26
Chꞌín Pablo nkayakon tí chꞌín rey Agripa chrónka chꞌán tí jie̱ tꞌeka sín chꞌán
1 Ntá tí chꞌín rey Agripa a mé ntáche chꞌán tí chꞌín Pablo kíxin:
―Ó ncho̱xon jahvá tso̱chro̱nka ―ichro chꞌán.
Ntá tí chꞌín Pablo mé kjua̱ya̱ tja chꞌán ntá kjuankíxin nixja chꞌán, ntáchro chꞌán xi̱kihi:
2 ―Chàna kíxin tsonixja nkayakuan tí jaha rey Agripa tso̱xrja̱nka kaín tí jie̱ tꞌekana tí sín judío.
3 Ó noheni kíxin jaha la ó noha jína kuènte tí ley la ko tí nkehe tinkáchónki tí sín judío, la ko jaha noha nkehe tí kjua̱cha̱xi̱n sín kíchó sín. Méxra̱ xrja̱nnóa̱ha kíxin tjakꞌetinhín jína.
Chrónka chꞌín Pablo nkexrí kjuákꞌe chꞌán tí ósé
4 ’Kaín tí sín judío la ó nohe sín nkexrí kꞌuékjakꞌé tí chjasenná la ko chjasin Jerusalén tí na̱xa kꞌuéntasoána.
5 Kja̱xin jehe sín la ó nohe sín la kjá jína chróchrónka sín kíxin tí na̱xa̱ kꞌuéntasoána la kꞌuéfariseona. A̱ ntá tí sín fariseo a mé a̱ntsí má kjuínchexiteyéhe̱ sín tí ley kuènte tí nkehe tinkáchónkini.
6 Ntá ijie si̱nchekito̱exián jie̱na kíxin nínkaon tí sín judío a kíxin tjécho̱nha̱n kíxin Dios mé sinchexechón chojni ínaá xi̱kaha tsíchénka chꞌán tí sín tsíkꞌaxrjeníxinni.
7 Tí teyó tribu tsíkꞌaxrjeníxin chꞌín Israel mé tjejóchónhen sín kíxin tsꞌikon sín tsoxiteyá tí nkehe tsíchrónka Dios. Méxra̱ xraxinkaon sín Dios ncha̱kotjin la ko tie. Méxra̱ mé xi̱kaha tjécho̱nha̱n, jaha rey Agripa, la mé xi̱kaha nínkakonna tí sín judío ijie.
8 ¿Á títekákonhyará jahará kíxin Dios sinchexechón chojni tsíkꞌen?
Chꞌín Pablo kꞌuénínkakonhen chꞌán tí chojni tinkáchónki Ìnchéni
9 ’Janhan mé kja̱xin kꞌuékjenka̱yáxian nchónhya nkehe kꞌuénínka̱konha̱n tí sín tinkáchónki Jesús tí nkexro tsíkji̱xi̱n chjasin Nazaret.
10 Mé xi̱kaha kja̱xin kꞌuékji̱tꞌa chjasin Jerusalén. Tí sín ncha̱tꞌá tꞌe̱to̱an mé kjuanjon sín kjuachaxin kíxin janhan tsochrꞌáxa̱nha̱n nto̱echiso nchónhya tí sín tinkáchónki Ìnchéni. Ntá tió kꞌóyán sín tí sín a mé janhan la ntáxrja̱n kíxin ó ncho̱xon xi̱kaha kónhen.
11 Nchónhya veces kjui̱ntakjasóte tí sín tinkáchónki Ìnchéni kíxin chrókuíto̱he sín tí nkehe tinkáchónki sín. Mé xi̱kaha kꞌuékji̱tꞌa kaín xín ni̱nko kíxin imá kꞌuénínka̱konha̱n tí jehe sín la xi̱kaha kꞌuájichráha̱ sín kjónté sátsíkji sín chjasin ókjé.
