14
Jesusa's ikhwa'ja's puutx we'weni
(Mt 26.1-5; Lk 22.1-2; Jn 11.45-53)
1 Paskua's ũ'ni vxite' pan lewadura ji'phmée ũ'ni fxiesta txãa e'z fxiesta ãjxa' e'z ençxáak peejx yu'. Txãa ente Dxus leya's kaapiya'jsawe'sx vxite' sacerdote npiiçthẽ'jwe'sxa' puutx we'wetx ma'wẽ yũuçxa kimwa jiyunimeete Jesusa's kiikhe'jya' ãjãwa'ja's.
2 —Nawa fxiesta entemée kiikhe'je'nja'w. Txã'wẽme', nasa wala susutxna jĩnatx puutx we'we.
Wẽt putasá pa'gasa's teeçx u'y Jesus dxikthekhẽ awni
(Mt 26.6-13; Jn 12.1-8)
3 Naapkaçxha' Jesusa' Betaniate Simon wã'jy weeju katxhisa yattek u'p yu'. Aça' kxtee u'pte', teeçx u'y wẽt putasá kĩh yuhwa ka'dnimeesa wala pa'gasa's atçxak kũh. Sa' fxrasko's uhdçxa Jesus dxikthekhẽk aw.
4 Aça' kxtee ũssa' maaíi yu' ũusaçxatx txãawe'sx pwe'sx na'jĩna:
—¿Kĩh yũupa'gaçxáaga naa wẽt putasá txakwe pa'gasa's kxul psuwú'?
5 Wejx yuuwa trescientos pesote txweyçxa puupletx pu'çxya' ewne' yu' jĩnatx txãa u'ya's ahçena wẽesxũu.
6 Aça' Jesusa' na'jĩnak we'we:
—¿Kĩjxa'kwe wẽesxú'? Kuçx yuunuwe. Na'wẽ yũuk txã' kxul vxituni yuume'.
7 Puupletx peeswaç ewne' yu' jĩ'i'kwe na' puuplesatxi' bagaçxtewa peesya' ãjãne'kwe, i'kwe'sx yakh nes yuutxna naa pa'ga. Nawa adxa' i'kwe'sx yakh nes yuuya'wameeth.
8 Adx uute adx kakwete sxũsxwa'ja's ma'wẽçxáawa yũuk adx uumeyna.
9 Isath we'we', naa kiwete mtee mteewa Dxus yuwe's pta'sxna pekũhsa', naa u'y txã'wẽ yũuni'swa ja'da pta'sxni yuuna peçxkanamée jĩk.
Jesusa's preesu'jwa'ja's Judas dukhya' neeyũuni
(Mt 26.14-16; Lk 22.3-6)
10 Txajũ' txãa yakh u'jusa teeçxsa Judas Iskariote' sacerdote npiiçthẽ'jwe'sx kusete Jesusa's dukhya' puutx we'weya' u'kh.
11 Aça' txãawe'sxa' wala weçxana vxyu dukhya' neeyũutx. Txajũ' Judasa' ¿ma'wẽ yũuçxa Jesusa's açesawe'sx kusete dukheki'th? sũhna wala yajkxku.
Jesusa' docesawe'sx yakh nmeh ũ'ni
(Mt 26.17-29; Lk 22.7-23; Jn 13.21-30; 1 Ko 11.23-26)
12 Pan lewadura ji'phmée ũ'ni fxiesta en ãjãçte', Paskua'jwa'j piisxaatx ikhe' txãa ente' txãa yakh u'jusawe'sxa' Jesusa's pẽjxtxi:
—¿Paskuatewe'sxa's ũ'ya' mtee pheu'jya' kaajxa'waga? jĩte',
13 txãa yakh u'jusawe'sx e'zsatx na'wẽk jxkaah:
—Me'jwe Jerusalenna. Sa' kxtee teeçx piçthẽ'j uyuune'kwe yu' mitxha's yakhçxa u'jweçte. Sa' e'stey u'jwene'kwe,
14 aça' txãa mtee u'kate', i'kwe'sxwa kxtee u'kaçxa yat namu's pẽyine'kwe: ¿Mtee piesa ũsuki'g Paskuatewe'sxa's pheu'jçxa adx yakh u'jusawe'sx yakh ũ'wa'ja's? jĩnak kwe'sxtxi jxpe'jsa' yuwe kaah jĩne'kwe.
