Es 64. Gabiddel.
1 Oh, ich vott du daytsht di himla ufreisa
un daytsht runnah kumma,
so es di berga shidla dayda fannich diah!
2 So vi vann feiyah kindling ohshtekt
un macht vassah kocha,
kumm runnah un mach dei nohma bekand
zu dei feinda,
so es di heida ziddahra fannich diah!
3 Vo du vundahboahri sacha gedu hosht
es miah nett gegukt henn difoah,
bisht du runnah kumma,
un di berga henn kshiddeld fannich diah.
4 Siddah aldi zeida hott nimmand keaht,
adda fanumma deich sei oah,
un kenn awk hott ennichah Gott ksenna,
es vi yusht dich;
deah es shaft fa selli es voahra uf dich.
5 Du kumsht zu selli es fraylich sinn am gerechtichkeit du,
un es an dei vayya denka.
Avvah du voahsht bays vo miah ohkalda
henn sindicha,
so vi sella miah saylich vadda?
6 Awl funn uns sinn vadda
vi selli es unrein sinn;
awl unsah gerechti verka sinn vi drekkichi lumba,
miah favelka vi bleddah
un unsah sinda drawwa uns vekk vi da vind.
7 Nimmand rooft dei nohma oh,
adda broviaht hohld nemma funn diah;
du hosht dei ksicht fashtekkeld funn uns
un losht uns fagay in di macht funn unsah sinda.
8 Doch, oh Hah, du bisht unsah Faddah.
Miah sinn da clay, un du bisht da heffa-machah;
awl funn uns sinn di eahvet funn dei hand.
9 Sei nett zu bays mitt uns, oh Hah,
un denk nett an unsah sinda fa'immah.
Gukk runnah uf uns awl
fa miah sinn dei leit.
10 Dei heilichi shtett sinn en vildahnis vadda,
un so is Zion, Jerusalem is en leahrah blatz.
11 Unsah heilichah un shaynah tempel,
vo unsah foah-feddah dich glohbt henn,
voah fabrend mitt feiyah;
un alles es uns leeb voah leit fadauva
uf en haufa.
12 Zaylsht du unbekimmaht bleiva, oh Hah,
un dich zrikk hayva?
Zaylsht du shtill bleiva,
un uns lossa leida?