8
Si Jesus neng Metaas na Pariꞌ et Bagung Pinegsulutan
1 Na itueng pesalan pasal et dameng pegsugiren, kityu maya metaas naꞌ pariꞌ, na megearung dut tampaꞌ kewanan et melangkew na erungan et Empuꞌ banar dut Langit.
2 Bekeꞌ si Jesus pegkeradya dut tantung lelegdengan et Empuꞌ dut langit na diki binwat et taaw, segwaꞌ atin binwat et Begerar.
3 Sukuꞌ et mengeꞌ piniliꞌ naꞌ mengeꞌ metaas naꞌ pariꞌ na isimayaꞌ et bebgey bekeꞌ kesimeyaan dut Empuꞌ. Angkansa si Jesus, kityung metaas na pariꞌ, keilangan gasi na maya atin neng simayaꞌ.
4 Baꞌ ya atuʼt lugtaꞌ diki ne ya megmendyaring metaas naꞌ pariꞌ, sabab peraran ne lagiꞌ maya ne mengeꞌ pariꞌ pemenggey et mengeꞌ simayaꞌ kuyun dut pegsugiren et lelaging Keseraan.
5 Megsukuꞌ dye dut benwa et Empuꞌ neng Tabernakulo. Na atin bilang upama lang na mantang dut langit etawa eninu et atin. Sabab ganang ipetiyeg ne i Moises ating benwa et Empuꞌ neng Tabernakulo, meget neng pemilin et Empuꞌ kenye, na kwantin pemilin ye, “Buwataꞌ ginsan neng ginis samat ginsaʼt inupama ku rimu dut bukid.”
6 Segwaꞌ pegsukuꞌ neng tinerima i Jesus lebing metaas dut pinesukuꞌ et mengeꞌ unang pariꞌ, sabab ya megpetetngaꞌ et sembatung pinegsulutan na lebing menunga bekeꞌ pesesendig itue et lebing mergaꞌ neng netangeꞌ et Empuꞌ.
7 Baꞌ kaya ne teyen kekurangan ating unang pinegsulutan, diki ne teyen mengeilangan et pengerwa.
8 Segwaꞌ nebiriꞌ et Empuꞌ pasal kekurangang et kenyeng bangsa, angkansa sinugid ye,
“Dumateng eldew naꞌ akuꞌ memuwat et bagung pinegsulutan, dut Bangsa et Israel bekeꞌ dut pengkatan et Juda.
9 Itueng Bagung Pinegsulutan na diki samat pekikipegsulut ku dut kedyeng mengeꞌ kegunggurangan,
naꞌ asal nekeuna tiꞌ dinundun ku dye peliwan dut bangsa et Egipto.
Segwaꞌ diki dye mebentel pasal et pekikipegsulut daken, angkansa pinesaran ku dye.
10 Itue e buwaten ku neng ipegsulut ku dut Bangsa et Israel, pegdateng et ating mengeꞌ eldew, kwan et Empuꞌ:
Iluwak ku dut kedyeng pikiran daken neng mengeꞌ saraꞌ bekeꞌ iukir ku dut kedyeng mengeꞌ pusuꞌ.
Aku lang kedyeng Empuꞌ bekeꞌ dye mendyaring mengeꞌ taaw ku ne.
11 Misan diki ne itulduꞌ et sinu-sinu dut kenyeng sebayaꞌ etawa diki ne isugid dut kenyeng tipused,
‘Kilelanaꞌ ating Empuꞌ banar,’ sabab aku mekilala et ginsan, misan mengeꞌ simpir sampay mengeꞌ taaw derekeraꞌ.
12 Maapen ku kedyeng keselaan, bekeꞌ lipatan ku ne kedyeng kereatan.”
13 Ganang sugiren et Empuꞌ na pasal et pinegsulutan na “Bagu”, bineruba ye ne ating lelagi. Ating neberuba naꞌ ating lelagi ne mekabiꞌ neng mepapas.