15 Aça' txã' pta'sxina ẽe yatte teeçx piesa walasa pheu'jniyã'jsa. Kxtee Paskuate ũ'wa'ja's pheu'june'kwe.
16 Txã'wẽ jxkaathe', txãawe'sxa' çxhabna u'jçxa' Jesus ma'wẽ jxkaahni's jxuka kxtey uyçxa', Paskuate ũ'wa'ja's pheu'jtx.
17 Jxuka çxhi'dxiçte', Jesuswa kxtee pa'kh txãa yakh u'jusawe'sx yakh.
18 Sa' mesate ũ'na u'pçxa', na'jĩk:
—Isath we'we', ayte adx yakh ũ'na u'psa teeçxsa' adxa's açesawe'sx kusete dukhya'wa' jĩte',
19 jxukaysa nxus we'wena puutx ya'paapẽyĩ'tx:
—Meeçxa' ¿adx wáa txã'wẽ açesawe'sx kusete dukhwa'jsane'tka? jĩnatx jxukaysa txã'wẽçxaçxáa we'we'.
20 Aça' Jesusa' pta'sxku:
—Adx yakh u'jusa teeçxsa' maa txã'wẽ adx yakh ja'daçxah kuse's plaatukhẽ akhena txãa adxa's açesawe'sx kusete dukhwa'jsa'.
21 Dxus Nçxi'k Nasa Yuusa' ma'wẽ uuwa'jsatewa Dxus librute pta'sxi'k txã'sa' kxtey yuuyujuna. Nawa adxa's açesawe'sx kusete dukhsa' seena' yuh nxuste khẽjena. Txãa piçthẽ'ja' wejx yuuwa naa kiwete kasehmeewaçne' wejx ew yu' jĩnak we'we.
22 Nee ũ'na u'píi, Jesusa' pana's jxpa'gaçxa Dxusna weçxana'wa pe'ltedeçxa ũsu'sku na'jĩna:
—Mẽ'we, naa pana' adx kakwe na'wẽsa' jĩçxa',
23 waso'swa jxpa'gaçxa Dxusna weçxana'wa jxukaysatx tudxkaathe', jxukaysa tudtxi txãa wasotewe'sxa's.
24 Aça' Jesusa' na'wẽk we'we:
—Naa wasotewe'sxa' adx ee na'wẽsa', maazkuẽesatewa ãh uwuwa'jsa'. Dxusa' txã'wẽk adx eea's pkawçxa yuuçxáa i'kwe'sxtxi nwe'wewa'ja's nvxiht u'se pheu'jçxa.
25 Isath we'we': Ãçxhũyã'ja' peena yu' tudxme'nja naa uwa yu'a's, naasáa Dxus jxkaahwa'j ente yuuçxáa ki' tudxi'nja.
Pedro ĩsxiiwa'ja's Jesus pta'sxni
(Mt 26.30-35; Lk 22.31-34; Jn 13.36-38)
26 Txajũ' Dxusna weçxana memçxa', Oliwos vxiçna u'jtx.
27 Kxtee pa'jçxa', Jesusa' na'wẽk pta'sx:
—Dxus librute we'weçxa': piisxáa-thegsa's ikhte', piisxá' jxuka ũphuutxna jĩ'k txãa pa'ga naa kuste' i'kwe'sxa' adx tasxu jxuka ũphuune'kwe.
28 Txã'wẽ yuutewa, adxa' ki' ĩtxĩ yuuçxa i'kwe'sx yaçte u'jwe'nja Galilean jĩte',
29 Pedro pasçxa':
—Vxite yu' makwe ũukhçxa ũphtewa, adx yu' txã'wẽ yũume'nja jĩk.
30 Aça' Jesusa' na'wẽk pta'sx:
—Idxa's isath we'we', naa kuste atalx e'z us we'wemeyna, tekh us ĩsxĩijaç yuune'ga adxa's jiimeeth jĩna.
31 Txã'jĩtewa, Pedro' jweeíiçxáak çxhãçxha we'we':
—Makwe idx yakh ih uune'jçxawa, idxa's jiimeeth jĩna yu' ĩsxĩime'nja jĩte', jxukaysa txã'wẽçxaçxáatx we'we.
Jesusa' Geçemanite Dxus yakh puutx we'weni
(Mt 26.36-46; Lk 22.39-46)
32 Txajũ' teeçx ahte pa'jtx, Geçemaní yaasesate. Sa' Jesusa' txãa yakh u'jusawe'sxtxi:
—Ayte me'pwe, naapkaçxha' adxa' Dxus yakh puutx we'weya' u'jweçthu jĩçxa',
33 Pedro, Jakobo, Juan txãawe'sxçxáatx pe'jçxa u'kh. Txajũ' Jesusa' wala nxus yajkxçxa',
34 na'jĩnak pta'sx:
—Txakwe wala pxthaa yuuçxa uuwa'ja's yajkxte', wala nxus yuja'. Aça' i'kwe'sxa' ayte dehmée me'pwe jĩçxa',
35 jxu'jmeekuẽ u'jçxa kiwega pkipha weteçxa Dxusna pẽjxku txã'wẽ seena' yuuçxa uuwa'ja's yu'pthejkahn na'jĩna:
36 Tata, idx yakha' kĩh yuhwa thẽysa yu' meea'. Aça' txã'wẽ seena' nxuste uuwa'jũ meen nwe'we. Nawa adx jxthãasni's kxtey yuumeeçxawa, iidx jxthãasniçxá's kxtey meen yũu jĩk.
