11
Are ndavenhe Lázaro
1 Vehe ná xí venihi que vinhi Lázaro, xí mé Betania rajné xa, ẍajeho rajné María co xanchó María xanMarta.
2 Jehe María jihi, nc̈hichó jehe Lázaro, tti venihi, co María jihi tti cointtjitte aceite que anto ẍajni ngataha rotté Jesús co joinchexemanxin conixin ẍajá.
3 Jañá cayoi nc̈hí mé rroanha nc̈ha joajna ngain Jesús co ndac̈ho nc̈ha:
―Xiamigoa soixin nihi xa.
4 Are Jesús coinhi jihi, ndac̈ho:
―Chin yá nasoenxinhao chin Lázaro, jeho para rroẍagoxin joachaxín Dios co para de ixin chin yá cai rroẍagoxin joachaxín Xenhe Dios.
5 Masqui Jesús anto joinao jehe Marta, conixin cayoi xanchó Marta, María co Lázaro,
6 are ndache na Jesús ixin Lázaro venihi, Jesús ẍa vittohe iyó nchanho nttiha ngain tti lugar que vehe.
7 Después ndac̈ho ngain tti chojni que vacao:
―Chjin na iná para ngain Judea.
8 Co tti chojni que vacao ndac̈ho na:
―Maestro, ẍa seha chojni judío que techonda joachaxin de ngain lugar mé joinao na narrogoenxon na jaha ixin ẍo, ¿co ẍa rinao tsji nttiha iná?
9 Jesús ndac̈ho:
―¿Ajeha ndoa que nchanho chonda tteyó hora? Co si ná ni c̈hji ni de nchanho, tonttenguixinha ni ixin dicon ni joadingasán que jí ngataha nontte jihi,
10 pero si ná ni c̈hji ni de ttie, tonttenguixin ni ixin diconha ni joadingasán.
11 Cottimeja ndac̈ho Jesús ngain tti chojni que vacao:
―Xiamigoa na Lázaro tajijoa xa, pero sinttaxingamá xa.
12 Cottimeja tti chojni que vacao Jesús ndac̈ho na:
―Soixin, si tajijoa, rroc̈ho orroxengañao.
13 Pero tti ndac̈ho Jesús rroc̈ho que Lázaro ondavenhe. Co cain tti chojni que vacao Jesús ẍaxaon na que ndoa tti ndac̈ho Jesús ixin tavejoa Lázaro.
14 Cottimeja Jesús ndac̈ho ngain na claro:
―Lázaro ondavenhe.
15 Janha chahna ixin joariha nttiha; icha jian jañá para ixin jaha ra sitticaon ra. Pero chjin na sitsjehe na Lázaro.
16 Cottimeja Tomás, tti vancheguinhi na Xancoata, ndac̈ho ngain tti icha chojni que vacao Jesús:
―Chjin na ján na cai para senhe na conixin Jesús.
Jesús ndac̈ho ixin jehe tti rroxechonxin chojni co jehe tti danjo iná vida naroaxin
17 Are jehe na joiji na nttiha, chojni nttiha joinchenohe na Jesús que Lázaro ovechonda nó nchanho que jiẍavá.
18 Rajna Betania vehe chiaon Jerusalén, inchin yoto kilómetro co rioho tecaoxin chó rajna mé.
19 Co tsje chojni judío joitsjehe jehe Marta co María para joantsjehe na joachjaon ansén cayoi nc̈hí mé de ixin xanchó nc̈ha que ndavenhe.
20 Are Marta conohe que Jesús ojoiji nttiha, jehe Marta vac̈hjexin de nchia co joichoenxin Jesús ngatja nttiha, pero María ndavittohe ngaxinhi nchia.
21 Co Marta ndac̈ho ngain Jesús:
―Si soixin rrogarihi nttihi, rroguenha xanchian.
22 Pero janha nona que Dios rrochjá cain tti sanchiehe.
23 Jesús ndac̈ho:
―Xanchó rrocjan xan sechon xan.
24 Marta ndac̈ho ngain Jesús:
―Ján, janha nona que rrocjan xan sechon xan are rroxechon cainxin nindadenhe ngain nchanho are ndatsjexin mundo.
25 Cottimeja Jesús ndac̈ho:
―Janha tti rroxechonxin cainxin chojni, co janha tti danjo iná vida naroaxin. Tti chojni que ditticaon na janha, masqui jehe senhe, pero rrochonda iná vida naroaxin.
26 Co cainxin chojni que ẍa techon co ditticaon na, chojni mé ẍonhi tiempo sinchetján na almé na ixin ochonda na vida mé. ¿Aditticaon jaha jihi?
27 Marta ndac̈ho:
―Ján, janha ditticanho que soixin tti Cristo, tti Xenhe Dios, tti vandac̈ho profeta que sihi ngataha nontte jihi.
Jesús tsjanga ngaca tti veẍavá Lázaro
28 Are Marta joexin ndac̈ho jihi, cottimeja cjoi joigayé María, jehe xanchó, co ndac̈ho Marta jimao ngain María:
―Tti Maestro nttihi jí co dayaha jaha.
29 Are María coinhi jihi, jehe jaicoa vingattjen co cjoi joitsjehe Jesús.
30 Jesús ẍa joigaha rajna rato mé; ixin jehe ẍa vittohe ngain tti lugar vetanxin Marta.
31 Are ni icha vicon na que María jaicoa vingattjen co vac̈hje, tti chojni judío que te nttiha ngain nchiandoha María ixin tedantsjehe na joachjaon ansén, jehe na rroé na María ixin jehe na ẍaxaon na que María sarrocji ngain tti jiẍavá xanchó para rrotsjangaxin nttiha.
