Es 12. Gabiddel.
1 Fagess nett deah es dich kshaffa hott
diveil es du noch yung bisht,
un eb di evila dawwa kumma
un di yoahra nayksht kumma vann du sawksht,
“Si kfalla miah nett”—
2 eb di sunn un's licht
un da moon un di shtanna dunkel vadda,
un di volka zrikk kumma noch em reyya;
3 an di zeit vann selli ziddahra es es haus vatsha,
un shteiki mennah iahra bikkel sich beeya;
vann di mawlah shtobba mawla veil's so vennich funna sinn,
un selli es am deich di fenshtahra gukka sinn dreeb vadda;
4 vann di deahra zu di shtrohsa zu gmacht vadda,
un di yacht fumm mawles leichtah vatt;
vann mennah uf shtayn meiyets an di yacht funn fekkel,
avvah di fekkel iahra yacht vatt leichtah;
5 vann mennah sich feicha in di hay gay,
un sich feicha veyyich di kfoah uf em vayk;
vann da almond-bohm veisi blumma hott,
un da hoi-shrekk sich fassich zeekt,
un's is kenn lusht may datt.
No gayt da mann an sei ayvichi haymet,
un di leit es heila lawfa rumm heah in di shtrohsa.
6 Denk an deah es dich kshaffa hott—
eb da silvah shtrikk fareist,
un eb di goldich shissel fabrecht;
eb da pitshah fabrecht an di shpring
un eb's rawt fabrecht am brunna;
7 eb da shtawb zrikk drayt zu grund,
vo eah bei kumma is
un eb da geisht zrikk gayt zu Gott,
deah es een gevva hott.
8 “Awl dess hott kenn mayning,” sawkt da Breddichah.
“Nix in layva hott mayning.”
Vadda Es Dess Shreives Alles Zammah Doon
9 Da Breddichah hott nett yusht veisheit katt, avvah eah hott aw di leit gland un eena eisicht gevva. Eah hott sacha ivvah-gedenkt un ausksucht un feel shpricha ufkokt.
10 Da Breddichah hott ksucht fa di rechta vadda, un vass eah kshrivva hott voah ufrichtich un di voahheit.
11 Di vadda funn mennah mitt veisheit sinn vi oxa-gixah, un vi nekkel es hatt nei gedrivva sinn. Si sinn gevva bei ay Shohf-Heedah.
12 Sei gvand, mei sohn, funn ennich ebbes may vi dee vadda. Es is kenn end zu vi feel bichah es gmacht vadda, un zu feel lannes kann dich ausveahra.
13 Es end funn awl demm is nau keaht vadda. Un do is vass miah uf kumma mitt: Firchtet Gott un haldet sei gebodda; dess is vass alli mann shuldich is fa du.
14 Fa Gott zayld alli ding richta es miah doon, un sell maynd alli goot adda shlecht ding un aw sell es hinna rumm gedu vatt.