21
Nukune En Akak Nukune Waxri Kabaykanen Ayge
Is 2.4, 11.6, 65.20; Zak 14.9, 16
1 Ayteke ariwnteke ini nah hiyá nukune en akak nukune waxri. Ini pitatye en akak ini pitatye waxri in kuwis mehwe payak akak parawhokwa.
2 Ayteke nah hiyá nawenéwa paytwempu akiw. Inme paytwempu in barewyewa, ini nukune Jerusalém in Uhokri gihiyegapu giwetrikis. In muhuk inugiktak giwntak Uhokri. In bareswapu ke pahapu tinobe akak gubereswan ahegbet adahan patiptakano gubetki.
3 Ayteke nah timá pahá ikupimnat kaahawnasima pes ayteke ahumwatak Uhokri gepwi. In awna:
―Kuri aytekihan Uhokri kapinwene ay gibetkis hiyeg amadgayapu inin. Ig msekwene gikakkis. Igkisme gihiyegapu. Igme giwohkigakis. Kibeyne, Uhokriwa ay gimunkis kuri.
4 Ig manotigkisnek ariw gikantakkis madikte. Ayge gimun yuma miyaka akiw. Yuma kadniki akiw. Yuma tihaki akiw. Yuma kayahwaki akiw. Mmanawa madikte arikna minikweknene in kuwis mpiye.
5 Ayteke ig Uhokri ku pariye betnene amadga gepwi kiyatyo, ig awna:
―Apim ini nah keh madikte arikna nukunekwiye.
Pisenwa nikwe ig awna ta nuthu. Giwn:
―Tamaknaba inakni nuwnhu amadga kagta. Mmanawa inakni yuwit in inyerwatbaki. Ik adahan hiyeg kamaxwa nipitit mmanawa in ka waditnepyenenma.
6 Ayteke ig awna akiw:
―Madikte pisenwa. Nahnewa akapuska. Nahwata amaksemni. Yuma pahapwinama napitkignama. Yumanawata ewka nuwenhu akiw. Ku pahapwi nuharitpiye kiyesrad ke pahapwi hiyeg arabupyebe unbe, nikwe nah ikí git un ariwntak ini un dehetniki ahawkri ku pariye keh ig aymuhwa numun adahan apanenekwa. He gamnihkanen nah ikí git.
7 Ku ig ka isaksaw arit wapitye gihiyakemni, nikwe ig utí madikte kabaykanek. Apim ini nahme giwohkiga, igme nukamkayh.
8 Henneme hiyeg apisatrupye gikakkis hiyeg kinisekeputnepwi, hiyeg patahwapye, hiyeg umehekeputnepwi, hiyeg kinikwenepwi, hiyeg ihamwigben, hiyeg adohepkenepwi ahehpakti batakkarad, madikte hiyeg wasaymapye, igkis madikte utí giwetrikis abet eggu tiket ahawkri ku pariye wohnenekwa adahan apanenekwa wageska payebitak akak ini pusukumpiye ku pariye bixiwanene arihri.
Innebaki apeynipye miyaka.
Nukune Jerusalém Arakak Adahan Ku Samah Jesus Gihiyegapu Barewye Ta Git Uhokri
1 Kor 3.10; 2 Kor 6.16; Ef 2.20; 1 Ped 2.5
9 Ayteke pahapwi gaytakkis nerras ntewnehkernene gikebyikis ahj ku pariye sumuhnene ntewnehkernene tas kipun akak ini ntewnehkernene amaksemni mbayka, ig danuh nuthu, ig awna:
―Ba ayta. Nah akkite pit ig Muttuhyan gibetki, eg ku pariye wageswepyo gihayo.
10 Ig ner ahj waxe ntipuh ta apitit pahá waxri nopsadnene imuwadnene. Ayteke ig akki nuthu ini paytwempu barewye Jerusalém in muhukempi inugiktak giwntak Uhokri.
11 In amuwe akak Uhokri gamuwyi. In tigigihwe ke tip huwiynanobe kewyo “diyamanti”, in huwewehe ke butteybe.
12 In kiyaraniwnene akak nopsad yar kanenimunisima. Ini yar kadahan madikawku lappot akak pigikna arawna (12) akebyi. Madikawku ahj akak piyana gawnakis (12) gikebyikis igkis tatabirbet ahumwa ini lappot. Mpuse lappot tamak akak giwkis amekene Israel gikamkayupwi madikawkunene gikebyikis akak piyana gawnakis (12).
13 Mpaymeku lappot mpuse niyaranwa. Mpaymeku wahamatak, mpaymekume tiwgiktak, mpaymekume imekaptak, mpaymekume upitkitak.
14 Ini paytwempu niyaranwa bat apitmin madikawku tip akak pikana arawna (12) akebyi. In yar akamaxten. Mpuse tip yar akamaxten tamak akak pahapwi giw gaytakkis ner kene pahapwi muttuhyanbe giwatnipwi madikawkunene gikebyikis akak piyana gawnakis (12).
