9
1 Txajũ' ki'kin we'weçxa' na'jĩk Jesusa':
—Isath we'we', ayte ũssa maaíi yu' uumey uyuune'kwe Dxus naa kiwete jxkaajxa' kĩini's jĩk.
Jesusa' zhiçxkwe yu'pthehçxa vxyaani
(Mt 17.1-13; Lk 9.28-36)
2 Txajũ' seis en skhẽwniite', Jesusa' thã'j walate pe'jna u'kh Pedro Jakobo Juan txãawe'sx tekhsaçxáatx. Kxtee pa'the', Jesus kakwe' fxiyku zhiçxkwe yu'ptheh txãawe'sx yafxte.
3 Txajx athni ropa' yãdx na'wẽk zhiçxkwe çxihme yuu; naa kiwete maa yuhwa txã'wẽ zhiçxkwe çxihme yu' thethya' ãjãmeetxna.
4 Naapkaçxha' Pedrowe'sx yafxte vxyaatx Elias vxite' Moises. Txãawe'sxa' Jesus yakhtxi puutx we'wena ũsu'.
5 Aça' Pedro' txã'wẽ uyçxa', Jesusa's na'jĩk:
—Ayte' kwe'sx ũswa'j wala ewa'. Aça' tekh wa' txajaga, teeçxsa' iidx jĩi, vxite' Moises jĩi, vxite' Elias jĩi jĩk.
6 Pedrowe'sxa' weçxaniite ũukhsa na'wẽtx neeyũu, txãasak Pedro' weçxaniite txã'wẽ we'we.
7 Txajũ' tãaph kĩhçxa aphku, aça' tãaph dxiiju na'wẽk we'weni pthũuse:
—Na' adx Nçxi'k wala wedxnisa', aça' txã'sa' nwẽesẽ'jna kxtey myuuwe jĩçpkaçxha'
8 Pedrowe'sxa' thegu'gçxawa, Moiseswe'sxtxi uymeeta', naasáa Jesusçxáa yã'j ũstetx uy.
9 Aça' thã'ju u'jweççxa', Jesusa' Pedrowe'sxtxi' wala neewe'wek:
—Ãçxhíi yu' maa yuhtxwa pta'sxmeene'kwe txã'wẽ uyni's, naasáa Dxus Nçxi'k Nasa Yuusáa uuçxawa ki' ĩtxĩ yuuniijũ pta'sxine'kwe.
10 Txã'wẽ neewe'weni's kxtey nwẽesẽ'jtx kim yuhtxwa tuuthe'jmée. Nawa txãawe'sx pwe'sx yu' puutx paapẽyĩ'tx: Uuyã'jçxa', ¿ma'wẽ ki' ĩtxĩ yuukx? jĩna.
11 Txajũ' na'wẽ kaapiya'jni'stxi Jesusa's paapẽjx:
—Dxus leya's kaapiya'jsawe'sxa' Elias khuẽ'y yaçte pa'jana jĩ'tx sa' ¿ma'wẽ yuuwa'jsakx açki'tx txã'jĩ'? jĩte',
12 Jesusa' na'wẽk pta'sx:
—Isa, Elias khuẽ'y yuh yaçte pa'jçxa jxuka pheu'jwa'jsa yu'k aça' isa yuh pta'sxi'ne'ta. Txã'wẽy Dxus Nçxi'k Nasa Yuusa's we'weçxa': wala pxthaa yuuna nasa ahçeçxa pkxuuni jĩna Dxus librute fxi'jni ũsa' txãawa isa yuja'.
13 Eliasa' pa'jana jĩ'tx aça' Eliasa' pa'jyujk, nawa txã'sa' kĩjkĩhwa yũutx Dxus librute ma'wẽ fxi'jni ũsna txã'wẽy.
Teeçx luuçx wẽeçxpa'jsa's Jesus nuykatxhini
(Mt 17.14-21; Lk 9.37-43)
14 Txajũ' Jesusa' vxitesa neeyũutx kxtee sxawedna kĩjaçte', nasa wala pkhaakhena ũsu'tx. Aça' Dxus leya's kaapiya'jsawe'sx yu' txãawe'sx yakhtxi wala we'wena ũsu'.
15 Naapkaçxha' Jesus yuhtewa jiimée ũsiyna, Jesus pa'jaçyã'the uyçxa', nasa' jxukaysa ũukh yajkxnatx weçxaya' utxáa.
16 Txajũ' Dxus leya's kaapiya'jsawe'sxtxi' Jesusa' pẽjxku:
—¿Kĩh yũupa'ga txakwe weeçx we'wena ũskwe? jĩte',
17 txãa nasa wala ksxavxyte teeçxsa' Jesusa's na'jĩnak pta'sx:
—Adx nçxi'ka's eçx luuku vxit-sa iiyamute' we'weya' ãjã'çme' txã'snath ayte nuypa'j.
