6
Godalu Aitjayanya Ngurkantankunytja Palumpa Wangkatjara Nyinanytjaku
1 Mungaṯu panya Judah-ku mayatja ini Utjayanya ilunytjitja-aṟangka ngayulu Mayatja Godanya nyangu timpula unngu katu nyinanyangka mayatjaku tjiya wiṟungka. Ka palumpa mantara waṟangku timpula unngu manta uwankara tjutuṟa kanyiningi.
2 Ka palula paṟa-ngaṟala arintanangi angelpa nyaḻpitjara tjuṯa. Ka paluṟu tjana kutjungku kutjungku kanyiningi nyaḻpi maṉkur-maṉkurpa, ka nyaḻpi kutjarangku yunpa tjutuningi, ka kutjara kutjupangku puntu munu tjina kutjara tjutuningi, kaya paluṟu tjana parpakaningi nyaḻpi kutjara kutjupatjara.
3 Munuyanku mirara ngaparku wangkangi alatji,
“Miḻmiḻpa wiṟunya Godanya Mayatja puḻka mulapa,
panya paluṟu manta winki witulya puḻkangku kanyini.”
4 Ka paluṟu tjana wangkanyangka timpula panya puḻkaṟa uringu munu puyu puḻkaringu timpula palula unngu.
5 Kaṉa ngayulu nyanganpa nyakula wangkangu alatji, “Awari! Ilukuṉatju, panya kuwariṉa nyanganyi Godanya Mayatja Puḻkanya, kaṉi nyaalku paluṟu ngayunya kura winki nyinanyangka nyakula? Panya ngayulu tjukurpa kura kutju wangkapai munuṉa aṉangu kura wangkapai tjuṯangka tjungu nyinanyi.”
6 Ka angelpa nyaḻpi tjuṯatjara kutjungku pitjilpakutu ankula waṟu palula kampanyangka purku kutju mantjiṟa ngayulakutu ngalya-parpakaṉu,
7 munuṉi ngayunya pampuṉu tjaḻinypa waṟu panya purkungka munuṉi wangkangu, “Mulapa nyuntu Mayatjala miṟangka kura winki ngaṟala puḻkaṟa kuṉṯaringanyi. Palu panya waṟu purkungkaṉanta tjaḻinypa pampunnyangka Mayatjalu nyuntunya kura tjuṯa palyantjitjanguṟu kalypangku wantiku wiyantja wiyangku. Panya kutjupangku nyuntunya ngalkinu, ka nyuntu palyalta ngaṟanyi.”
8 Kaṉa nyara palula maḻangka kulinu Mayatjalu wangkanyangka alatji, “Ngananyaṉa iyalku nganampa tjakulpa?”
Kaṉa wangkangu, “Nyangatjaṉa ngaṟanyi. Ngayunyaṉi iyala.”
9 Kaṉi wituṉu aṉangu tjuṯangka ankula wangkanytjaku tjukurpa nyanga alatji, “Nyura tjukurpa rawangku kulilku, palu nyura kuliṟa kuliṟa puṯu nintiringkuku. Munu nyura rawangkuṯu nyakuku, palu nyura nyakula nyakula puṯu tjukaṟurungku ngurkantankuku.”
10 Munuṉi piṟuku wangkangu alatji, “Aṉangu nyanga palunya tjananya kurunpa wituwitu ngaṟanytjaku palyanma tjana uti kulintjaku-tawara, munu tjananya kuṟu patinma tjana tjukaṟurungku nyakunytjaku-tawara, munu pina patinma tjana kulintjaku-tawara. Tjinguṟu tjana kuliṟampa ngayulakutu aṟuringama, kaṉa tjananya palyaṟungunma.”