Nukune Jerusalém Kawih Adahan Kaayhsima Hiyeg
15 Ig ner ahj ku pariye awna nuthu ig sumuh pahat ahehtet kehka karukri wahano. In ahehtet adahan ahehne ini paytwempu akak nilappota akak niyaranwa.
16 Ini paytwempu nihumwan ke bakmunsakibe. Nipugbun tuguh hehpekwiye ku samah niyabwi. Ig ahj aheh ini paytwempu akak gahehten. Nah hiyá ku in paytwempu kanopsimahad. Niyabwi pitana mil kilomet akak pitana sah arawna (2.200). Nipugbun hehpekwiye. Nimuni hehpekwiye. In kawih adahan kaayhsima hiyeg.
17 Ig ahj hawwata aheh niyaranwa akiw. Nipugbun mpana madikwa iwanti akak pitana arawna (32). Ini ahehtet ku kakak wixwiy aheh ay amadga inin, ig ahj aheh akakwata akebyi ini.
Nukune Jerusalém Kaneabewisima
18 Ini paytwempu niyaranwa in kehka akak tip tigigihwapu kewyo “diyamanti”. Madikte ini paytwempu kehka akak karukri wahanoyekata henneme in huwewehe ke butteybe.
19 Niyaranwa akamaxten bareswapu akak tip tigigihwapu.
In pitatye yar akamaxten bareswapu akak tip huwiynepyo kewyo “diyamanti”.
Apek yar akamaxten bareswapu akak tip inamyanpityo kewyo “safira”.
Amamnabun bareswapu akak tip bukibkipityo akak kuwikwiye akak duruweh in kewyo “kalsedonya”.
Apaxkabun bareswapu akak tip ayeweyo ke butteybe kewyo “esmerawda”.
20 Apahwokbun bareswapu akak tip duruwnepyo kewyo “sardônyu”.
Apuguhkubun bareswapu akak tip duruweh kewyo “sárdyu”.
Pahakme kehpiye ntewnehkerbo in bareswapu akak tip bukibkipityo akak kuwikwiye akak ayeweye in kewyo “kirisólitu”.
Pahakme kehpiye ntewnehkerbo akak pahak arawna in bareswapu akak tip ayeweptiyo kewyo “berilu”.
Pahakme kehpiye ntewnehkerbo akak pikana arawna in bareswapu akak tip kuwikwipityo kewyo “topázyu”.
Pahakme kehpiye madikawkubu in bareswapu akak tip inamyanpityo kewyo “kirisóprasu”.
Pahakme kehpiye madikawkubu akak pahak arawna (11) in bareswapu akak tip ayeweptiyo kewyo “jasintu”.
Pahakme kehpiye madikawkubu akak pikana arawna in bareswapu akak tip waspityo kewyo “ametista”.
21 Mpuse ini lappot madikawkunene akebyi akak pigikna arawna (12) in pahow akabdat bukabkahwapu nopsad. Ayge pahatra ahin apuriw ini paytwempu. In kehka akak karukri wahanoyekata henneme in hawwata huwiye ke butteybe.
22 Nah ka hiyá ayge pahawonama payt kewye Uhokri Gipin ayge apit ini paytwempu. Mmanawa Ukiparawiy Uhokri detye gikak ner kene pahapwi muttuhyanbe igkis muwwapu ayge, igkis kiyathaka muwwapu. Nikwe ini paytwempu in pahate Uhokri Gipin.
Nukune Jerusalém Kabutenne Akak Uhokri Gamuwyi
23 Hawwata akiw ini paytwempu ka muwaka kamuw kawnata muwaka kayg adahan kabutnihne ayge mmanawa igwa Uhokriwa gamuwyi uguhne ini paytwempu. Hawwata ig ner kene muttuhyanbe ig abukri adahan ini paytwempu.
24 Nah hiyá gaytakkis madikte hiyegipiyenepwi igkis wewnekwiye abet nibutni. Nah hiyá madikte ikiparat amadgayapu inin igkis ewknes igiska ta nipitit.
Ku Pahapwi Parekkere Atere, Hiyawa Ig Parak
25 Ini paytwempu nilappota woknenekwa mataytak. Nikwe in ka sabukti mmanawa yuma tiyegimka ayge. Ku pahapwi parekkere atere, hiyawa ig parak.
26 Madikte hiyegipiyenepwi ewknek igiska akak kabayka atere.
Patahwapye Ka Parak Atere
1 Kor 6.9; Gál 5.21; Ef 5.5; Apok 21.8, 22.15
27 Henneme yuma ariknawnama patehwepye ik adahan parak atere. Yuma pahapwinama ku pariye keh mbayka ik adahan parak atere. Iné yuma pahapwinama wasaympiye kawnata ik adahan parak atere. Ignekisnewa ku pariye kadahanyepwi giw tamak amadga ner kene muttuhyanbe gikagtan ku pariye keh wis aymuhwa gimun Uhokri ignesnewa ik adahan igkis parak atere.