22
Iesu viten tatavolien usil asuv houlu tai koa sisil en meatin keil keke avamai en mari tetaliheien onen natnali
1 Navong Iesu ro veah en teahu ten Eim Votut, mules ra usil tatavolien keil min meatin keil vit,
2 “Hiasuvien onen Ahi suval asuv houlu tai koa sak mesein mari anien tai ven tetaliheien onen natnali.
3 Kei sila slev keil onen keke avahise koakeil asuv houlu enek sisil en keil tuai keke avamai en anien. Ka meatin keil enek e rovattei avamai.
4 “Sakini, asuv houlu enek sila slev sav keil onen ka viteni min keil vit, ‘Miheha mihehit meseini min koakeil nasisil en keil mihehit: “Milesi, inau nasak mesein anien houlu tuai: amuas buluk keil osak ka titan buluk keil emun koa navengan revi keil ven anien ten kosa. Anatin, tounah vasi ten anien ten tetaliheien mas tuai. Sakini almai.” ’
5 “Ka meatin keil enek e rovattei availea ren ka uva suk en umen one. Tai va en ah sen, ka tamun va voum en sitoa onen.
6 Ka meatin sav keil avuli kat slev keil onen, apurun keil ka amu vini keil.
7 Ka navong asuv houlu enek longe, tin katiat vis katiat. Sakini sila meatin tavaeen keil onen ka amu rasilin koakeil amu vini slev keil onen ka amunit lin taon one.
8 “Evus, asuv houlu enek viteni min slev sav keil onen vit, ‘Anien ten tetaliheien mas tuai, ka koakeil nasisil en keil tuai, moulien one rovinvintei keke avamai avaani.
9 Sakini, miheha en sise keil ten taon ka mihesisil en meatin keil vasi koa mihehotini keke imai ian anien ten tetaliheien koanik.’
10 Sakini uva en sise keil ka avise ruain meatin vasi keil koa avotini, koakeil atahos ka koakeil atisa. Ka eim taanien ten tetaliheien vilelau revi en meatin keil.
11 “Koakeil asisil va ven keil, umai amusin en more eisin keil ten tetaliheien. Ka navong asuv houlu mai neim vales koakeil umai, lesi keke meatin tai romusin entei eisin ten tetaliheien.
12 Sakini asuv houlu mai veni ka visi vit, ‘!Ei tuak! ?Keik kumai neim ekok mukave keke kormusin entei eisin ten tetaliheien?’ Ka meatin enek ro raeng, reingeingen asa vahiteni.
13 “Evus, asuv houlu viles ka meng kat meatin toumien keil onen vit, ‘Mihepar kat hen ka alen, ka mihelisi heha hae en mankoli. En out enek, meatin keil il is ka il ihal lohe ven mahien one.’ ”
14 Ka Iesu selus ekor en tatavolien enek vit, “Anatin, Ahi sisil en meatin houlu avamai veni, ka vahis enges, rie lat keil avato vesesal veni.”
Farasi keil avis Iesu en usite ten takis
15 Navong Farasi keil along tatavolien keil koa Iesu viteni va kat keil, uva ka arun lekat sise keke avakaluvati en selusien onen.
16 Sakini asila tei en meatin one ral min Siu tateisav keil koa asi keil ven losilkatien onen asuv houlu Herod Antipas. Keil umai ven Iesu ka aviteni mini avit, “Tiser, mekilea keke keik kovi vati meatin koa meatin sav keil akilea avaling desien one val enuk. Ka mekilea emun keke komul kovisein meatin keil en sise koa Ahi en vat meatin keil avousili musil anatinien onen. Keik kormundemtei vahi houlu usil hetetamenien onen meatin keil, ka kormaentei rendemien onen meatin keil enges analehtei rendemien onom.
17 Mukonek, kisani min komai rendemien onom en usite koanik. ?Hemal enges keke ir, Siu keil, rehehul takis heha min asuv houlu ten out Rom, vuo romaltei?”
18 Ka Iesu lei kilea rendemien tatisa one ka vit kesi min keil vit, “!Kami mitahos imok en hilivemi enges! ?Vensa misak visi keke mivakaluvat inau?
19 Altie minau mani koa amul avul takis eni.” Navong asani mini
20 vis keil vit, “?Nan isei ke? ?Isen sei mul en mani enek?”
21 Keil avit kesi avit, “Koanek onen Sisa, mari asuv houlu ten out Rom.”
Sakini Iesu viteni min keil vit, “Sakini, mal keke mihesani min Sisa asa koa vi onen, ka mihesani suk min Ahi asa koa vi onen.”
