Es 3. Gabiddel.
Gott Richt Jerusalem Un Juda
1 Gukket nau da Hah, da Awlmechtich Hah,
zayld iahra shtokk un alles es si sich druff falossa,
vekk nemma funn Jerusalem un Juda,
awl iahra ess-sach un awl iahra vassah,
2 da mechtich mann un greeks-gnecht,
da richtah un da brofayt,
da voah-sawwah un da eldishtah,
3 da Hauptmann mitt fuftzich mennah unnich sich, un da hohch-geaht mann,
da roht-gevvah, da haendich shaff-mann,
un da zaubahrah.
4 Ich zayl yungi boova ivvah si du,
un kinnah zayla si roola.
5 Di leit zayla nannah nunnah dredda,
mann geyyich mann, un nochbah geyyich nochbah.
Di yunga leit zayla sich ufshtella geyyich di alda,
selli unni eah geyyich selli mitt eah.
6 An selli zeit zayld en mann ayns funn sei breedah graebba
in sei daett sei haymet un zayld sawwa,
“Du hosht alsnoch en vammes, sei unsah foah-gayyah;
rool ivvah deah fadauva haufa.”
7 Avvah eah zayld sawwa,
“Ich kann nix du fa eich.
Es is kenn ess-sach adda en vammes in meim haus,
setz mich nett ivvah dee leit.”
8 Yau, Jerusalem is kshtolbaht, un Juda is kfalla;
iahra vadda un sell vass si doon is geyyich da Hah.
Si shtella sich uf geyyich sei hallichkeit.
9 Da vayk vi iahra ksichtah gukka zeikt geyyich si;
si veisa iahra sinda fanna rumm es vi Sodom,
si fashtekla si nett.
Vay zu eena!
Si henn grohsah druvvel uf sich selvaht gebrocht.
10 Sawk zu di gerechta es es zayld goot gay mitt eena;
si zayla di frucht funn iahra eahvet essa.
11 Avvah vay zu di gottlohsa,
es zayld nett goot gay mitt eena.
Si vadda zrikk betzawld fa vass si fadeend henn.
12 Oh mei leit, kinnah sinn am eich nunnah dredda,
veibsleit roola ivvah eich.
Mei leit, selli es eich fiahra, doon eich letz fiahra,
si drayya eich vekk funn di pawt.
Da Hah Zayld Richta
13 Da Hah nemd sei blatz fa richta,
eah shtayt uf fa sei leit richta.
14 Da Hah gayt in's gericht
geyyich di eldishti un foah-gengah funn sei leit.
“Diah sind selli es mei vei-goahra fadauva hend,
un sell vass grawbt voah funn di oahma is in eiyah heisah.
15 Vass maynet diah bei mei leit nunnah dredda,
un bei di oahma iahra ksichtah famawla?”
So sawkt da Hah, da Awlmechtich Hah.
Di Veibsleit Sinn Gvand
16 Da Hah sawkt,
“Di veibsleit funn Zion sinn shtols,
si lawfa mitt iahra kebb in di hay,
un mitt lusht in di awwa,
si lawfa rumm mitt katzi shritt,
un macha di rings klingla an iahra fees.
17 Fasell zayld da Hah grinda uf di veibsleit funn Zion
iahra kebb bringa,
un da Hah macht iahra kebb blutt.”
18 In sellah dawk zayld da Hah iahra shmukk vekk nemma;
iahra rings um di bay, di kobb-banda, di hals-kedlen,
19 di kedda, di eahm-rings, di ksicht-dichah,
20 di kobb-dichah, di bay-kedlen, di duch-belts,
di goot-shmakkich ayl-bodla, di oahra-rings,
21 di fingah-rings, di naws-rings,
22 di feina rekk un mandla un ausahri glaydah, di geld-sekk,
23 di shpikla, di linnen glaydah, di heet, un iahra shawls.
24 In blatz funn goot-shmakkich ayl zayld's en veeshtah kshmakk sei;
in blatz funn en duch-belt zayld's en shtrikk sei,
in blatz funn shayni hoah zayld's en bluddah kobb sei,
in blatz funn feini glaydah zayld's sekk-glaydah sei,
in blatz funn shayheit zayld's shohm sei.
25 Eiyah mennah vadda nunnah kakt mitt em shvatt,
un eiyah shteiki greeks-gnechta im greek.
26 Di shtatt-doahra funn Zion zayla veina un heila;
di shtatt zayld leah sei un uf em bodda hokka.