7
Stivin sel kat hetetamen keil onen Siu keil
1 Evus, asuv houlu onen pris keil vis Stivin vit, “?Mukave? ?Selusien keil ekek vi anatin?”
2 Stivin vit kesi vit, “!Tata keil ka tuak keil, mihetaengon inau! En avong mulamu, navong avu orer Ebraham rorotei veah en out Heran, Ahi ten hetetamenien mai kistal mini en kantri ten out Mesopotemia.
3 Ka Ahi selus mini vit, ‘Kimea ran kantri onom ka ran koakeil ten vatiamal onom, ka kiha en out tai koa inau nitie minuk.’ Senesis 12:1
4 Sakini, avu Ebraham lokovein atan onen me-Kaltia keil, ka va ro vesesal en taon ten out Heran. Ka katau en matien onen tata onen, Ahi sila emai en kantri koanik koa kami, Siu keil, miro ien kosa.
5 Ka Ahi rosantei atan enek mini. Anatin, Ahi rosan etai atan mini vahi osen kati. Ka Ahi vat kati keke hesani min vatiamal keil onen koa, hekatau, imai ikistal eni keke hehi ose kati. Ahi mumon hatkatien enek min Ebraham, avaseini natnali tovuol veah.
6 “Koanik vi asa koa Ahi viteni mini vit, ‘Vatiamal keil onom iha ito en atan osen meatin keil ten kantri sav tai. Keil ihi slev onen meatin keil ten out enek koa isak purun keil sua hehi handred ehat (400).
7 Hekatau eni, inau nilei rahit usite onen koakeil amum min keil ka nisan mahien min keil. Hevus, vatiamal onom imea ran out enek ka imai ris ekok keke iha netan minau.’ Senesis 15:13-14
8 Evus, Ahi san sakien ten vekahoi min Ebraham vatie lati keke kei ral min vatiamal keil onen avi meatin onen Ahi keil. Sakini, navong Aesak avasi ka avong onen outel (8) kati, Ebraham sakini va en vekahoi. Ka Aesak emun sakin Siekob va en vekahoi, ka Siekob sakin natnali teindan elu (12) uva en vekahoi. Koakeil ekek avi avu orer.
9 “Natnali Siekob keil avi elu kat Siosep koa vi tue. Sakini, keil asalem eni va vahi slev tai en kantri ten out Isip. Ka Ahi ro veni,
10 ka ring koe moulien onen en sakvisien keil koa visu eni. Ka navong Siosep mai mulomal en meten asuv houlu ten out Isip, Ahi san meteisauen mini ka mumon asuv houlu enek si houlu veni ka kei mumon Siosep mai vi avat valosil kat kantri onen ka valosil kat eim onen emun.
11 Evus, avong tai ten amai karahit out vasi en kantri keilu ten out Isip ka Kenan, ka sakin meatin vasi keil teni alonge tisa houlu. Avu orer keil emun asakras avahotin anien.
12 Ka navong Siekob longe keke anien mul en kantri ten out Isip, sila natnali keil uva koa avi avu keil orer. Koanek vi ualien rohtoh one uva en out Isip.
13 Evus, keil uva ris avong tamun. Ka en avong enek, Siosep vothot en kei min tunali keil, ka asuv houlu ten out Isip lei kilea vatiamal keil onen Siosep.
14 Sakini, Siosep sisil en tata onen, koa Siekob, ral min vatiamal onen vasi keil koa avi hanumau etel ka teindan elim emun (75) keke imai ito hetal mini en out Isip.
15 Ven koanik, Siekob va en out Isip ka ro ien va vio … mat, kei ka vati avu keil vasi orer.
16 Ka navong umat, avous retai en teiai keil one va en out Sekem, ka arahin keil en out tatetahinien koa Ebraham vuli ran vatiamal onen Hamor ral min hati mani tai.
17 “Sua houlu mai muli, ka Siu keil koa aro en out Isip umai avi houlu. Ka Ahi lesi keke avong mal vinvin keke hatkatien koa mumoni ral min Ebraham vesesal vakistal vamai vahi anatin.
18 En avong enek, asuv houlu tamun koa rokileatei Siosep ka asa koa mumoni emai losil kat kantri ten out Isip.
19 Kei mumoni tisa min Siu keil koa avi avu orer keil ka purun keil. Mumoni keih min keil keke ilokovein tivava hau keil one il hae keke imatmat.