22 Ka navong keil alonge, keil amutimanin en selusien onen Iesu. Evus, alokoveini uva.
Satusi keil avis Iesu usil avong koa meatin keil imoul eris ran matien
23 En avong enesek, Satusi keil, koa avit meatin sakras vamoul eris ran matien, umai ven Iesu ka avisi avit,
24 “Tiser, Mosis mutis mengkatien koanik vit, ‘Munak meatin tai mat ran ahin onen ka titaealu tovuol, tunali suk hetetalihe hetal vatina onen. Hesakini, navong luhekur ehon, ilesi hesuval natin meatin koa mat.’ Duteronomi 25:5
25 Mulamu, time oulu (7) aro ekok ral min komai. Koa moeite retalihe, ka navong mat, titan tovuol. Sakini kei lokovein vatina vatetalihe vatal min tunali.
26 Tounah kistal vatte tas en tunali koa katau. Ka en koa etel en keil emun, vatte tas va vio … sakien enek kistal en koa tasikor en time keil enek.
27 Ka katau en keil vasi, ahin enek emun mat esuk.
28 ?Sakini, navong meatin vasi keil imoul eris ran matien, isei en time oulu (7) enek hekur ahin enek hehi onen veni keil vasi aretalihe ral mini?”
29 Iesu vit kesi min keil vit, “Kami mimul milei ras sise onami veni mirkilea revitei Tus Votut onen Ahi vuo keihoen onen.
30 Ven en avong koa meatin keil imoul eris ran matien, isuval angelo keil en out nesa, tetaliheien hetovuol.
31 ?Ka vensa mirkurtei anatin eni keke meatin keil imoul eris ran matien? ?Mirvulitei asa koa Ahi viteni min kami? Veni kei vit,
32 ‘Inau navi Ahi onen Ebraham, Ahi onen Aesak, ka Ahi onen Siekob.’ Eksodas 3:6 ?Milonge? Kei vi Ahi onen koakeil amoul, rovitei onen koakeil umat.”
33 Ka navong marmari vangi meatin keil alonge, keil amutimanin en hihiseien onen.
Iesu visein meatin keil usil mengkatien koa kave vi hetetamen mok en tateisav keil
34 Navong Farasi keil alonge keke Iesu sakin Satusi keil, ahang one mat, keil alah ruai ka uva ven Iesu.
35 Tai en keil koa vi tiser ten mengkatien onen Mosis, mai ka vit vakaluvat Iesu en selusien onen.
36 Sakini visi vit, “?Tiser, mengkatien koa kave varei keke houlu mok en keil vasi?”
37 Ka Iesu vit kesi mini vit, “ ‘Emi hehat Iahova koa vi Ahi onami en tinomi, en moulien vasi keil onami, ka en rendemien vasi keil onami.’ Duteronomi 6:5
38 Mengkatien koanik vi houlu mok ka mulin keil vasi.
39 Ka tamun suvali koa elu en keil mul vit, ‘Envatien onom hel en meatin sav keil hesuval koa keik em vat keik eris.’ Levitikas 19:18
40 Tounah vasi koa mul en mengkatien onen Mosis ka hihiseien keil onen provet keil mul tuai en mengkatien keilu ekek.”
Iesu vit usil Mesaea koa Ahi rie lati
41 Ka navong Farasi keil aro vituai ral mini, Iesu vis keil vit,
42 “?Kami mimundem sa usil Mesaea? ?Kei hekistal en vatiamal onen sei?”
Keil avit kesi avit, “Hekistal en vatiamal onen asuv houlu Deved telamu.”
43 Iesu viteni min keil vit, “?Munak koanek anatin, vensa varei Ninin onen Ahi san rendemien min Deved keke vahise Mesaea enek en ‘Asuv’? Veni viteni vit,
44 ‘Iahova viteni min Asuv onak vit,
“Kitondan ekok en usivek matu,
hetokol avong niling koakeil avi vativieh ral minuk
iha en hem.” ’ Sam keil 110:1
45 Asuv houlu Deved varei vise Mesaea en ‘Asuv onen.’ ?Ka veni tata tai sakras vahise natnali en ‘asuv,’ Mesaea heka en vatiamal onen Deved hemukave?”
46 Ka meatin keil asakras avahit kesi. Ka en avong enek muli va, meatin keil ametauni keke avahisi en etai mun tounah.