Es 13. Gabiddel.
Rein Gmacht Funn Sinda
1 “Uf sellem dawk zayld vassah aus em bodda kumma fa em Dawfit sei nohch-kummashaft un di leit funn Jerusalem sauvah macha funn sinda un unreinichkeit.
2 Uf sellem dawk,” sawkt da Awlmechtich Hah, “zayl ich awl di nayma funn di abgettah ausreiva aus em land so es nimmand may an si denka dutt. Ich zayl aw di brofayda un unreinicha geishtah aus em land dreiva.
3 Un vann ennich ebbah alsnoch broffetzeiya dutt, dann dutt sei faddah un muddah, dee es eah geboahra voah ditzu, sawwa zu eem, ‘Du musht doht gmacht sei veil du leeya ksawt hosht im Hah sei nohma.’ Un vann eah broffetzeiya dutt, dann doon sei aykni eldahra een deich shtohsa.
4 Uf sellem dawk zayld alli brofayt sich shemma veyyich sei visions, un eah dutt nett en hoahrich brofaydes glayt oh fa di leit fafiahra.
5 Eah zayld sawwa, ‘Ich binn nett en brofayt. Ich binn en bavvah; 's land hott mich faseikt funn yungem uf.’
6 Vann ebbah een frohkt, ‘Vass sinn dee vayya blakka uf dei brusht?’ dann sawkt eah, ‘Ich habb si grikt an mei freind sei haus.’ ”
Da Shohf-Heedah is Kshlauwa, Di Shohf Fayawkt
7 “Vekk uf, oh shvatt, shlakk mei shohf-heedah,
shlakk da mann es nayksht is zu miah!”
sawkt da Awlmechtich Hah.
“Shlakk da shohf-heedah, un di shohf vadda fayawkt,
no dray ich mei hand geyyich di glenna.
8 Im gansa land,” sawkt da Hah,
“zayla zvay driddel kshlauwa sei un doht gmacht sei,
avvah ay driddel bleibt ivvahrich im land.
9 Dess driddel dayl zayl ich deich's feiyah du,
un's reinicha vi ma silvah shmelst un's reinich macht,
un aw vi gold greinicht vatt.
Si zayla mei nohma ohroofa,
un ich gebb eena andvat.
Ich zayl sawwa, ‘Si sinn mei leit,’
un si sawwa, ‘Da Hah is unsah Gott.’ ”