6
Selkatien tai min titiali keil ral min tata ka mama one keil
1 Kami, titiali keil koa mikapil vituai ral min Asuv, mihelong kat tata ka mama onami keil veni koanek mal.
2 Koanik vi mengkatien koa Ahi sani navong vit, “Mihehouhou min tata ka mama onami keil.” Eksodas 20:12 En mengkatien keil, koanik varei Ahi san rohtoh eni ral min hatkatien tai vit,
3 “Hesakini, kami miheles tahosien ka moulien onami hetaveah en out netan.” Eksodas 20:12
4 Ka kami, tata keil, minoumontei nakeih ramat min titiali keil onami keke anavuroh kattei kami. Ka mihisein revi keil keke ilea tounah keil onen Asuv Iesu ka mukave akilea avalekat revi sakien keil one.
Selkatien min slev keil ral min masta keil one
5 Kami, slev keil, mihelong kat masta keil onami en out netan ekek en mari houhouen, ka mihoum min keil hetal min more rendemien. Mihelong kat keil en vati sakien koa mimul milong kat Iesu Kristo eni.
6 Minalong katteis keil navong amul ales kami keke avasi keil ven kami. Ka hetahos imok mihelong kat keil veni mivi slev keil onen Kristo, ka misi kami keke mivoumon asa koa Ahi en vat kami mivoumoni.
7 Anatin, mihoum ven masta keil onami hesuval koa mimul mimum min Asuv Iesu, ka rovitei meatin keil enges.
8 Mihoumoni hetahos hemukonek veni rokilea keke Asuv Iesu hesan retai en heite ten umen orer housil asa koa romumoni, avaseini munak rovi slev keil vuo romaluv enges.
9 Ka en vati sakien enek, kami, masta keil, mihoumoni hetahos min slev keil onami. Minasontei selusien takeih naha min keil minahit mihesan mahien min keil munak armumtei vousil rendemien onami. Mihendem kati keke Masta one koa ro en out nesa vi Masta onami emun. Ka navong helei rahit usite onami vasi, herles etai meatin hemariso mok helin teisav. Houmoni hevinvin en keil vasi.
Selkatien min Kristin keil keke ilomal hekeih en demkatien one
10 Keke maselus ekor min kami, ek vati masel kat kami keke mihelomal hekeih en demkatien onami. Keihoen onami mul ka ven Asuv Iesu varei veni mimul mikapil vituai ral mini.
11 Mihesak mesein kami ven vaeen ten demkatien suval meatin tavaeen tai mul sak mesein kei. Anatin, mihesin en kami en eisin keil ten vaeen koa Ahi mul sani min kami keke kami mikilea mivalomal vakeih navong Temat mai vasak visi valuvos kami mivamot.
12 Veni, en vaeen ten demkatien koa romul ien, vativieh keil orer rorvitei meatin keil ten out netan ekek. Vuo, vativieh keil orer avi Temat ka ninin tisa keil onen koa amul amuka en teilang. Keil akur keihoen en out netan ekek ka amul asak visi keke avoumon meatin keil avamot en tisaen ka vasakin rendemien one vamai vamalikelik.
13 Sakini, mihesin revi en eisin vasi keil ten vaeen koa Ahi sani. Hesakini, mikilea mivalomal vakeih en avong vasi koa Temat ka ninin tisa keil onen asak visi avamai ka avapurun kami. Ka navong kami mihevae hetal min keil heha vio … hevus, mihelesi keke mimul veah mimulomal keih.
14 Sakini, mihesak mesein revi kami hetal min eisin tavaeen koa Ahi mul sani. Miheilea revi anatinien onen Ahi koa kami mikuri tuai. Anatinien koanik hesuval atoh koa mimutoh kat revi kami eni. Mihendesini keke Ahi sakin kami mimal en meten, veni hemukonek, maluen onen heting koe moulien onami. Maluen ekek hemai hesuval eisin keil takeih koa amul aring koe veimasomi.
15 Miheling demkatien onami en more longlongien koa mul sakin kami miro en tomat ral min Ahi. Hemukonek, mihelomal hekeih tamun en demkatien onami. More longlongien koanik hemai hesuval but takeih koa hesak mesein kami mihelomal hekeih ka mihermottei.
16 En avong vasi, mihoumon demkatien onami en Iesu Kristo hekeih tamun. Demkatien koanik hemai hesuval ai tatosuaien tai koa heting koe kami ran atuv vasi keil ten rendemien tatisa keil onen Temat keke anamaitei en moulien onami.
17 Miheilea revi keke Ahi mutut moulien onami tuai. Sakini, Temat sakras vasakin rendemien onami vamot. Ileilien koanik heting koe rendemien onami hesuval eisin takeih tai koa mul koe vatumi. Miheilea revi selusien onen Ahi koa Ninin Votut mul sani min kami keke mikilea mivahitehiteni lisenges. Selusien onen Ahi enek hemai hesuval naef tavaeen onami.
18 Ka navong mimusin mukok, lisenges, mihehis min Ahi housil asa koa Ninin Votut mul rie lati min kami. Ka mihehis emun keke Ahi hesan kataunien min kami. Ka navong mivis, avemi namahtei, ka minalokoveintei hisien keil onami ven meatin savsav keil onen Ahi.
19 Mihehis venau emun keke nakilea maselus revi selusien sa koa Ahi hesani minau. Ek vati mahit kilea aneite ten lingkatien suai ten more longlongien onen ka nirmetautei.
20 Veni, navi eiloheh tai keke mahitehiten more longlongien enek, ka, ven koanek, apar kat inau ral min sen keil takeih. Mihehis venau keke nakilea mahit leini vasuval koa mal moumoni, ka nirmetautei.
Selusien ekor
21 Keke miheilea revi asa koa mul kistal enau ka tounah keil koa namul namumoni, namul nasila Taetikas vat ven kami keke vahit meseini min kami. Kei vi more tuak tai ka musil revi Asuv Iesu.
22 Anatin, namul nasila vat ven kami keke miheilea revi usite onomai, ka keke mihehati lat rendemien onami.
23 Navis keke tomat onen Ahi hel ven tuak vasi keil ten demkatien keisom. Ka navis keke Ahi houmon envatien onami hemariso mok, ka demkatien onami en Iesu Kristo hemai hekeih tamun.
24 Navis keke Ahi hetie lat more envatien onen min kami vasi koa mimul mirie lati keke tounah tovuol kilea vahiles envatien onami en Iesu Kristo, Asuv orer.