37 Txajũ' Jesusa' txãa tekhsatx thegya' kũhçxa', dehna ũstek uy. Sa' Pedro's we'wek:
—Dehmée u'pkaathe', ¿teeçx oraçxáawa ĩtxĩ u'pmée dehwá'ga?
38 Ewmeete weteya'mée, Dxus yakh puutx we'wena me'pwe dehmée. I'kwe'sxa' ũusuh yu' çxhãçxhai'kwe yaaki', nawa kakwe yu' çxhãçxhaçme' kxtey yuuya'.
39 Txajũ' ki'kin Jesusa' u'jçxa', txã'wẽyçxáak we'wena Dxus yakh puutx we'we'.
40 Sa' thegya' ki' sxawedçxa', txã'wẽy deeni ũstek uyna kũh, txãawe'sx yafxa' dee wẽeçxa çxhãçxhaçmeene'ta naa pa'ga. Txã'wẽ Jesus uyna kũhte, ma'wẽ pasya' yuhwa ãjã'çmeeta'.
41 Txajũ' tekh uswa txãawe'sxtxi thegna kũhçxa', Jesusa' na'jĩk:
—Ãçxh yuuçxá' jxkaaseya' mdejxujíiwe. Nawa ãçxha' pejka en ãjk, Dxus Nçxi'k Nasa Yuusa's ewmeesawe'sx kusete dukhwa'j.
42 Txã'wẽyã'ja' aça' kiiteçxa mejkawe. Adxa's açesawe'sx kusete dukhwa'jsa' yujxã'ja' jĩk.
Jesusa's preesu'jni
(Mt 26.47-56; Lk 22.47-53; Jn 18.2-11)
43 Kxtee we'wena nee ũsiyna, Judasa' kũjk. Txãa yu' Jesus yakh u'jusa docesatewe'sxíiçxáak yu', aça' txãa Judas yakh nasa wala kũhtx kçxilx fxtũ txã'wẽ atçxa. Txãawe'sx yu' Dxus leya's kaapiya'jsawe'sx vxite' sacerdote npiiçthẽ'jwe'sx vxite' judiu nthẽ'jsawe'sx jxkaahnitx yu'.
44 Judasa' Jesusna uwewa'jsatx na'wẽku'ga yu'kxwe'weçxa pe'jna yuwé': Ma'sna dxi'pte weçxa'nja txã'sna i'kwe'sxa' tudçxa jxũna u'jwene'kwe jĩnaga yu'kxwe'we.
45 Txajũ' Jesus tasxte utxaana kũhçxa':
—Kwe'sxtxi jxpe'jsa jĩçxa weçxak.
46 Naapkaçxha' nasa' Jesusa's tudtxi jxũna u'jya'.
47 Txã'wẽ Jesusa's tuduçte', Jesus yakh u'jusa teeçxsa' kçxilxa's jxkuutxi'jçxa sacerdote npiiçthẽ'jna selpisáa thũ'wẽ's spẽ'thku.
48-49 Txajũ' Jesusa' nasatxi' na'jĩk:
—Adxa' een isath dxuus yatte kaapiya'jna ũsu' i'kwe'sx ksxavxyte. Nawa txagaçxhíi yu' tudmeeçxa', ãçxh yu' peswéethasi'kwe kçxilx petx fxtũ atçxa pa'j, tudçxa jxũna u'jya'. Nawa Dxus librute fxi'jni ũsa' txãa kxtey yuukahn txã'wẽ yuuça' jĩnak we'we.
50 Txajũ' Jesus yakh u'jusawe'sxa' txã'sçxáana nvxihtçxa jxuka ũphna u'jtx.
Teeçx piçtakx iyuna u'jni
51 Naapkaçxha' teeçx piçtakx dee pa'çxni yakhçxáak Jesus e'stey u'jweç yu', aça' txã'snawa tuduçtxi yu'.
52 Nawa dee pa'çxni's nvxihtçxa, iyuna u'kh sũpxçxáa.
Judiu nthẽ'jsawe'sx tasxte Jesusa's kuutxa'jni
(Mt 26.57-68; Lk 22.54-55, 63-71; Jn 18.12-14, 19-24)
53 Txajũ' Jesusa's sacerdote npiiçthẽ'j tasxte nuypa'jtx. Aça' kxte' sacerdotewe'sx, judiu nthẽ'jsawe'sx Dxus leya's kaapiya'jsawe'sx jxukay pkhaakhetx.
