Siona
1
Iahova sila provet Siona vaha vasel kat meatin keil ten out Nineva, ka Siona en rovattei vaha
Siona 1:1-17
1 En atan ten out Isrel, provet tai mul ien, isen Siona, natin Amitai. En avong tai, Iahova san selusien tai mini vit,
2 “Kikalah kiha en mari taon ten out Nineva, ka kisel kat meatin keil koa aro ekonek. Kihiteni min keil keke sakien keil one vilehilu en metok.”
3 Ka Siona, en rovattei vasan selusien onen Iahova min me-Nineva keil koa amul en kantri tai en usite va ist. Sakini, viles, va wes en sise sav keke valohosai rani. Siona va rokol pasis en taon ten out Sopa, ka votin sip tai koa amul asak meseini vaha en out Spen, kantri tai koa mul soutin imok en usite va wes. Sakini, vul sise onen ka vut va en sip ral min boskru keil teni. Evus, sip enek muloh vaha en out Spen ral min Siona koa mul lohosai ran Iahova.
4 Navong sip enek mul muloh eva, Iahova sakin mari eang tai muhuh keih ka atas emun tisa vis tisa, ka sip koanik vesesal vamahoiahoi.
5 Boskru keil ametau houlu, ka retai en keil amis kai va min ahi keil one keke avasan kataunien min keil. Evus, alah lat tounah keil ran valengei sip ka asoni va en atas vasakin sip vamelala.
Avong tounah keil enek mul kur out, Siona mules matil en valengei sip.
6 Ka navong vatihos ten sip va neim, kei votin Siona ka viteni mini vit, “!Ei! ?Vensa komul komatil mukok? !Mea ka kihis min ahi onom ven kataunien! Vahesa kei en hemahis ir ka houtut moulien keil orer.”
7 Evus, boskru keil alah ruai ka aling revi rendemien keke avaleh eis keke avahotin isei en keil mul lehen an tisa mai kat keil. Ka navong amumoni, aleh isen Siona.
8 Sakini avisi avit, “?Ei, hiteni min komai, komumon sa koa sakin an tisa ekek mai muas ir? ?Umen sa varei komumoni? ?Kantri sa varei koka ien ka meatin onom keil avi meatin sa?”
9 Ka Siona vit kesi min keil vit, “Inau navi koan Isrel ka namul nuva netan min Iahova, Ahi ten out nesa koa mumon out netan ka atas emun.”
10 Siona vit lati min keil keke mul lohosai ran Iahova.
Navong boskru keil alonge mukok, ametau houlu ka avul kati avit, “?Vensa varei komumon tisaen enek?”
11 Ka navong alesi keke mari eang koanek muhuh keih imok, avis Siona avit, “?Kihiteni min komai, mehoumon sa vasakin mari eang koanek vaha netan?”
12 Sakini, Siona vit kesi mini keil vit, “Mihou lat inau ka miheson nau niha en atas. En avong koa mihoumoni, atas hemai ris hetahos. Nakilea keke mari eang koanek mul muas kami venau varei.”
13 Ka boskru keil e rovattei avason Siona vaha en atas. Sakini asak visi avahalis en sip enek vaha ut, ka asakras veni tahe keil umai amariso mok ka eang muhuh keih tamun.
14 Sakini apeah Iahova avit, “O Iahova, mevisuk eli keke konasantei mahien min komai ven matien onen meatin koanik. Anatin, konouastei komai li veni keik, Iahova, komumon tounah keil enek mai kistal musil rendemien onom etin.”
15 Evus, avou lat Siona ka asoni va en atas. Hatte tas, atas mai tahos eris.
16 Navong boskru keil enek ales asa koa kur out, keil vasi avouhou min Iahova marite mok. Sakini, keil asan sanien votut keil one mini keke avamasmasi ka retai en keil amumon hatkatien keil one ral mini.
17 Ka Siona romattei. Iahova san mari mesau tai emai remi ka Siona moul mules en vangen mesau enek avong etel.