7
Satu pacha gepkoxamkojmole gepkoxamkoje waragkane gimaxikoletkalune
1 Wanepnute netna gepkoxamkoje Goyakalutowrene, gepkoxamkoje chijisretate tunwanatachine, wa gepkoxamkoje chijisretate giyakannipgyatyachri gimretachine, ma majpopokannipgyatinitipa chiji, gi wa tsru wenuko, gi wa satu gagmunyegiko.
2 Ga wa satu Goyakalutowreru netatnaka, tkachi gishpatyawakasreta gipgujewniyachri. Goyakalu giwekachri gimaxikole gipipre waneyalutu. Gichkoplaji china sapletna gepkoxamkoje Goyakalutowrene, geneekalune wa chiji rumtukyapna ga wa tsru wenu. Wane china sapleta,
3 “Gi gimtukanru chiji, gi wa tsru wenuko, gi wa gagmunkakako, wumaxikoletinpotukna Woyakalute wayegrene gijrotayna.”
4 Ga wa njemlu gi pejnu gimaxikoletkalune: satu pacha gepkoxamkojmole gepkoxamkoje waragkane gimaxikoletkalune panerumnunanuka Gisrayiliklopishane.
5 Gotaklopishanerune pamole gepi waragkane gimaxikoletkalune.
Ga wa Roweklopishanerune pamole gepi waragkane.
Ga wa Kateklopishanerune pamole gepi waragkane.
6 Ga wa Gaseriklopishanerune pamole gepi waragkane.
Ga wa Neptaliklopishanerune pamole gepi waragkane.
Ga wa Manaseklopishanerune pamole gepi waragkane.
7 Ga wa Simoklopishanerune pamole gepi waragkane.
Ga wa Rewiklopishanerune pamole gepi waragkane.
Ga wa Gisachaklopishanerune pamole gepi waragkane.
8 Ga wa Sapolonoklopishanerune pamole gepi waragkane.
Ga wa Gosiklopishanerune pamole gepi waragkane.
Ga wa Migamiklopishanerune pamole gepi waragkane gimaxikoletkalune.
Gixolune potu yine klatalu mkachri gitakachine
9 Wanepnute netatka. Wanena gixolune potu yine, gike mumkata yantaletanune, pachijne gajenemnunanukaya, ga wa panerumnunanukaya, ga wa payinemnunanukaya, ga wa patokanumnunanuka yanumatyachineya, pogirchi tuplapijere ginaple ga wa gowega Wgene getanu tunwatachine. Klatalu mkachri gopowalu gitakachine. Ga wa kasureru waneyna gimyoyna.
10 Ga wa gichkoplaji china sapletna:
Woyakalutenni gognetkaklewlu
wa pogirchi tuplapijere tuplatachri,
ga wa gowega Wgenenni.
11 Giyagni tuplapije ga wa tsrune ga wa giwekachine sajruka tunwaletna pejnuruneko Goyakalutowrene. Tuplapije ginaple chiji gapokjiwutachinni. Ga wa yoptsojityegitluna Goyakalu. Wane chinna:
“Wane gixkalurupa.
12 Goyakalunupni gimalwuru,
ga wa goyaknuchi,
ga wa gimatkalchi,
ga wa poyagnutikolu,
ga wa kagwakpiiru,
ga wa giyaklu,
ga wa muchkonchi rixgognenatanu gike rixiniko mnikawnakatupa.
Wane gixkalurupa.”
13 Ga wa rugita satu wanna tsrune. Wane chinno, “Wa nyi klatalu mkachri gopowalu gitakachine ¿gi gixachinni ga wa ginaka ruyakatyana?”
14 Giyagni wane nchinru, “Nutsrukate, pixa gimata.”
Wane chinno, “Nyinwa tsru salewakchi giyakatyachinni. Ga wa ropowalutna rerkana ga wa klata rixkakluna gowega Wgenegragaya.
15 Wale chinanu Goyakalu tuplapijere ginaple rawna.
Yonogyegitluna gogi ga wa goyechno kpashiwakategrukoya.
Ga wa pogirchi tuplapijere tuplatachri gipjiya gishyatna.
16 Gi nachpatkana.
Gi ronunnagatewatanutkana.
Ga wa tkachi gi gapyegitanutkana,
ga wa giketsotaaji gemeruko.
17 Gi rixanu gowega Wgene
wa pogirchi tuplapijere ganikajiteswaji gwachri girukotanna.
Gonu gishpakgatyawaakaka giwekgatachrigonu yegi kosekanna.
Ga wa Goyakalu sheyiygaletanna pejnuruko ktechgaya.”