54 Aça' Pedro' Jesus e'ste jxu'kh neeyũuna u'jna ũsu', sacerdote npiiçthẽ'j yat patxute pa'phkaçx. Sa' patxute neeyũuk policiawe'sx yakh ipx bajçxna.
55 Naapkaçxha' sacerdotewe'sx vxite' judiu nthẽ'jsawe'sx jxukay pkhaakheçxa, Jesus ewmée yũuni's pakwetx, ewmée yũuni's kpajkxçxa kiikhe'jya' sũhçxa. Nawa uymeeta'.
56 Txã'wẽ uymeetewa maaíi yu': Jesusa' yuuwesa yuja' jĩna yuwe ũsu'tx. Nawa txãawe'sx pta'sxni' isamée fxiyfxiyçxáak kaseje'.
57 Txã'wẽtewa maaíi yu' na'wẽtx we'weya' yajkx:
58 —Jesus we'weçxa': Naa dxuus yat nasaa txaahni's pẽtxçxa, tekh ente' ki' vxite txaja'nja nasa vxitnimeesa jĩna we'weni's kwe'sxa' iiwẽsẽ'tha'w jĩnatx pãatxhĩ'khe'.
59 Makwe txã'wẽ we'wetewa, txãawa isamée íiçxáak kaseje'.
60 Txajũ' sacerdote npiiçthẽ'ja' kiiteçxa', Jesusa's na'wẽk we'we:
—Na'wẽtx pãatxhĩ'khe' ¿txã'sa' ma'wẽçxáawa pasya'wameegá'? Meeçxa' ¿isa yuh txã'jĩwá'nta? jĩtewa,
61 Jesusa' teeçx yuweçxáa yuhwa pasme'. Aça' sacerdote npiiçthẽ'ja' ki'kin pẽjxku:
—¿Idxa' Kristo, Dxus Nçxi'k dxihgá'? jĩte',
62 Jesus pasçxa':
—Txã'wẽíith. Aça' i'kwe'sxa' uyuune'kwe Dxus Nçxi'k Nasa Yuusa' Dxus pukate kaçxçxa u'pte. Sa' cieluju tãaphte kĩjaçtewa uyuune'kwe jĩk.
63 Txajũ' sacerdote npiiçthẽ'ja' peekx athni ropa's ũusçxa sudeçxa na'wẽk we'we:
—¿Kĩjxa'çxáa testigo jwee pejiikxtha'w?
64 I'kwe'sx wẽsẽ'jna ũste na'wẽk Dxusa's açewe'we. Aça' i'kwe'sxa' ¿maa sũjũ'kwe? jĩte', jxukaysa pasçxa':
—Txã'sa' ikhteçxáa ewna jĩtx.
65 Txajũ' vxite yu' dxi'pte fxne'sx avxythethna dxi'pa's aphçxatx uka'kana na'jĩ':
—Mjiyu wakx ¿kimga idxa's uka'ka'? jĩnatx npeevxysxika'. Aça' policiawe'sxwa txã'wẽytxi dxi'pte uka'ka'.
Jesusa's jiimeeth jĩna Pedro we'weni
(Mt 26.69-75; Lk 22.56-62; Jn 18.15-18, 25-29)
66 Pedro' patxute ũste', teeçx u'y sacerdote npiiçthẽ'ja's selpisáa kũhçxa',
67 Pedro's uyku txã'wẽ ipx bajçxna u'pte. Sa' dxi'pte ew thegçxa, na'jĩnak we'we:
—Idxwa Nasarethuwe'sx Jesus yakh u'jusag jĩte',
68 Pedro' ĩsxĩik:
—Adxa' txã'sa' jiimeeth kimnane'kwe we'we na'swa jĩçxa', kasehna u'jçxa ekajuk ũsu'. Naapkaçxha' atalx we'wek.
69 Aça' txãa u'ya' Pedro's ki' uyçxa' kxtee ũssatxi' na'jĩnak pta'sx:
—Naa piçthẽ'ja' pejka Jesus yakh yuh u'jusa' jĩnak we'we.
70 Nawa Pedro yu' ki'kin ĩsxĩik. Aça' txãa e'su' kxtee ũssawa Pedro's na'jĩnatx we'we:
—Isa, idxa' txãa yakh yuh u'jusag. Galileajuwe'sxçxa íig txãjũ nasa na'wẽ we'we' jĩte',
71 Pedro' ũusçxa we'wena jurãyku:
—Isa Dxus uyte, i'kwe'sx kxsuusu'i'kwe txãa piçthẽ'ja's jiimeeth jĩçpkaçxha',
72 atalxa' e'z us we'wek. Txajũ' Pedro' Jesus we'weni's yajkxku: Atalx e'z us we'wemeyna, idxa' tekh us ĩsxĩijaç yã'j yuune'ga adxa's jiimeeth jĩni's. Aça' Jesus we'weni kxtey yuute', Pedro' wala ũ'nek.