18 Txãa luuçxa' mtee ũstewa eçx luuku vxit yã'the', ki'thtxi ksuusu'jna yuwesu bu'çxçxáak sẽhna weté'. Txã'wẽ yũuna wala talxiça'. Aça' idx yakh u'jusawe'sxtxi' pi'kxyã'th nuykatxhikahn, nawa ãjãmeeta' jĩte',
19 Jesus pasçxa':
—Dxusa' pu'çxhina sũhwa'j yu'sa' ji'phmeesata' naa nasa'. ¿Bagaçxpkaçx i'kwe'sx yakh pu'çxna ũs ya'watka? ¿Bagaçxpkaçx ãjãmée fxi'ze ya'wakwe? Txãa luuçxa's mneejxũhwe ayte jĩte', nuykũhtx Jesus tasxte.
20 Aça' eçx luuku vxit-sa' txãa luuçxa's kaywẽçxpa'ja'the', kiwesu wetek yuwesu bu'çxçxáa sẽhna.
21 Txajũ' Jesusa' luuçx neya's pẽjxku:
—Txã'wẽ ãçã'ni ¿makwe txaçx yuuçna? jĩte':
—Le'çxíik txã'wẽ yu'.
22 Sa' maa entey yu' txaçxmeynak wẽeçxpa'jçxa ipxte khẽena yu'khẽwa khẽena uupçxãh yuuna u'ju'. Aça' kxahth idx yakh ewupçxãhte', ma'wẽçxáawa pu'çxhine'ga peeygãhçxa jĩna pi'ki' jĩte':
23 —Idx yuu txã'wẽ Dxusa' pu'çxhina sũhte yu', kĩhwa jxuka kxtey yuuna txã'wẽ yaakxsa's jĩte',
24 luuçx neya' susku we'wena pxthaa pi'kx:
—Dxusa' pu'çxyujuna sũju'th, sa' adx ũuste txã'wẽ yaakxwa'ja's jweeíiçxáa wala meen kaajiyu'j jĩk.
25 Txajũ' Jesusa' nasa wala kuh pkhaakhena utaaçte uyçxa', eçx luuku vxit-sa's na'jĩnak we'we:
—Eçx luuku vxit-sa kwe'we'je'çmeeg, sa' wẽsẽ'jwe'sxte thũ'wẽtxwa aphgu, nawa ãçxha' adx we'weni's nwẽesẽ'jçxa ũusu mkaaseh, peena yu' u'kameene'ga jĩte',
26 eçx luuku vxit-sa' txãa luuçxa's sus kweeyi'jna kaywẽçxpa'ja'jçxa kasejk. Aça' txãa luuçxa' uuníi na'wẽk wetena neeyũu.
Kxahtx nasa we'weçxa':
—Ãçxha' pejka uuk jĩna we'we'.
27 Nawa Jesusa' kuseju pu'kisku, aça' txãa luuçxa' kiitek.
28 Jesusa' txãajũ u'jçxa', teeçx yattek u'ka. Aça' txãa yakh u'jusawe'sxa' pẽjxtxi:
—Kwe'sxa' ¿kĩh yũuçxakxtha'w eçxa's kutxi'jya' ãjãmée? jĩte',
29 Jesusa' pta'sxku:
—Na'wẽsa eçxa' thẽymée yu' kasehmeena, wala yũunaana Dxus yakh puutx we'wete yuuçxáa kasejena jĩk.
Jesusa' txajx uuwa'ja's ki' pta'sxni
(Mt 17.22-23; Lk 9.43-45)
30-31 Txajũ ki' u'jçxa', Galilea kiwenku u'j. Sa' kxteea' txãa yakh u'jusawe'sxtxik kaapiya'jwa'j ji'phu' naa pa'ga kim yuhwa jiyu jxthãasme'. Sa' dxi'the u'jweççxa', na'wẽk txajx uuwa'ja's pta'sx:
—Dxus Nçxi'k Nasa Yuusá's nasa ewmeesa kusete dukhni yuuwa'ja', aça' txãawe'sxa' ikhetxna. Aça' uuçxawa, tekh ente' ki' ĩtxĩ yuuna jĩtewa,
32 txãa yakh u'jusawe'sxa' jiyumeeta', nawa pẽjxya' yu' ũukhtxi.
Kim wejx jxthaakwe jxtuhthesakx
(Mt 18.1-5; Lk 9.46-48)
33 Sa' Kapernaum çxhabte teeçx yatte pa'jçxa', txãa yakh u'jusawe'sxtxi paapẽjxku na'jĩna:
—I'kwe'sxa' dxi'the yuhçxa', ¿kĩjkwe puutx we'we'? jĩtewa,
34 txãawe'sxa' thaameçxa pasmeeta' txã'wẽ dxi'the yuhçxa', ¿maa wejx jxthaakwe walasakxtha'w? jĩna puutx we'weçxawa.
