Es 28. Gabiddel.
Di Broffetzeiya Geyyich Da Kaynich Funn Tyrus
1 Es vatt fumm Hah is zu miah kumma un hott ksawt:
2 “Mensha-kind, sawk zumm feddahshta funn Tyrus, ‘Dess is vass da Awlmechtich Hah sawkt:
Veil dei hatz shtols is,
un du sawksht, “Ich binn en gott;
ich hokk uf em kaynich-shtool funn di gettah
in di mitt fumm say—”
avvah du bisht en mensh, nett en gott,
doch maynsht du du hosht di veisheit
funn en gott.
3 Du maynsht es du hosht may veisheit es da Daniel,
un es nix fashtekkeld sei kann funn diah.
4 Deich dei veisheit un fashtand,
hosht du dich oahrich reich gmacht,
mitt feel gold un silvah
in dei shtoah-heisah.
5 Deich dei veisheit am handla,
hosht du dich reichah gmacht,
un veil du oahrich reich bisht,
is dei hatz shtols vadda.
6 So dess is vass da Awlmechtich Hah sawkt:
Veil du maynsht du bisht shmeaht,
un hosht di veisheit funn en gott,
7 dann zayl ich fremdi geyyich dich bringa,
di unfashtendishta funn awl di lendah;
si zeeya iahra shvatt geyyich dei shayni veisheit,
un fadauva dei grohsah glitz.
8 Dei feinda bringa dich nunnah in's grawb,
du zaylsht en veeshtah doht havva
in di mitt fumm say.
9 Sawksht du alsnoch, “Ich binn en gott,”
fannich selli es dich doht macha?
Du bisht yusht en mensh, nett en gott,
in di hend funn selli es dich umbringa.
10 Du zaylsht shtauva vi di unbeshniddana,
bei di hend funn fremdi.
Ich habb kshvetzt, sawkt da Awlmechtich Hah.’ ”
11 Es vatt fumm Hah is zu miah kumma un hott ksawt:
12 “Mensha-kind, mach en leicht-leet veyyich em kaynich funn Tyrus un sawk zu eem: ‘Dess is vass da Awlmechtich Hah sawkt:
Du voahsht's gleichnis funn folkummaheit,
foll veisheit un oahrich shay.
13 Du voahsht in Eden,
im goahra funn Gott;
alli sadda deiyahri shtay hosht du gvoahra:
ruby, topaz un diamond,
beryl, onyx un jasper,
sapphire, turquoise un beryl.
Dee shtay voahra in gold ksetzt fa dich,
si voahra gmacht uf da dawk
es du kshaffa voahsht.
14 Du voahsht en cherub es ksalbt voah fa zu dekka,
ich habb dich so gmacht.
Du voahsht uf em heilicha berg funn Gott,
un bisht in di mitt funn di feiyahricha shtay gloffa.
15 Du voahsht unshuldich in dei vayya,
fumm dawk es du kshaffa voahsht
biss ungerechtichkeit kfunna voah in diah.
16 Deich dei feel sach handla,
hosht du dich filla glost mitt unfashtand,
un hosht ksindicht.
So habb ich dich in shohm fumm berg funn Gott gedrivva,
un habb dich raus kshtohsa, oh cherub es zu dekt,
aus di mitt funn di feiyahricha shtay.
17 Dei hatz is shtols vadda
veil du so shay voahsht;
du hosht dei veisheit fadauva glost,
veil du so hohch-geaht voahsht.
So habb ich dich uf da bodda kshmissa;
ich habb dich fannich kaynicha gedu,
so es si dich sayna kenna.
18 Deich dei sinda un uneahlich handles,
hosht du dei tempels unheilich gmacht.
So habb ich feiyah gmacht aus diah kumma,
un's hott dich ufgebrend.
Ich habb dich zu esh gedrayt uf em bodda,
fannich awl selli es am vatsha voahra.
19 Awl di heida es dich gekend henn,
henn sich fashtaund ivvah dich;
du bisht zu en shreklich end kumma
un zaylsht nee nimmi sei.’ ”
Di Broffetzeiya Geyyich Sidon
20 Es vatt fumm Hah is zu miah kumma un hott ksawt:
21 “Mensha-kind, dray dei ksicht geyyich Sidon un broffetzei digeyya
22 un sawk: ‘Dess is vass da Awlmechtich Hah sawkt:
Ich binn geyyich dich, oh Sidon;
ich zayl mei hallichkeit veisa in di mitt funn diah.
Si zayla vissa es ich da Hah binn
vann ich dich shtrohf
un veis es ich heilich binn in di shtatt.
23 Ich zayl en blohk uf see shikka,
un macha es bloot lawft in iahra shtrohsa.
Ivvahrawlich in iahra mitt leiya selli es vay gedu vadda
bei em shvatt.
No vissa si es ich da Hah binn.
24 Di leit funn Israel zayla nimmi veeshti nochbahra havva es sinn vi danna-putsha mitt shaufi shtechah fa si vay du. No zayla si vissa es ich da Awlmechtich Hah binn.’ ”
Israel Vatt Zrikk Gebrocht
25 “ ‘Dess is vass da Awlmechtich Hah sawkt: Vann ich di leit funn Israel moll zammah sammel aus di heida vo si fashtroit voahra, dann veis ich zu di heida es ich heilich binn unnich mei leit. No zayla si in iahra ayya land voona, sell es ich zu meim gnecht da Jakob gevva habb.
26 Si zayla aus di kfoah voona datt, un zayla heisah bauwa un vei-goahra blansa. Yau, si zayla datt voona aus di kfoah, vann ich moll iahra nochbahra shtrohf, selli es si kast henn. No zayla si vissa es ich da Hah iahra Gott binn.’ ”