Es 47. Gabiddel.
Babylon Is Kfalla
1 “Kumm runnah un hokk dich in da shtawb,
du leddich maydel Babylon.
Hokk dich uf da grund unni en kaynich-shtool,
du dochtah funn di Chaldayah.
Du zaylsht nimmi shay un vayyich kaysa sei.
2 Nemm da meel-shtay un mawl mayl,
dekk dei kobb ab.
Hayb dei rokk uf, mach dei bay blutt,
un lawf deich's vassah.
3 Dei nakkichheit vatt ksenna
un dei shohm abgedekt.
Ich zayl auseeva
un nimmand zayld mich shtobba.”
4 Eah is unsah Frei-Shtellah;
sei nohma is Awlmechtichah Hah,
da Heilich Gott funn Israel.
5 “Hokk dich anna un sei shtill, gay in's dunkla,
du dochtah funn di Chaldayah.
Du zaylsht nimmi di kaynich-fraw
funn kaynich-reicha kaysa sei.
6 Ich voah bays mitt mei leit,
un habb mei eahbshaft faveesht.
Ich habb si in dei hand gevva,
un du hosht eena kenn bamhatzichkeit gvissa.
Du hosht en shveah yoch uf si gedu,
even uf di alda leit.
7 Du hosht ksawt, ‘Ich zayl immah
di kaynich-fraw sei!’
Avvah du hosht dee sacha nett ivvah-gedenkt,
adda fanna naus gegukt vass blatz nemma kend.
8 Nau dann, heich moll zu demm,
du es blesiah gleichsht,
du es aus di kfoah hoksht,
un sawksht in deim hatz,
‘Ich binn, un's is nimmand vi mich.
Ich zayl nee kenn vitt-fraw sei,
adda mei kinnah faliahra.’
9 Dee sacha zayla awl zvay ivvah dich kumma,
bletzlich, in aym dawk:
Du zaylsht dei kinnah faliahra un en vitt-fraw vadda.
Dee sacha kumma folshtendich ivvah dich,
even mitt dei feel zaubahrei,
un di macht funn dei hexahrei.
10 Du hosht dich uf dei ungettlichkeit falossa,
un hosht ksawt, ‘Nimmand saynd mich.’
Dei veisheit un lanning henn dich fafiaht,
un du hosht ksawt in deim hatz,
‘Ich binn, un's is nimmand vi mich.’
11 Avvah evil zayld uf dich kumma,
un dei zaubahrei kann's nett shtobba.
Evil zayld uf dich falla,
un dei opfah nemd's nett vekk.
Fadauves es du nett foah-sayna kansht
zayld bletzlich uf dich kumma.
12 Hald oh mitt dei hexahrei,
un mitt dei feel zaubahrei,
dee es du gedu hosht funn yungem uf.
Fleicht zayla si diah helfa aus druvvel,
fleicht kansht du anri fagelshtahra.
13 Du bisht meet mitt feel roht es du griksht;
loss di voah-sawwah foah kumma,
selli es broffetzeiya bei di shtanna,
un bei di neiya moona.
Loss si uf shtay, un shtobba
vass uf dich kumma zayld.
14 Gukket, si sinn vi shtubla im feld,
feiyah brend si uf.
Si kenna sich selvaht nett halda
funn di graft fumm flamm.
Si sinn nett vi kohla fa em veahma,
adda vi en feiyah fa dibei hokka.
15 Sell is alles es si du kenna fa dich,
selli es du zu du katt hosht mitt,
un kshaft hosht mitt funn yungem uf.
Yaydahs funn eena gayt sei ayknah, letzah vayk,
un kens funn eena kann dich frei macha.”