Chrónka chꞌín Pablo nkexrí kuinkáchónki chꞌán Ìnchéni
(Hch. 9.1―19; 22.6―16)
12 ’Méxra̱ xra̱ ó sákjuia janhan chjasin Damasco. Tí sín ncha̱tꞌá tꞌe̱to̱an mé ó kjuanjon sín kjuachaxin kíxin xi̱kaha tꞌa̱ha̱ sín xra̱.
13 A̱ ntá tí nti̱a a jaha rey chrókónoha kíxin chonkíxin kꞌuíkua̱n éxí ijnko xrohi tꞌinkaséyan kui̱xi̱n nkaya nka̱jní a̱ntsí má fuerte la kánhyó fuerte tí xrohi kuènte ya̱on la tí tꞌinkaséyan mé kꞌuantatjen tí janhan la ko tí sín xríki̱an.
14 Ntá kaín ni kjuítsínkani nonte ntá xrína̱hya kui̱nha̱n nixja ijnko nkexro mé nkìva hebreo nixja̱xi̱n chꞌán. Ntáchro tí nkexro a kíxin: “Saulo, Saulo, ¿nkekuènte nínkakònna xrítjéyá tí janhan? Jahvá nchekjasóte a̱sán kíxin tjanjo̱nkoa tí janhan. Éxí yóhe̱ ijnko koxinta kónínkaon va tí chriáte sín va chica yo mé xi̱kaha jaha.”
15 Ntá kjuánchánkiá kíxin: “¿Xá nkexro jaha?” Ntá tí nkexro me kjuáte̱he kíxin: “Janhan mé Jesús mé tí nkexro chréhé jaha.
16 Ijie tꞌàya jaha, tjakꞌexián to̱tá. Janhan kjuánjuan kjuachaxin kíxin kꞌuíkuan tí janhan ijie kíxin jaha si̱chꞌena xra̱. Janhan kjuéyá tí jaha kíxin tsochénka chojni kíxin kꞌuíkuan tí janhan la ko tso̱chro̱nka tí nkehe tsjákohá ínaá tí xikꞌikuan tí janhan ínaá.
17 Janhan tsꞌayakonhan kíxin kohya nkehe sitꞌaha tí sín judío la ko tí sín jehya judío. A̱ ntá jie této̱an satsjia.
18 Méxra̱ této̱an sátsjia tí tjejó tí jehe sín kíxin takítje̱nkia ikon sín kíxin í tsꞌajihya sín nti̱a sítié la tsꞌaji sín nti̱a tꞌinkaséyan la ko tsochóntahya tí jínahya kjua̱cha̱xién tsꞌe̱tue̱nhen tí jehe sín. Jehe sín mé tsinkáchónki sín tí janhan. Ntá janhan tsꞌáyáha̱ sín la tsjìin iji̱é sín la ko tsi̱to̱nhe̱n sín tí nkehe tsꞌáyéhe̱ kaín tí sín tsíkjinchetjóá Dios,” ichro Ìnchéni.
Chꞌín Pablo kuítekaon chꞌán tí nkehe tsíkꞌikon chꞌán
19 ’Mé xi̱kaha jaha rey Agripa kjui̱ntaxiteyáha̱ tí nkehe kꞌuíkua̱n kui̱xi̱n nkaya nka̱jni.
20 Sa̱oxín kjuáko̱ha̱ tí sín siín chjasin Damasco, la ntá chrꞌéxi̱n chjasin Jerusalén, la ko kuenté tí estado Judea ntá kja̱xin kjuáko̱ha̱ tí sín jehya judío. Kjuáko̱ha̱ sín kíxin chrókuíto̱he sín iji̱é sín, la chrókjan sín chrókuinkáchónki sín Dios, la ko chrókjua̱ko̱xi̱n sín xra̱ jína kíxin chaxín ó kjuitóxi̱nhin sín tí nkehe tinkáchónki sín.
