21
Isak lahir
21:1-7
1 TUHAN bikin macam yang de su janji dulu, De liat Abraham pu maitua Sara, trus De kasi berkat ke Sara sperti yang De su janji.
2 Jadi Sara de hamil, trus de lahir anak laki-laki satu untuk Abraham. Anak ini lahir waktu Abraham de su tua. De lahir pas deng waktu yang dulu Allah su kastau.
3 Abraham kas nama de pu anak yang Sara lahir tu Isak.
4 Trus Abraham sunat Isak waktu de pu umur su dlapan hari, untuk bikin tanda janji yang Allah su suru de bikin itu.
5 Abraham pu umur waktu itu su 100 taun, waktu de pu anak Isak ni lahir.
6 Trus Sara bilang begini, “Allah su bikin sa snang sampe sa tertawa! Smua orang yang dengar kalo sa yang su umur begini lahir anak, dong juga nanti tertawa snang sama-sama deng saya.”
7 Trus de tamba lagi, “Dulu trada orang yang mo bilang ke sa pu paitua Abraham, ‘Sara nanti bisa kas susu anak.’ Tapi skarang, kam liat! Sa su lahir anak laki-laki satu untuk Abraham pas di de pu umur yang su tua ini.”
Abraham usir Hagar deng de pu anak Ismael
21:8-21
8 Isak de su tamba besar. Pas waktu de mo lepas susu, Abraham bikin acara makan-makan besar untuk itu.
9 Tapi waktu acara ni, Sara liat Ismael ada main deng de pu anak Isak. Ismael tu Abraham pu anak dari Hagar, prempuan Mesir yang Sara pu budak itu.
10 Jadi, Sara bilang ke Abraham begini, “Bapa, usir suda, budak prempuan itu deng de pu anak! De pu anak tra bole trima bagian dari smua yang ko punya ini. Sa pu anak Isak yang harus dapat smua itu.”
11 Yang Sara bilang ni, bikin Abraham pu hati tra snang skali. Karna, Ismael tu de pu anak juga.
12 Tapi Allah bicara ke Abraham begini,
“Jang ko rasa tra snang gara-gara yang Sara bilang tentang ko pu anak deng budak prempuan itu. Smua yang Sara bilang ke ko, ko harus dengar trus bikin itu. Karna yang masuk anana cucu yang Sa su janji ke ko tu, yang dari Isak.
13 Tapi Sa juga nanti bikin bangsa satu dari budak ini pu anak, karna anak itu juga ko pu anak.”
14 Pas besok, pagi-pagi skali Abraham de bangun trus de pi ambil makanan deng kantong kulit satu, tempat isi air, trus de kasi itu ke Hagar. Abraham de taru barang smua tu di atas Hagar pu bahu, baru de suru de pu budak deng de pu anak ini pigi. Prempuan ini de pigi dari situ. Trus de pigi kliling dekat daera Bersyeba, di tempat sepi yang kring.
15 Waktu air di dalam kantong kulit yang Abraham kasi tu habis, Hagar de taru anak itu di bawa pohon kecil, pas di de pu sombar situ.
16 De bilang, “Sa tra sanggup liat anak ni de mati!” Itu yang, de langsung pi duduk jau-jau dari de pu anak tu, macam 100 meter begitu suda de pu jau. Baru de bongkar mnangis di situ.
17 Begini, Allah dengar anak itu de pu suara mnangis juga, trus Allah pu Malaikat bicara dari langit ke Hagar, de bilang begini, “Hagar, ko rasa susa untuk? Jang takut! Allah su dengar anak itu de pu suara dari tempat de baring.
18 Ko bangun suda! Angkat anak itu, trus ko urus dia. Karna dari anak itu pu anana cucu, Sa mo bikin bangsa yang besar.”
19 Trus Allah bikin Hagar jadi bisa liat sumur satu dekat situ. Jadi, Hagar de pigi isi air di de pu tempat air tu. Trus de kas minum anak itu.
20 Allah yang ada sama-sama deng anak itu trus, sampe nanti de su jadi besar. Trus de juga su pintar pana-pana binatang. Anak itu de tinggal di tempat sepi yang kring.
21 Jadi, Ismael de tinggal di Paran, ini tempat sepi yang kring. Trus Ismael de pu mama pi masuk minta prempuan Mesir satu, untuk jadi Ismael de pu maitua.
Abraham deng Abimelek ikat janji
21:22-34
22 Satu kali, Abimelek deng Pikol pi bicara sama Abraham. Pikol ni Abimelek pu kepala tentara. Dong dua pigi, baru Abimelek de bilang begini,
“Sa liat ni, memang, dalam smua yang ko bikin, ada Allah yang sama-sama deng ko trus.
23 Itu jadi, sa minta ko sumpa demi Allah depan sa di sini. Ko sumpa kalo ko trakan tipu-tipu sa ato sa pu anana deng sa pu cucu-cucu. Sperti sa su bikin ko macam sa pu sobat, sa minta ko tetap bikin ke sa deng ke tana tempat ko ada tinggal jadi pendatang ini.”
24 Jadi Abraham bilang, “Iyo, sa sumpa.”
25 Trus Abraham de protes ke Abimelek. Abraham de bilang tentang sumur satu yang Abimelek pu orang kerja dong ambil paksa dari Abraham dorang.
26 Trus Abimelek bilang, “Ado teman, sa tratau. Sa baru dengar ini! Sapa yang bikin begitu ka? Ko juga tra perna kastau sa lagi!”
27 Jadi, Abraham ambil kambing domba deng sapi brapa, baru de kasi smua tu ke Abimelek, trus dong dua ikat janji.
28 Habis itu, dari de pu binatang piara, Abraham de kas pisa lagi domba muda tuju.
29 Trus Abimelek tanya Abraham begini, “Teman, ko kas pisa domba muda tuju tu untuk apa?”
30 Abraham jawab de begini, “Sa mo ko trima domba muda tuju ni, langsung dari sa pu tangan. Supaya ini jadi tanda yang kas ingat kalo ko stuju, sumur ini sa yang gale.”
31 Abimelek trima domba muda itu. Itu yang, orang kas nama tempat ini Bersyeba, karna dong dua bikin sumpa di situ.
32 Habis Abraham deng Abimelek su ikat janji di Bersyeba situ, Abimelek deng de pu kepala tentara Pikol tu, pulang ke dong pu tempat di orang Filistin pu daera.
33 Trus Abraham tanam pohon tamariska di Bersyeba situ baru Abraham semba TUHAN, Allah Yang Slalu Ada.
34 Suda, dari situ Abraham masi tinggal lama di orang Filistin pu daera situ. Abraham tinggal jadi orang pendatang di situ.