46
Yakub dapat pengliatan
46:1-7
1 Jadi suda, Yakub de kas siap de pu barang-barang smua baru de brangkat ke Mesir. Waktu de sampe di daera Bersyeba, de potong binatang untuk kasi korban ke Allah yang de pu bapa Isak semba.
2 Pas malam begini, Yakub de dapat pengliatan, dalam pengliatan itu Allah panggil dia, “Yakub, Yakub.”
De jawab, “Ya Tuhan.”
3 Trus Allah bilang dia,
“Sa ini Allah yang ko pu bapa semba. Jang takut, pigi saja ke Mesir, karna nanti Sa pasti bikin ko pu anana cucu jadi bangsa yang besar di sana.
4 Sa pasti jalan sama-sama deng ko ke Mesir, baru nanti Sa bawa ko pu anana cucu dong kembali ke sini lagi. Ko nanti mninggal di Mesir, Yusup nanti ada di samping ko waktu ko mninggal.”
5 Habis itu, Yakub de kas tinggal daera Bersyeba, de lanjut jalan. Yakub pu anana dong kas naik Yakub deng dong pu anana sama dong pu maitua di kreta-kreta yang raja kasi.
6 Dong bawa dong pu binatang piara smua, deng dong pu barang-barang smua yang dong kumpul di tana Kanaan, trus dong smua sampe di Mesir, Yakub deng de pu anana cucu smua.
7 Anana deng cucu-cucu yang laki-laki ka prempuan ka, yang ada tu, de bawa dong smua ke Mesir.
Yakub pu anana cucu yang ikut ke Mesir
46:8-25
8 Ini daftar nama dari Yakub deng de pu anana cucu yang pigi ke Mesir. Dong ini suda, orang Israel.
Yakub pu anak pertama Ruben.
9 Ruben pu anana tu Henok, Palu, Hesron deng Karmi.
10 Trus Simeon pu anana tu Yemuel, Yamin, Ohad, Yakin deng Zohar, sama Saul yang prempuan Kanaan pu anak.
11 Baru Lewi pu anana tu Gerson, Kehat deng Merari.
12 Trus Yehuda pu anana tu Er, Onan, Syela, Peres deng Zerah. Tapi Er deng Onan mninggal di tana Kanaan. De pu anak Peres pu anana tu Hesron deng Hamul.
13 Kalo Isakar pu anana tu Tola, Pua, Ayub deng Simron.
14 Baru Zebulon pu anana tu Sered, Elon deng Yahleel.
15 Enam anak laki-laki ini yang lahir dari Yakub pu maitua Lea waktu dong di Padan-Aram, tamba deng anak prempuan satu yang nama Dina. Jadi dong smua tamba deng dong pu anana laki-laki smua tu ada 33 orang.
16 Baru Gad de pu anana tu Sifyon, Hagi, Syuni, Esbon, Eri, Arodi deng Areli.
17 Kalo Asyer de pu anana tu Yimna, Yiswa, Yiswi, Beria, deng dong pu sodara prempuan Serah. Beria pu anana tu Heber deng Malkiel.
18 Kalo Gad deng Asyer tu Yakub pu anana laki-laki yang lahir dari Zilpa, budak prempuan yang Laban kasi ke de pu anak Lea. Dong pu banyak ada 16 orang.
19 Yakub pu maitua Rahel pu anana tu Yusup deng Benyamin.
20 Waktu Yusup ada di tana Mesir, de dapa kas kawin deng Asnat. Asnat pu bapa tu Potifera, de yang jadi imam untuk dong pu tuhan di kuil On. Yusup pu maitua Asnat ni lahir dua anak laki-laki yang pu nama Manasye deng Efraim.
21 Benyamin pu anana tu Bela, Beker, Asbel, Gera, Naaman, Ehi, Ros, Mupim, Hupim, deng Ared.
22 Dong smua tu Yakub pu anana cucu dari de pu maitua Rahel. Dong pu banyak ada 14 orang.
23 Trus Dan pu anak tu Husim.
24 Naftali pu anana tu Yahzeel, Guni, Yezer, deng Syilem.
25 Dong ini yang lahir dari Yakub pu maitua Bilha, budak prempuan yang Laban kasi ke de pu anak Rahel. Dong pu banyak ada tuju orang.
Yusup ketemu de pu bapa lagi di Mesir
46:26-34
26 Yakub pu kluarga smua yang tiba di Mesir sama-sama deng Yakub tu ada 66 orang. Tapi ini blum hitung de pu mantu-mantu prempuan dong lagi.
27 Yusup pu anana yang lahir di Mesir ada dua orang. Jadi Yakub pu kluarga yang ada di Mesir smua tu ada tuju pulu orang.
28 Waktu dong masi di jalan, Yakub suru Yehuda untuk jalan duluan pi ketemu Yusup, baru panggil Yusup datang ke Gosyen untuk pi liat de pu bapa Yakub. Waktu dong smua baru sampe di Gosyen,
29 Yusup kas siap de pu kreta trus pigi ke Gosyen, untuk ketemu deng de pu bapa Yakub. Pas de ketemu de pu bapa Yakub ini, de polo de pu bapa baru de mnangis lama skali di de pu bapa pu bahu.
30 Trus Yakub ni bilang sama Yusup begini, “Skarang, sa su liat ko pu muka trus su liat ko masi hidup, jadi suda. Tuhan su bisa ambil saya.”
31 Habis itu Yusup bilang de pu sodara-sodara deng de pu bapa pu kluarga smua begini,
“Sa mo pi ketemu raja Mesir trus kastau dia kalo sa pu sodara-sodara deng sa pu bapa pu kluarga, yang tinggal di Kanaan su datang ke sa sini.
32 Nanti sa bilang raja, ‘Dong tukang jaga kambing domba deng sapi. Jadi, dong ada bawa dong pu binatang piara smua sama dong pu barang-barang smua juga.’
33 Jadi waktu raja Mesir panggil kam baru tanya, ‘Kam kerja apa?’
34 nanti kam jawab, ‘Bapa, tong ini biasa jaga-jaga binatang piara dari waktu tong masi kecil sampe skarang, dari tong pu nene moyang memang su biasa kerja begitu.’ Bikin begitu supaya, nanti raja Mesir pasti kasi kam tinggal di daera Gosyen situ.”
Yusup bilang begitu karna orang Mesir dong rasa paling tra bisa skali kalo mo sama-sama deng orang-orang yang biasa piara kambing domba itu.