Da 27. Psalm.
En Gebayt Fa Gott Lohva
En Psalm fumm Dawfit.
1 Da Hah is mei licht un mei saylichkeit;
funn vemm soll ich mich feicha?
Da Hah is di Graft funn mei layva;
veah brauch ich mich feicha diveyya?
2 Vann evil-shaffah uf mich kumma
fa mich fareisa,
vann mei feinda un selli es mich hassa, geyyich mich kumma,
dann zayla si shtolbahra un anna falla.
3 Even vann feel greeks-gnechta um mich rumm kumma,
dann zayld mei hatz sich nett feicha;
un vann greek raus brecht geyyich mich,
dann faloss ich mich uf een.
4 Ay ding habb ich kfrohkt fumm Hah,
sell zayl ich nohch gay:
so es ich im Hah sei haus bleiva kann
mei layva lang,
fa sayna vi shay es da Hah is,
un fa een sucha in seim tempel.
5 An di zeit funn druvvel,
hald eah mich aus di kfoah in seim gebei.
Eah fashtekkeld mich in seim tent,
un setzt mich uf en hohchah felsa.
6 No zayld mei kobb uf kohva sei,
ivvah mei feinda es um mich rumm sinn.
In seim tempel-tent doon ich lohb opfahra mitt frayt,
ich zayl singa un da Hah lohva mitt mei shtimm.
7 Heich mei shtimm oh vann ich roof, oh Hah,
sei bamhatzich un gebb miah andvat.
8 Vo du ksawt hosht, “Such fa mei ksicht,”
hott mei hatz ksawt,
“Dei ksicht, oh Hah, zayl ich sucha.”
9 Fashtekkel dei ksicht nett funn miah,
dray dei gnecht nett vekk in zann;
du es mei hilf voahsht.
Faloss mich nett, un loss mich nett hokka,
oh Gott funn mei saylichkeit.
10 Even vann mei daett un maemm mich falossa doon,
dann nemd da Hah mich uf.
11 Veis miah dei vayk, oh Hah,
fiah mich in en grawdi pawt,
veil ich feel feinda habb.
12 Du mich nett ivvah-drayya zumm villa funn mei feinda,
fa leit es falshi zeiyah sinn, sinn ufkshtanna geyyich mich,
un si doon miah shawda.
13 Ich glawb avvah doch es ich sayna zayl
vi goot es da Hah is
im land funn di levendicha.
14 Voaht uf da Hah,
sei shteik un gedrohsht,
ich sawk viddah, voaht uf da Hah.