35 Txajũ' Jesusa' docesatx pa'yaçxa kaçxçxa pta'sxku:
—Maatewa jxthaakwe walasa yuu wẽeçxa', iiwejçx yajkxmée maatxwa jxuka selpiiçxa yuuçxáa jxthaakwe walasa yuuna.
36 Txã'jĩçxa' teeçx luuçxkuẽ's txãawe'sx ksxavxyte txahçxa kusete yakhçxa na'wẽk we'we:
37 —Maa nasawa adxna wa'lmée jxpa'gasa' adx na'wẽy luuçx na'wẽkwesatxwa ahçemée jxpa'gatxna. Txã'wẽ yũusa' adxna jxpa'gasaçxa txã'wẽ yuutxna. Sa' adxna jxpa'gasa' adxçxáana jxpa'gamée, adxna kaahsa'swa jxpa'gasa yuutxna jĩk.
Kwe'sxtxi açesamée yu' kwe'sx yakh fxi'zesatxna
(Mt 10.42; Lk 9.49-50)
38 Txajũ' Juana' na'wẽk pta'sx:
—Idx ¿ma'jĩki'g? Kwe'sxa' teeçx piçthẽ'j uytha'w txã' eçx luuku vxit-satx nasaa ũusu kutxi'ji'k Jesusku jxkaaja' jĩna we'weçxa. Nawa txã'sa' jwee yu' txã'wẽ yũukaahmeetha'w kwe'sx yakh u'jusame' naa pa'ga jĩte',
39 Jesus pasçxa':
—Txã'wẽ yũunuwe, txãa pa'gatey adx yase's kxsuusçxa eçx luuku vxit-satx nasaa ũusu kutxi'jsa' adxa's açewe'wemeena kim yuhwa.
40 Maawa kwe'sxtxi açewe'wesamée yu', kwe'sxtxi pu'çxsa íiçxáatxna.
41 Na'jĩ'th na': I'kwe'sxa' Dxus luuçxi'kwe naapa'ga maawa i'kwe'sxtxi peeygãhna teeçx tasa yu'çxáawa yusuna txã'sa' dewení yuuna.
Pkalte kweete'jya'mée jxpa'yakxwa'ja'
(Mt 18.6-9; Lk 17.1-2)
42 —Mpa'yajkxwe, txã'wẽme' luuçxkuẽ adxa's yaakxsatx pkalte kweete'jena txã'sa' txhikhte skuutxh ũ'khni kweta's tudçxa ĩkh wala dxiikhẽ akhwaççxáa, wejx ewna.
43 Meeçxawa iidx kuse txã'wẽ pkalte idxa's kweete'jeçte', mespẽ'th. E'z kuse yakh uu kiwete khẽe na'wẽ', wejxwa teeçx kuseçxáa ji'phçxawa pçumée ĩtxĩ fxi'zewa'the u'kani wejx ewa'. Txã'wẽme' uu kiwete ipx wala seena'sa bagaçxte yuhwa ũçxhawa'jsame'.
44 Kxteea' bagaçxte yuhwa wesa' çxhavxyna pçuwa'jsameeta', aça' ipx seena'sawa ũçxhawa'jsame'.
45 Txã'wẽy iidx çxidawa pkalte kweete'jeçte', txã'swa mespẽ'th. E'z çxida yakh uu kiwete khẽe na'wẽ', wejxwa teeçx çxidaçxáa ji'phçxawa pçumée ĩtxĩ fxi'zewa'the u'kani wejx ewna. Txã'wẽme' infxiernote ipxa' bagaçxte yuhwa ũçxhawa'jsame'.
46 Kxteea' bagaçxte yuhwa wesa' çxhavxyna pçuwa'jsameeta', aça' ipx seena'sawa ũçxhawa'jsame'.
47 Txã'wẽy iidx yafxwa pkalte kweete'jpçxãh yuuçte', mkuutxi'j. E'z yafx yakh infxiernote khẽe na'wẽ', wejxwa teeçx yafx yakhçxáawa Dxus jxkaahna ũsnite u'kani wejx ewna.
48 Txã'wẽme' kxteea' bagaçxte yuhwa wesa' çxhavxyna pçuwa'jsameeta', aça' ipx seena'sawa ũçxhawa'jsame'.
49 Txãa pa'gatey txãa ipxa' kaapçu'ju'jwa'jsame'.
50 Nega' wala seelpisa'. Nawa sxũukãhte', ¿ma'wẽ kselpi'jya' ewuutxki? I'kwe'sxa' nega na'wẽy selpiina mfxi'zewe, jxukaysa yakh ewçxáa.