22
Asuv houlu ten out Moab vis Balaam vasesenda en me-Isrel keil
Namba 22:1-8,12-21,28-35,39-41; 23:1-12; 24:10-25
1 Me-Isrel keil uva ka amumon votevav one en aet ten out Moab, en usite ten Oaisal Sodan koa teisav en usite koa taon ten out Seriko mul ien.
2 En avong enek, asuv houlu ten out Moab, isen Balak, natin Sipor, kei longe mukave me-Isrel keil amu lin me-Amor keil ka longe mun keke avi houlu ramat.
3 Sakini kei ka meatin keil onen ametau houlu ven keil.
4 Me-Moab keil aviteni min hetetamen keil onen me-Mid keil avit, “Tali meatin keil ekek, hervitei tuetin, ian vasi tounah koa mul rahit ir, asuval buluk tai koa mul kan vasi oumunai en vieh onen.”
Sakini asuv houlu Balak
5 sila eiloheh keil onen uva avahise Balaam, natnali Beor, koa ro en taon ten out Pethor, vesesal ven Oaisal Upretis en atan ten out Amao. Keil akur selusien onen asuv houlu Balak mai veni koa vit, “Tali meatin keil koa mariso ramat aka en out Isip. Meatin keil teni amul asien vasi out, ka amul asak avalah lat atan oser.
6 Keil avi houlu mok amulin ir. Sakini napeahik eli kovamai kovasesenda en keil en usite onak. Hesakini, ir rokilea rovou lin keil ka rovalikat keil avamea ran atan oser. Namul navisuk veni nakilea keke koakeil koviten tokolkatien va min keil, keil enek akur tokolkatien. Ka koakeil kosesenda en keil, asas koviteni mai kistal vi anatin.”
7 Navong hetetamen keil onen me-Moab keil ka onen me-Mid keil uva ven Balaam, akur uite ten sesendaen ral min selusien onen asuv houlu Balak.
8 Ka Balaam viteni min keil vit, “En vongien kosa, mihetos hetal minau. Ka visuvong, nihiten asa koa Iahova hehiteni minau.” Sakini hetetamen keil enek aros ral min Balaam.
12 En vongien enek, Ahi viteni min Balaam vit, “Konahatei natal meatin keil keisom, ka konoumontei sesendaen min me-Isrel keil, veni tokolkatien onak mul en keil.”
13 Out mulan eris, en visokon, Balaam va ven eiloheh keil onen Balak ka viteni min keil vit, “Alha ris teim. Iahova seseini keke inau maha vatal kami.”
14 Sakini uva ris ven Balak ka avit meseini mini keke Balaam seseini vousil keil.
15 Sakini Balak sila ris hetetamen oteta keil emun koa avi houlu mok ka avi hetetamen amulin koakeil amulamu.
16 Keil emun uva ven Balaam ka aviten selusien onen asuv houlu Balak mini avit, “Napeahik eli keke konamaentei tounah nating koek kovamai venau.
17 Nisan uite hehi houlu vis hehi houlu mok minuk, ka tounah sa koa kihis nau eni, numoni minuk. Napeahik kimai li ka kisesenda en meatin keil ekek en usite onak.”
18 Ka Balaam vit kesi min keil vit, “Avaseini keke Balak hesa vasin silva ka gol ten mari eim onen minau, nasakras malong sesein etai titi selusien ten mengkatien onen Iahova.
19 Ka kami mihetos en vongien koanik hesuval tuomi keil amumoni. Hesakini, inau nakilea mailea keke Iahova hesan ris etai selusien minau mahiteni min kami.”
20 En vongien enek, Ahi mai ven Balaam ka viteni mini vit, “Munak meatin keil ekek imai avahisuk kovaha, kisak mesei ka kiha hetal min keil. Ka kumon asas varei koa nihiteni minuk.”
21 Out mulan en visokon, Balaam sak mesein dongki esen ka musil hetetamen keil ten out Moab.
Anatin keke Ahi maen Balaam vousil hetetamen keil ten out Moab, ka Ahi lei kilea rendemien onen Balaam koa en vati mok vakur uite ten sesendaen. Ven rendemien ten metenan onen, Ahi sila angelo tai onen keke vating koe sise onen. Balaam mul rondan en dongki esen ka reingeingeni keke angelo ring koe sise. Dongki enges lesi ka vati. Navong vati mukonek, Balaam tin katiat ka muasi. Avong etel mumoni mukonek, ka Balaam mul esuk muasi keih.
28 Evus Iahova sakin dongki kilea vaselus, ka viteni min Balaam vit, “?Namumon sa minuk? ?Vensa komuas nau hatte etel?”
29 Balaam vit kesi mini vit, “Veni keik kosakinau namemou vareis en meten hetetamen keil ekek. Vahit makur naef, kosa, masahuk kovamat.”
30 Dongki vit kesi mini vit, “Inau navi vati dongki etin koa komul komuloh eni lises en moulien onom. ?Mukave, namumon sakien koanik minuk mulamu?”
Balaam vit, “Vuo.”
31 Evus, Iahova maen Balaam les angelo onen vatimal ral min naef onen. Navong Balaam lesi, mot va netan ka nan rokol atan.
32 Evus, angelo vis katiati keih vit, “?Vensa komuas dongki esom hatte etel mukok? Numai mating koek veni sise onom romaltei en meten Ahi.
33 Ka dongki esom les inau ka viles hatte etel va en usite. Vahit varvilestei, inau mou vinik ka mamaen dongki vamoul vaha.”
34 Balaam vit kesi mini vit, “Inau namumoni eli romaltei. Nareingeingeni keke keik kovatimal en sise kovating koe inau. Ka ekek, munak kovit tisa keke inau maha, niha ris teim.”
35 Ka angelo viteni vit, “Kiha hetal meatin keil ekek, ka kihiten asas varei koa naviteni minuk kovahiteni.” Sakini Balaam musil ris keil uva.
39 Ka Balaam va ral min Balak en taon ten out Husot.
40 Ekonek, Balak muas buluk ka sipsip keil ka san hatte koa min Balaam ka hetetamen keil emun koa uva ral mini.
41 Out mulan eris, asuv houlu Balak mulamun Balaam luvina en hou ten out Bamot-Baal. En out enek, Balaam kilea vales tei en me-Isrel keil.