6
Kagta Tegegbihka Akki Ku Pariye Nemnikumpiye Aysawnemenek
1 Ayteke nah sarayh nupegyi, nah hiyá ner ku pariye kene pahapwi muttuhyanbe ig hakuhe pahak makakasaki. Ayge nah timá pahapwi gaytakkis nerras paxniknene hiyeg dehetniyepwi ig awna akak gihawna ke diridriyebe. Giwn:
―Ba ayta.
Kaway Seyne Arakak Gidahan Pahapwi Nemnikumpiye Ku Pariye Ikawpari Ku Ignewa Cristo
2 Tess 2.3; 1 Jo 2.18; Apok 13.1, 17.7
2 Nah sarayh nupegyi, nah hiyá ayge pahapwi kaway seyne. Pahapwi hiyeg bat ayge giduhyamadga kaway. Ig hiyuw akak gimedra. Ig ikaka git gisuwpren adahan arekhetni ku samah ig matekepye madikte hiyeg. Ig atak muwwapu adahan ig mategbetepye hiyeg gihawkankis. Ayge ig matekeprikis.
Kaway Duruweh Arakak Adahan Kerka Nemnikumpiye
3 Ayteke ig kene pahapwi muttuhyanbe ig hakuhe apek makakasaki. Ayge nah timá apeynipye hiyeg dehetniye awna. Giwn:
―Ba ayta.
4 Ayteke nikwe pahapwiwa kaway pes akiw. Ig hawwata atak muwwapu. Ig duruweh. Pahapwi hiyeg bat ayge giduhyamadga kaway. Ig ikaka git gidatni adahan ig pisenwepye akak pasamraki amadgatak inin. Ig ner keh hiyeg umehegbet pawtak. Ig ikaka git pahamku giponyaga nopsadnano.
Kaway Puhiye Arakak Adahan Mihetniki Nemnikumpiye
5 Ayteke ig kene pahapwi muttuhyanbe ig hakuhe amamnabun makakasaki. Ayge nah timá amamnampiye hiyeg dehetniye awna. Giwn:
―Ba ayta.
Nah sarayh nupegyi, nah hiyá ayge pahapwi kaway puhiye. Pahapwi hiyeg bat ayge giduhyamadga kaway. Ig kahentenwok akak balans.
6 Ayteke nah timá pahá ikupimnat. Ke nuthube in pes gibettakkis nerras paxniknene hiyeg dehetniyepwi. In awna:
―Pahowwa ahehtet fahhin adahan pahay hawkri annipwit atiwni. Hawwata mpanmowa ahehtet kuwak adahan pahay hawkri annipwit atiwni. Henneme diluy akak win adukwenewa atiwni.
Kaway Wasewnepye Arakak Adahan Miyaka Nemnikumpiye
7 Ayteke ig kene pahapwi muttuhyanbe ig hakuhe apaxnikan makakasaki. Ayge nah timá apaxnikapye hiyeg dehetniye awna. Giwn:
―Ba ayta.
8 Nah sarayh nupegyi, nah hiyá ayge pahapwi kaway wasewnepye. Pahapwi hiyeg bat ayge giduhyamadga kaway. Ig kewye “Miyaka”. Pahapwi makeke gihapu butte. Ignebaki arakak adahan miyarapye giwetrikis. Ikaka gitkis gawaygyikis adahan igkis umahkisnes abusku hawkri ntusi hiyeg akak kerka, akak matipwa, akak karayt, akak axtig.
Uhokri Gihiyegapu Umehpikanek Gipatra Uhokri
9 Ayteke ig kene pahapwi muttuhyanbe ig hakuhe apahokni makakasaki. Ayge nah hiyá pahá kakanhewket. Ayge apetun ini kakanhewket nah hiyá hiyeg ku pariye umehpika apatra ku samah igkis ekkenes Uhokri giwn, apatra ku samah igkis kabipwiyes adahan igkis kinetihwa gimin Kiyapwiye Jesus.
10 Igkis hiyeg awna ta git Uhokri akak madikte giwakemnikis. Giwnkis:
―Kiyapwiye, pisnewa igyerwa Ukipara. Pisnewa barewpitye. Aysaw ayipwi adahan pis diyuhkis umighu ta gitkis nerras hiyeg amedgenepwi hawkri ku pariye wowmeptenpu?
Hennewatbaki igkis hiyeg awna.
11 Ayteke mpuse ikaka gitkis gisimsakis seyne. Ayteke pahapwi kaytwa giwnkis:
―Kiyaknihwanabay adahan aynessa hawkri akiw adahan ku aysaw yikebyi gibukpig Uhokri nawenépwi akiw buttitye akiw igkis umehpikanek hawwata ke yisbe. Mmanawa gihawkanaprikkis kabá danuh adahan igkis hawwata umehpika ku samah Uhokri ikiswanaw gidahankis.
Uhokri Katiwnisanek Gitaraksankis Gitkis Hiyeg Amedgenepwi Inin
12 Ayteke nah hiyá ig kene pahapwi muttuhyanbe ig hakuhe apugmunagbun makakasaki. Aynewa wayk segke akak nihawna. Apim ini kamuw msanpip, in wageswe pohe ke kamisbe kehka akak sak puhiye. Kayg wageswe duruweh ke migatbe.
13 Madikte warukma amadga en tuguhe ta waygboit ke ah ariwbe amayuy sessehpika apit mayg kihhawniye.
14 En mehwe ke wotbe in minaminepka ke kagtabe tagegbihkabe. Madikte waxri imuwadnene akak madikte kewgihri in higihwe adukwantak.
15 Apim ini madikte ikiparat amedgenepwi inin gikakkis madikte kumadukanepwi, madikte suwtat gikiparakis, madikte hiyeg igisapye, madikte hiyeg detyepwi, madikte nawenépwi hiyeg ku pariye bukitwiyepwi, gikakkis hiyeg ku pariye kane bukitwiyepwima igkis madikte ayemwe agiku nopsad miyokbetapye. Hawwata igkis ayemwe ta anapit tip ayhté apit waxri imuwadnene.