21 Mé xi̱kaha tí xra̱ tséxinna tí sín judío a nkaxenhen ni̱nko la tjinkaon sín chrókꞌóyánna sín.
22 Ntá kjuasáyé Dios kjuínki̱tsana la ntoá itjén ijie tjáko̱ha̱ kaín chojni ntsíntsí la ko chojni ihyé la ninkehó kꞌuantaxía̱nhya kuènte tí nkehe tsíchrónka tí sín tsíchrónka itén Dios la ko tí nkehe tsíchrónka chꞌín Moisés tso̱nhen,
23 kíxin tꞌichjánxi̱n itsꞌen Cristo la ko tsoxechón chꞌán ínaá. Tí itén chꞌán éxí ijnko xrohi tsꞌinkaséyanxín tí sín siín ntihi la ko tí sín siín í so nación kíxin tsaáxin sín.
Chꞌín Pablo nixje̱he̱ chꞌán chꞌín Agripa kíxin chrókuinkáchónki chꞌán Ìnchéni
24 Mé xi̱kaha ichro chꞌín Pablo kíxin kohya jie̱ kjuasin chꞌán ntá tí chꞌín Festo mé itsen kꞌuèya chꞌán kíxin:
―Pablo jaha la kjá tsíkꞌixikján. Imá tsíkji̱nchekuáxian mé xi̱kaha tsíkólókoxián ―ichro chꞌán.
25 Ntá kjuáte̱he chꞌín Pablo kíxin:
―Jehya tsíkꞌixikjánna. Jaha Festo imá tjua̱ha. A̱ ntá tí nkehe ntáxrja̱n la ijnko nkehe jína la ijnko nkehe chaxín.
26 Ntihi itjen tí chꞌín rey Agripa. Jehe chꞌán mé jína nohe chꞌán kaín tí nkehe a. Méxra̱ tjenixja̱ha̱ chꞌán jnkojína kíxin ó nòna kíxin jehe chꞌán ó nohe chꞌan kaín nkehe kónhen kíxin jehya ijnko nkehe imó kónhen tíha.
27 Jaha, rey Agripa, ¿á títekávan tí nkehe tsíkjako tí sín tsíchrónka itén Dios ósé? Janhan la ó nòna kíxin títekávan jaha.
28 Ntá kjuáte̱he chꞌín Agripa ntáchro chꞌán kíxin:
―Ó a̱ntsíkoá chrokjuacha chrókjuachròena kíxin chrókꞌónana cristiano ―ichro chꞌán.
29 Ntá ntáchro chꞌín Pablo kíxin:
―Ntáxrja̱n kíxin á isé tso̱xrja̱nka o̱ á séhya la Dios mé tjinkaon kíxin jehya jahvá chrókuinkachónkia chꞌan. Náhí. Kja̱xin tjinkaon chꞌán kíxin kaín nkexro tjejótinhin chrókꞌóna sín éxí tí janhan kjánchó xi̱kahya chróchónta sín cadena.
30 Ntá kjuixin nixja chꞌín Pablo ntá kꞌuínkatjen tí chꞌín rey, la ko kja̱xin tí chꞌín gobernador, la ko kja̱xin tí tjan Berenice, la ko kaín xín tí chojni tjejótja̱xi̱n ntiha.
31 Ntá kaín sín kꞌuaxrjenta sín la ikjo sín kíchó sín. Ntáchro sín kíxin:
―Kohya jie̱ tsíkjasin tí chꞌín a kíxin chrókꞌuenxín chꞌán la ko chrókjuakꞌechjinaxín chꞌán nto̱echiso.
32 Ntá tí chꞌín Agripa ntáche chꞌán tí chꞌín Festo kíxin:
―Ó ncho̱xon chrókjuánjuan kjuachaxin sáchrókjui tí chꞌín a tí jehe chꞌán chrókjuanchahya chꞌán kíxin tí chꞌín imá tꞌe̱to̱an sinchekito̱exín iji̱é chꞌán ―mé xi̱kaha ichro tí chꞌín Agripa.