Es 12. Gabiddel.
Di Miriam Un Da Aaron Grumla
1 Di Miriam un da Aaron henn no ohkfanga shvetza geyyich da Mosi veyyich sei Kushiddah fraw, fa eah hott en Kushiddah fraw keiyaht katt.
2 Si henn ksawt, “Hott da Hah yusht kshvetzt deich da Mosi? Hott eah nett aw kshvetzt deich uns?” Un da Hah hott dess keaht.
3 (Nau da Mosi voah en daymeedichah mensh, may so es alli mensh uf di eaht.)
4 Un bletzlich hott da Hah ksawt zumm Mosi, em Aaron un di Miriam, “Awl drei funn eich kummet raus an da fasamling-tent.” So sinn si awl drei naus ganga.
5 No is da Hah runnah kumma in en volka-poshta, un hott am doah fumm tent kshtanna. Datt hott eah da Aaron un di Miriam groofa. Vo si fassich kumma sinn,
6 hott eah ksawt, “Heichet mei vadda ab:
Vann en brofayt fumm Hah unnich eich is,
dann mach ich mich gvissa zu eem in en vision,
adda ich shvetz zu eem in en drohm.
7 Avvah dess is nett so mitt meim gnecht Mosi,
eah is shtandhaftich mitt meim gans haus.
8 Mitt eem shvetz ich maul zu maul,
grawt raus, un nett in dunkli kshvetzah;
eah saynd da Hah vi eah is.
So favass hend diah eich nett kfeicht
fa shvetza geyyich mei gnecht da Mosi?”
9 Em Hah sei zann hott gebrend geyyich si, un eah hott si falossa.
10 Vo di volk nuff ganga is fumm tent, datt hott di Miriam kshtanna, gans aussetzich, veis vi shnay. Da Aaron hott sich noch iahra gedrayt, un hott ksenna es see aussetzich voah.
11 No hott eah ksawt zumm Mosi, “Oh mei hah, layk dee sind nett uf uns es miah so unksheit gedu henn.
12 Loss see nett sei vi ebbah es doht-geboahra is, ebbah es sei flaysh halvah fazeaht is vann eah aus em muddahs-leib kumd.”
13 No hott da Mosi naus groofa zumm Hah, “Oh Gott, hayl see!”
14 Da Hah hott ksawt zumm Mosi, “Vann iahra daett in iahra ksicht kshpautzt hett, mist see no nett im shohm layva fa sivva dawk? Du see naus aus di camp fa sivva dawk; noch sellem kann see viddah zrikk kumma.”
15 So voah di Miriam naus aus di camp gedu fa sivva dawk, un di leit sinn nett on gezowwa biss see viddah rei gebrocht voah.
16 Noch sellem, henn di leit da blatz Hazeroth falossa, un henn iahra tents uf gedu in di Vildahnis funn Pharan.