' adxwa pta'sxi'nja kim jxkaathe txã'wẽ yũuçxawa.
30 Sa' pẽjxku na'jĩna:
—Juan Bautista's ¿kimga jxkaah bautisãyya'? ¿Dxusá', meeçxa' naa kiwega piçthẽ'já'? Mpaaswe jĩnak pẽjx.
31 Txajũ' txãawe'sx pwe'sx na'jĩnatx puutx we'we':
—Dxusne' jxkaah jĩ'nja'w aça' txã'wẽte' ¿mjĩya'kwe Juan pta'sxni's jxpa'gamée? jĩna pasuna.
32 Meeçxa' naa kiwetewe'sxne'ta jxkaah jĩwaçwa, kxul yuhna, nasa jxukaysa Juana's we'weçxa': Dxus jxkaahnisa' jĩ'tx.
33 Txã'jĩna ũukh we'weçxaçxáa:
—Kwe'sxa' jiimeetha'w jĩnaçxáatx Jesusa's pas.
Aça' Jesusa' na'jĩk:
—Adxwa pta'sxme'nja kim jxkaathe txã'wẽ yũuçxawa jĩk.