20 Mosis, avasi en avong enek varei. Ka kei vi more tivava tai en meten Ahi. Tata ka mama onen lulei kat revi en out teim avati etel (3).
21 Ka navong keilu lulingi hae, natnahin asuv houlu ten out Isip votini ka lei kat revi Mosis suval vi natnali kati.
22 Sakini, aviseini en ileilien vasi keil ten out Isip. Ka kei mai vi hetetamen tai en usite ten selusien ka umen onen.
23 “Navong sua onen hanumau elu (40), Mosis mumon rendemien onen keke vailea revi mok meatin kati keil onen, me-Isrel keil, sakini va sao en keil.
24 Ka avong les meatin tai ten out Isip mul mu purun koan Isrel tai, Mosis va katauni. Sakini, kei sa kesi min koan Isip enek ka mu vini.
25 Kei mundemi keke me-Isrel keil koa avi vatiamal kati onen ilei kilea keke Ahi mul mutut keil ka en hen, ka keil arlei kileatei.
26 “En avong sav teni, Mosis les me-Isrel elu lumul lumutit. Sakini, eva keke valing ris tomat ven keilu ka viteni min keilu vit, ‘!Ei, kamil, milhetaengon inau! Kamil vasi milvi koan Isrel. ?Sakini, milmul milmutit vensa?’
27 “Ka meatin koa mul mu purun tunali muting lat Mosis va rani ka visi keih vit, ‘?Isei linguk kovamai kovahi avat keke kovalei rahit usite onomal?
28 ?Em vati kovou vini inau mun vasuval koa komu vini koan Isip nenganeh?’
29 Navong Mosis longe mukok, metau houlu ka lohosai ran out Isip ka va soutin, ro en atan onen me-Mid keil. En out enek, kur ahin tai, ka natealu elu.
30 “Evus, sua hanumau elu (40) emun muli va, ka Mosis mul en out volvol, vesesal ven Vatihou Senae. En out enek, angelo tai kistal mini suval ahang koa mukan en holeai tai.
31 Navong Mosis lesi, musil vareis ka mulis va vesesal keke valei revi. Ka navong mai vesesal, long ren Ahi Asuv koa viteni mini vit,
32 ‘Inau navi Ahi onen avu onom keil: onen Ebraham, onen Aesak ka onen Siekob.’ Eksodas 3:6 Navong longe mukok, Mosis maleilei houlu ka metau keke valesi.
33 Ka Ahi Asuv viteni mini vit, ‘Sil lat sandel onom, veni out koa komul komulomal eni vi out votut.
34 Inau nales mahien vasi keil koa meatin keil onak amul akuri en out Isip, ka nalong isien one. Sakini, namita keke moutut moulien one. Amai, inau nisilak kiha ris en out Isip.’ Eksodas 3:5,7-8,10
35 “Vi Mosis koanek koa me-Isrel keil aseseini navong keil avisi avit, ‘?Isei linguk kovamai kovahi avat keke kovalei rahit usite onomai?’ Eksodas 2:14 Ka angelo koa kistal mini en ahang koa mukan en holeai viteni vit Ahi mul sila Mosis keke heha helei kat revi me-Isrel keil ka houmon keil imaluv.
36 Navong lah lat keil ran out Isip, Mosis mumon merikel ka marmari sakien keil en out Isip, en Atas Tahilhili, ka en out volvol koa amul ien sua hanumau elu (40).
37 Mosis enetinek selus min me-Isrel keil vit, ‘Ahi hesan provet tai koa heka ran kami etin en vati sakien koa san inau numai.’ Duteronomi 18:15
38 Mosis koanik vi kei koa ro vituai ral min me-Isrel keil navong keil amul en out volvol. Kei ro ral min avu keil orer en avong mulamu, navong angelo tai selus ral mini en Vatihou Senae. Ka kei kur selusien ten moulien ran Ahi ka sani min ir.
39 “Ka avu keil orer er rovattei avalong kat selusien onen Mosis. Keil aseseini ka amumon rendemien one avit ihiles iha ris en out Isip.
40 Sakini, aviteni min Eron avit, ‘Umon ahi sav keil vahi onomai keke avalamun ir, veni mereingeingen asa koa kula Mosis koa lah lat ir ran out Isip.’ Eksodas 32:1,23
41 Sakini, en avong enek, keil amumon nana tai koa kur suvalien ten buluk. Evus, keil uva netan mini ka amuas tirendan tai vi sanien votut one va mini. Evus, keil amumon mari anien tai ka akanian ven nana koa amumoni ral min he enges.
