34
Ahi san ris mengkatien halualim onen min me-Isrel keil
Eksodas 34:1-2,4-10,28-35
1 Iahova viteni min Mosis vit, “Kumon ahat elu hesuval koa namumoni mulamu, ka inau nitis ris selusien keil koa namutisi mul en ahat keilu mulamu, koa keik kokopahas keilu.
2 Kisak mesein tounah keil, ka visuvong, en visokon, kima nesa en Vatihou Senae. En out enek, kilomal en metok.”
4 Sakini, Mosis ra lat ris ahat elu mun koa mahinhin tatisien. Out mulan, vus keilu vina nesa en Vatihou Senae, suval koa Ahi meng kati.
5 Evus, Iahova mita netan en mahmah tai ka mulomal vesesal ven Mosis ka vothot en isen votut vit, “Inau Iahova.”
6 Evus, Iahova ka pas Mosis ka vitehiteni vit,
“Inau navi Iahova, kei koa NAVI.
Ahi tai koa enmahisien ka more envatien mul ien.
Ahi tai koa tin taveah ka tinahos mul ien.
Ahi tai koa mum vasin hatkatien keil onen.
7 Anatin, nihuli kat hatkatien onak hetal min meatin keil ka titae keil heha vio … keite teni hetovuol.
Koakeil asak kalkali, arali koteh mengkatien keil onak, ka amumon tisaen keil,
inau nakilea nitie envatien onak min keil ka numon methos en keil.
Ka mukos, nisan mahien min keil enek ven tisaen keil amumoni,
ka mahien teni heat keil eris, hetal min titae keil one emun hetokol havine keil.”
8 Hatte tas, Mosis vita netan mini ka malingling, nan rokol atan
9 ka viteni mini vit, “Iahova, munak kolele tahos enau, napeahik kusil komai. Anatin keke meatin keil ekek, vate keih ramat, ka kisan methos onom eli min komai ka konaleletei natisa mun ven sakkalkalien keil onomai. Kikur vilei komai li mehemai mehehi meatin keil onom.”
10 Iahova vit risi min Mosis vit, “Kosa, numon hatkatien takeih tai hetal min me-Isrel keil. En mete, numon marmari tounah keil heteisav en asa koa mul kistal en kantri sav keil. Meatin vasi keil en out netan iles marmari tounah keil koa inau, Iahova, nakilea moumoni. Keil itimanin ven numon sakien keil ikistal en kami koa hemarite vis hemarite mok.”
28 Mosis ro en out enek ral min Iahova avong hanumau elu (40). Ka meneai ka vongien, rokaniantei ka romun etai tounah. Mul rei selusien ten hatkatien onen Ahi en ahat elu, koanek Mengkatien Halualim.
29 Navong Mosis muris mita netan en Vatihou Senae, vus Mengkatien Halualim ral mini. Navong mita ven meatin keil, kei reingeingeni keke nan vihil veni kei selus ral min Iahova.
30 Ka navong Eron ka meatin sav keil alesi mukok, ametau ka arvatei vesesal veni.
31 Ka navong Mosis vise ruain meatin keil, Eron ral min metai keil ten vatiamal keil umai veni, ka Mosis selus min keil.
32 Navong selus min keil evus, me-Isrel vasi keil emun umai vesesal veni, ka Mosis sani min keil mengkatien keil koa Ahi sani mini en Vatihou Senae.
33 Navong Mosis selus evus, kav koe veinan en kaliko koa kei kilea valei retal eni.
34 Ka en avong vasi koa Mosis vaha en Eim Tahisuen keke vaselus vatal min Iahova, kei kulat kaliko enek. Ka navong kistal eris, mai vitehiten tounah keil koa Ahi meng kati mini vahiteni min meatin keil.
35 Navong meatin keil umai alesi, alesi keke veinan vihil. Selus evus, ling ris kaliko kav koe veinan rokol avong sav koa heha ris heselus hetal min Iahova.