Da 64. Psalm.
En Gebayt Fa Aus Di Kfoah Kalda Sei
Zumm foah-singah. En Psalm fumm Dawfit.
1 Heich mei shtimm ab, oh Gott, vann ich mich faglawk,
heet mei layva vann ich lasht habb funn mei feinda.
2 Fashtekkel mich funn vass di gottlohsa im sinn henn,
un funn di shkeems funn di evil-shaffah.
3 Si shaufa iahra zunga vi shvadda;
si zeela iahra giftichi vadda vi arrows.
4 Si fashtekla sich un sheesa an di unshuldicha;
si sheesa bletzlich unni sich feicha.
5 Si famohna nannah mitt em evil es si im sinn henn,
si shvetza veyyich iahra falla fashtekla,
si sawwa, “Veah zayld uns sayna?”
6 Si henn evili sacha im sinn un sawwa,
“Miah henn en shlichtich ding ausgmacht.”
Fa di innahlichi gedanka fumm mensh sinn deef.
7 Avvah Gott sheest sei arrows an si,
un bletzlich sinn si vay gedu.
8 Deich iahra aykni zunga zayla si falla,
alli-ebbah es si saynd shiddeld sei kobb in furcht.
9 No doon awl di mensha sich feicha un sawwa,
“Dess is di eahvet funn Gott!”
Un si denka drivvah vass eah gedu hott.
10 Di gerechta leit zayla sich froiya im Hah,
un zayla sich zu eem fadrauwa.
Awl di ufrichticha im hatz zayla een preisa.