42 Sakini, Ahi viles eisilin ran keil ka maen keil uva netan min hitu keil. Koanik suval asa koa Ahi viteni en tisien tai onen provet keil vit,
‘Me-Isrel keil, navong mimul en out volvol sua hanumau elu (40),
mirmuas etai tirendan vahi sanien votut onami minau.
43 Ka mimea, milah eim tavolin onen ahi Molek,
ka milah kat ahi Revan koa kur suvalien ten hitu keil.
Kami mimumon nana keilu ekek keke mivaha netan min keilu.
Sakini, nisila lat kami miheha mihehi slev keil en out keil koa hehi soutin imok helin kantri ten out Babilon.’ ” Amos 5:25-27
44 Stivin selus eris min keil vit, “Avu orer keil uva netan min Ahi en eim tavolin navong keil amul veah en out volvol. Eim tavolin enek, amumoni musil asa koa Ahi viteni ka rie lati min Mosis.
45 Katau suk, meatin keil enek asani min avu orer keil, ka keil avous eim tavolin enek navong amusil Sosua avaha avakulat atan ran meatin keil koa Ahi likat rasilin keil. Eim tavolin enek mules en out enek rokol avong koa Deved mai vi asuv houlu.
46 Ahi si ven Deved koa visi keke vamaeni vati eim tetahos tai koa kilea vahi onen Ahi, kei koa vi Ahi onen Siekob. Ka Ahi romaentei.
47 Ka vi Solomon esuk koa muti eim onen.
48 Ka Ahi ten out nesa sakras vato en eim koa meatin enges mumoni. Koanek suval asa koa Ahi viteni ka en provet Aesea vit,
49 ‘Out nesa vi out koa namul narondan eni keke malosil kat tounah keil vasi,
ka out netan vi out enges koa namul naling alok ien.
?Vati eim sa koa mikilea mivoumoni vahi onak?
Misakras mivoumon etai eim koa vinvin venau keke mamai maseh eni.
50 Tounah vasi koa mul en out nesa ka en out netan,
inau enges namumoni.’ ” Aesea 66:1-2
51 Evus, Stivin selus keih min hetetamen onen Siu keil vit, “!Vatumi keih vareis, ka ralingomi vonhon en selusien onen Ahi! !Lisenges, tounah koa mimumoni suval koakeil areingeingen Ahi varei! !Kami misuval avu onami keil etin koa, lisenges, asesein tounah koa Ninin Votut mul mumoni!
52 Veni avu onami keil asak purun provet vasi keil. Mulamu, keil amu vini koakeil enek koa avit luvat amaien onen Meatin ten Maluen koa Ahi rie lati keke hemai. Ka kosa, vi kami varei koa mimae lati va en hen vativieh keil onen ka mikeih kat keil amu vini. Sakini, ran mul en hemi.
53 Vi kami varei koa mikur mengkatien keil onen Ahi koa angelo keil asani min avu onami keil. !Ka avaseini, kami mirlong kattei!”
Siu keil akov vini Stivin
54 Navong hetetamen keil ten kaonsel onen Siu keil along selusien onen Stivin, tine tisa houlu ka mete vilhili kati.
55 Ka keihoen onen Ninin Votut mai vilelau en Stivin, ka seipat lele vina en out nesa. Navong lele vina nesa, les muohien ten hetetamenien onen Ahi ka les Iesu mul mulomal en usite matu onen.
56 Sakini, kei viteni vit, “?Milesi? !Namul nales teilang maseh ka Natin Meatin mul mulomal en usite matu onen Ahi!”
57 Navong hetetamen keil ten kaonsel alonge mukok, asising koe ralinge, aviso keih, ka keil vasi amuloh avuli kati.
58 Evus, avousi va hae ran taon ka koakeil aselus va kati en kaonsel umai keke avov rohtoh eni ka aling kot keil ome en hen meatin hau tai, isen Sol. Evus, keil ka meatin sav keil emun akove.
59 Ka navong amul akov Stivin, kei viso vit, “Asuv Iesu, kikur revi ninin onak hehat venuk.”
60 Evus, Stivin retengeiril vita netan ka viso keih vit, “!Ahi Asuv, konaleletei natisa kat meatin keil ekek ven tisaen koanek koa amul amumoni!” Stivin viteni mukok, ka mat.