Es 19. Gabiddel.
En Zeiya Veyyich Egypta
1 Dess is en zeiya veyyich Egypta:
Gukket, da Hah is am foahra uf en volk es shteik gayt,
un is am zu Egypta kumma.
Di abgettah funn Egypta sinn am ziddahra fannich eem,
un di Egyptah iahra hatza shmelsa in eena.
2 “Ich zayl di Egyptah ufshtadda geyyich nannah—
broodah fecht geyyich broodah,
nochbah geyyich nochbah,
shtatt geyyich shtatt,
un kaynich-reich geyyich kaynich-reich.
3 Di Egyptah zayla moot faliahra,
un vass si ausmacha fa du bring ich zu nix;
si frohwa roht funn iahra abgettah, di geishta funn di dohda,
un funn voah-sawwah un zaubahrah.
4 Ich gebb di Egyptah ivvah zu en veeshtah roolah;
en shreklichah kaynich zayld ivvah si roola.”
Dess sawkt da Hah, da Awlmechtich Hah.
5 Di vassahra fumm revvah zayla ufdrikla,
da bodda fumm revvah vatt drukka un hatt.
6 Di revvahra zayla shtinka,
un di grikka funn Egypta vadda leah un zayla uf-drikla.
Di vassah-shtengel zayla doht gay,
7 un aw awl di blansa am Nile Revvah nohch
un am maul fumm revvah.
Alli eiksayt feld am Nile nohch vatt drukka,
zayld vekk geblohsa vadda un zayld nimmi sei.
8 Di fishah zayla yammahra un gneixa,
selli es fisha mitt hohka,
un selli es fisha mitt nets
zayla bedreebt sei.
9 Selli es shaffa mitt flax,
un selli es linnen duch macha faliahra moot.
10 Selli es glaydah macha vadda bedreebt,
un selli es shaffa fa en lohn faliahra hofning.
11 Di evvahshti funn Zoan sinn nett oahrich ksheit,
un em Pharao sei grohsi roht-gevvah, gevva dummah roht.
Vi kansht du sawwa zumm Pharao,
“Ich binn en mann mitt veisheit,
un kumm funn di alda kaynicha heah”?
12 Vo sinn dei mennah mitt veisheit nau?
Loss si diah sawwa
vass da Awlmechtich Hah
du zayld geyyich Egypta.
13 Di evvahshti funn Zoan sinn unksheit vadda,
di foah-gengah funn Memphis sinn fafiaht;
di ekk-shtay funn di leit
henn Egypta letz kfiaht.
14 Da Hah hott si ufgmixt
un daumlich gmacht;
si macha Egypta letz gay in alles es see dutt,
so vi en ksoffanah rumm shtaekkaht in seim kotz.
15 Es is nimmand in Egypta es ebbes du kann diveyya,
es macht nix aus eb eah da kobb adda da shvans is,
adda eb eah grohs adda glay is.
16 In sellem dawk zayld Egypta sei vi veibsleit. Si zayla ziddahra un sich feicha vann da Awlmechtich Hah sei hand uf haybt geyyich si.
17 Es land funn Juda zayld di Egyptah fagelshtahra. Alli-ebbah es shvetzt veyyich Juda zayld angsht havva ivvah vass da Awlmechtich Hah du zayld geyyich Egypta.
18 In sellem dawk zayla fimf shtett in Egypta es di shprohch funn Kanaan shvetza, sich zumm Awlmechticha Hah shveahra. Ayns funn di shtett hayst di Shtatt funn di Sunn.
19 In sellem dawk zayld en awldah zumm Hah in di mitt funn Egypta sei, un en shtaynichah poshta zumm Hah an di lein zvishich Egypta un Israel.
20 Dess zayld en zaycha un en zeiknis sei es da Awlmechtich Hah im land Egypta is. Si zayla da Hah ohbayda veyyich selli es si nunnah dredda, un eah zayld eena en heiland shikka es si frei macht.
21 So zayld da Hah sich bekand macha zu di Egyptah in sellem dawk, un si zayla sich bekenna zumm Hah. Si zayla een deena mitt opfahra un shpeis-opfahra, zayla fashprechinga macha zumm Hah un si aw halda.
22 Da Hah zayld Egypta shlauwa, avvah si aw hayla. Si drayya zumm Hah, un eah heicht si ab un hayld si.
23 In sellem dawk zayld en vayk sei funn Egypta zu Assyria. Di leit funn Assyrian kumma zu Egypta un di Egyptah gayn zu Assyria. Di Egyptah un di leit funn Assyria zayla Gott mitt-nannah deena.
24 An selli zeit zayla Israel un Egypta un Assyria mitt-nannah en sayya sei uf di eaht.
25 Da Awlmechtich Hah zayld si saykna un zu eena sawwa, “Ksaykend is Egypta mei leit, un Assyria es ich kshaffa habb un Israel mei eahbshaft.”