32 Cottimeja María, are joiji tti jí Jesús, María vettoxin nttajochjihi ngaca rotté Jesús, co ndac̈ho:
―Si soixin rrogarihi nttihi, xanchian rroguenha xan.
33 Are Jesús vicon que María jitsjanga co cain chojni judío que joicao María tetsjanga na cai, Jesús vechín co anto soji ná joachjaon conohe ngain ansén.
34 Cottimeja Jesús joanchiangui co ndac̈ho:
―¿Ttinó cjoavá ra Lázaro?
Co jehe na ndac̈ho na:
―Ẍacoi soixin, sitsjehe.
35 Co Jesús tsjanga.
36 Cottimeja chojni judío ndac̈ho na:
―Tsjenxin ra, anto joinao xí jihi Lázaro.
37 Pero icanxin de jehe na ndac̈ho na:
―Xí jihi tti chjé jmacon tti xí que vaguiconha, ¿co jai, aẍonhi ná cosa nchao rrojinchehe xa para que Lázaro rroguenha?
Are xechon Lázaro
38 Jesús cjan conohe iná joachjaon anto soji, co jehe conchienhe ngain tti jiẍavá Lázaro ngain ná cueva, co jijé ná ẍo tti dixinxin na.
39 Jesús ndac̈ho:
―Dinttjian ra ẍo.
Marta, nc̈hichó jehe tti ndavenhe, ndac̈ho nc̈ha ngain Jesús:
―Pero puede atto ẍa ixin ochonda nó nchanho que ndavenhe.
40 Pero Jesús ndac̈ho:
―¿Andattjoha que si sitticaon nganji na janha, jaha sicon joachaxín Dios?
41 Cottimeja vinttjian na ẍo mé. Co Jesús tsjehe para ngajni co ndac̈ho:
―Padre soixin, chjaha gracias ixin coinhi tti janha ndac̈hjan.
42 Janha nona que cainxin tiempo ttinhi tti janha ndac̈hjan, pero jai janha rrindac̈hjan jihi para que chojni tehe sicon na que soixin ttinhi tti janha ndac̈hjan nganji, co para que sitticaon na que soixin rroanha na janha.
43 Are joexin ndac̈ho Jesús jihi, jehe ndac̈ho sén:
―¡Lázaro, dac̈hjexin de yá!
44 Co jehe tti ndavenhe mé vac̈hje. Ngoixin cuerpoe jisiandanji ná tira de manta que jic̈hiaxin de rá co de rotté, co ngá con jisia iná manta. Jesús ndac̈ho:
―Tonxindanguehe ra co tanc̈hjanda ra satsji.
Queẍén ẍaxaon na para rrotse na Jesús
(Mt. 26.1‑5; Mr. 14.1‑2; Lc. 22.1‑2)
45 Conixin jihi, tsje chojni judío vitticaon na Jesús, tti nijoicao María co vicon na tti joinchehe Jesús.
46 Pero icanxin de jehe na cjoi na ngain xifariseo joitsjehe na xa co coequín na xa tti joinchehe Jesús.
47 Cottimeja tsje xifariseo, co tsje xidána que vaquetonha ngain icha xidána co cain xí que vechonda joachaxin ngain juzgadoe nihngo ẍatte xa co vinttendac̈ho xa:
―¿Quehe sinttoho na? Xí jihi atto tsje milagro jinchehe xa.
48 Si tsanc̈hjanda na xa jañá, cainxin chojni sitticaon na jehe xa, co tsí autoridad romano co sinchexantte ningoa na icha importante conixin nacioan na.
49 Pero ná de jehe xa, que vinhi Caifás que jehe mé xidána icha importante tiempo mé, jehe mé ndac̈ho ngain xa:
―Jaha ra ẍonhi noha ra,
50 ¿anoaha ra que icha jian para ixin ján na que senhe jeho nacoaxinxon xí para ixin ngoixin nación, que rroxantte ngoixin nación?
51 Pero Caifás ndac̈hoha jihi por ixin jeho, pero ixin jehe vehe xidána icha importante tiempo mé, mexinxin Dios ndac̈ho ngain jehe para que jehe ndac̈ho jañá ixin Jesús ndasenhe para ixin ngoixin nación judía,
52 co jeha para ixin jeho nación mé, cai para ixin cainxin chojni que ditticaon Dios ngoixin mundo sinchesayehe na jeho nacoaxinxon Dios.
53 Co de ngain nchanho mé chojni judío que vechonda joachaxin oẍaxaon na para nasoenxon na Jesús.
54 Mexinxin Jesús ivaẍagoha ni ivacjiha ngayé chojni judío, mexinxin jehe vac̈hjexin de ngain regioen Judea co sacjoi ngain ná lugar chian ngagaha jna, ngain ná rajna que dinhi Efraín. Nttiha vittohe jehe conixin cain tti chojni que vacao.
55 Tsjeha nchanho vitján para tti quiai que dinhi pascua para ixin chojni judío. Co mexinxin tsje chojni ngain tsje rajna sacjoi na para Jerusalén para joicoroa na saho de quiai mé inchin costumbré jehe na.
56 Saho de rroguintteguixinhi na nihngo jehe na cjoé na Jesús, co are ovinttexinhi na nihngo joanchianguihi chó ná na co iná na:
―¿Quehe ẍaxaon ra? ¿Atsí Jesús ngain quiai jihi ani nahi?
57 Xifariseo co cain xidána que vaquetonha ngain icha xidána ocoetonha xa que ixin quexeho chojni nohe quettinó vehe Jesús, que rrondac̈ho chojni mé para que nchao sitse xa Jesús co tsiaxinhi xa.