15
Dxus angeleswe'sx siete kastigotx ji'phsa
1 Vxite seena' ũukhũukhsa cielute uythu: siete angeleswe'sxa' siete kastigo's pta'sxsatx yu'. Txãa siete kastigosa' nmehsatx yu' Dxus kastigo.
2 Mar ipx ka'dni na'wẽsa zhiçxkwe speeju na'wẽ khikhyna ũste uythu. Aça' eçx seena'sa vxite' txãa eçx na'wẽy piisani yuuk vxite' txajx yase numero txã'wẽsatx nwẽese'jsameewe'sx yu' txãa mar pukate yujuçxatx ũsu', tukani arpatx Dxus ũsku txãatx atçxa.
3 Sa' Dxusna selpisáa Moises mema's memu'tx, vxite' Piisxakuẽ jĩnisa'swa weçxana memu'tx na'jĩna:
Dxus, kĩhtewa jxuka ãjãsa,
Seena' yuh wala pu'çxgu kĩhtewa jxuka.
Naa kiwete jxuka jxkaahsa iidx mjĩini' jxuka ewçxaçxáata'.
4 Kwe'sxtxi jxkaahsag aça' ¿idxa's kim ũukhmée yuukx?
Sa' ¿kim idxa's tuuthe'jmée yuukx?
Idx yuuçxáa pkal ji'phmée atesag, aça' maa kiwejuwe'sxwa jxuka idxçxaçxá's neewe'wetxna,
Txãa pa'gatey idx ew yũunisa' ãatek yuu jĩnatx memu'.
5 Txã'wẽ yũunijũ' ki' vxite uythu, cielute Dxus ũsnite Dxus leytxi jxaawni vxitx phateeçte.
6 Aça' txãa Dxus ũsnijũ yu' siete angeleswe'sxtxi kaseh, siete kastigo seena'satx jxũçxa. Txãawe'sxa' athni ropa ate kwentetesatx ji'phu'. Sa' jxtudnisa yu' vxyuu behçxaçxáa peçxun kãhsatx ji'phu'.
7 Txajũ' Dxus vxitni ĩtxĩsa pahzsatewe'sx teeçxsa' vxyuu bee kopa ũsku teeçxsa na'wẽçxah txãa siete angeleswe'sxtxi. Kxtee yu' kastigo seena'saçxaçxáa utatx ji'ph yu' Dxus bagaçxtewa nes yuuwa'jsa kaahni.
8 Aça' txãa Dxus ũsnite yu' jxuka ahçxaçxáa utak, Dxus kĩhtewa jxuka ãjãwa'jsa tasxu yuusak yu'. Aça' kxtee yu' kim yuhwa u'kaya' ãjã'çmeeta', siete kastigo siete angeleswe'sx ji'phu'tx txãa pçumeyna yu'.