3
Chꞌín Juan Bautista kjuákꞌe nte̱je̱ kjuako itén Dios
(Mt. 3.1-12; Mr. 1.1-8; Jn. 1.19-28)
1 A̱ ntá quince nánó kꞌuékꞌe̱to̱an chꞌín Tiberio tí xra̱ gobierno, la ko tí chꞌín Poncio Pilato kꞌuégobernador tí estado Judea, la ko tí chꞌín Herodes kꞌuégobernador tí estado Galilea, la ko tí kíchó chꞌán Felipe mé kꞌuégobernador estado Iturea la ko estado Traconite, la ko chꞌín Lisanias kꞌuégobernador tí estado Abilinia.
2 A̱ ntá chꞌín Anás la ko chꞌín Caifás kꞌuéchónta sín xra̱ ncha̱tꞌá tꞌe̱to̱an. A̱ ntá Dios mé kjuanjon kjuachaxin kꞌuáyéhe̱ chꞌín Juan itjen chꞌán nte̱je̱ tsochrónka chꞌán itén Dios. Ntá jehe chꞌán itꞌé chꞌán Zacarías.
3 Chꞌín Juan kꞌuátsínka chꞌán kaín tí chjasin chjino tí nta̱río Jordán kjua̱ko̱he̱ chꞌán chojni ntiha kíxin chrókjuinkí sín tí nkehe tjenka̱yáxin sín chrókuíto̱he sín tí iji̱é sín ntá chrókuikite sín kíxin xi̱kaha mé chrókjuìin iji̱é sín.
4 Mé xi̱kaha kónhen éxí kꞌuéchronka la ko tsíkjin chꞌín Isaías, mé tí nkexro kꞌuéchronka itén Dios ósé kíxin:
Tsinhin sín itén ijnko nkexro tsjakꞌe nte̱je̱ tsꞌèya tsontáchro kíxin:
“Tóxakonhanrá ncheyóxinrá nti̱a tsi̱xi̱n Ìnchéni
Takítje̱hérá ijnko nti̱a ntoí.
5 Kaínxín tsa̱ka mé tso̱yóxin,
la ko kaín xín jna̱ la ko kaín xín itjo tsito̱he yóxin,
la ko tí nti̱a tsíxrèya mé tsoxrentoá,
la ko kaín tí nti̱a yóxinhya la mé tso̱yóxin;
6 Xi̱kaha mé kaín xín chojni chjasintajni mé tsꞌikon sín kíxin Dios mé chrókuaáxin sín.”
Mé xi̱kaha ichro itén Dios.
7 A̱ ntá tió kjuíji chojni ntiha kíxin chꞌín Juan chrókui̱ki̱te chꞌán sín ntá ntáche chꞌán tí jehe sín kíxin:
―Jahará tsíkꞌaxrjeníxinrá konche. ¿Xá nkexro kjuíntanohará kíxin chrókuinkeherá tí kjuanínkaon kuènte Dios ó tsi?
8 Tꞌichjánxi̱n kíxin chrókꞌuejorá jnkojína chrókjuáko̱xi̱nrá kíxin chaxín kjuitoxi̱nhínrá tí nkehe tjenka̱yáxinrá. Jahará nchehnkerá ntáchrorá kíxin kꞌuaxrjeníxinrá chꞌín Abraham. Janhan ntáxrja̱n kíxin kjónté tí xro̱ i la Dios tsjacha chrókjuichꞌéna chꞌán chojni kꞌuaxrjeníxin chꞌín Abraham.
9 Kíxin tí chica hacha ó tjechónhen tsochrínjinxín tí nta. A̱ ntá kaín xín nta tꞌónahya to jína mé tsochrínjin kíxin tsoche ―ichro chꞌán.
10 A̱ ntá tí chojni mé kjuanchankíhi sín chꞌán kíxin:
―A̱ ntá tí xi̱kaha, ¿a̱ ntá jeheni nkehe tí chrókjuichꞌeni? ―ichro sín.
11 Ntá kjuáte̱he chꞌín Juan kíxin:
―Tí nkexro chónta yaá camisa la chrókjuincheki̱to̱nhe̱n tí nkexro chóntahya. La ko tí nkexro chónta nkehe sine chróchjéhe sín tí nkexro chóntahya nkehe sine ―ichro chꞌán.
12 Kja̱xin ikui iso tí sín nchekjènki̱ kíxin chrókuikite sín. Ntá kjuanchankíhi sín tí chꞌín Juan kíxin:
―Maestro, ¿nkehe chrókjuichꞌeni jeheni? ―ichro sín.
13 Ntá ntáchro chꞌín Juan kíxin:
―Jehó éxí tí tsíkꞌítuanhanrá chrókjui̱nchekjènki̱rá ―ichro chꞌán.
14 Kja̱xin iso sín soldado kjuanchankíhi sín chꞌán kíxin:
―¿Kja̱xin jeheni nkehe chrókjuichꞌeni? ―ichro sín.
Ntá kjuáte̱he chꞌán kíxin:
―Te̱éhyará ninkexró tí chi̱cha̱ko̱en sín la ko ninkexró si̱chꞌénéhyará kjuachꞌia la ko kjónté tí chichaon tjachará ó la kjuaxróxin chrókꞌuejorá ―ichro chꞌán.
15 Kaín tí chojni chjasin kꞌuéjóchónhen sín tóxakonhen a̱sén sín tjinkaon sín tso̱nohe sín kíxin á tí chꞌín Juan mé tí Cristo.
16 Kjánchó chénka chꞌín Juan kaín tí sín tjejó a kíxin:
―Janhan mé ìnta̱ tíki̱texián chojni. A̱ ntá tí nkexro itsi chrꞌéxi̱n mé tsi̱ki̱texínrá tí Ncha̱kuen Dios la ko xrohi. A̱ntsí tꞌe̱to̱an chꞌán a̱ ntá janhan la kánhyó. Méxra̱ chrókósuàna chrókjuasinta̱nka̱ha̱ chꞌán tí correa tí to̱ka̱té chꞌán.
17 Jehe chꞌán la ó tjexraá chꞌán pala sinchetjuáxin chꞌán noatrigo kíxin tí nta̱chji̱ji trigo la ókjé tsjejo chꞌán a̱ ntá tí noatrigo la tsjenájín chꞌán la tsꞌe̱nka̱chji̱na chꞌán. A̱ ntá tí nta̱chji̱ji trigo la tsjakaxín chꞌán ijnko xrohi tsꞌankahya jnkochríxín ―mé xi̱kaha ichro chꞌín Juan.
18 Mé xi̱kaha chronkaxín chꞌán la ko itsjé í so nkehe kjuínchexraxinkaon chꞌán chojni mé xi̱kaha kjua̱ko̱exín chꞌán sín tí tan jína.
19 Kja̱xin kjuentuéhe chꞌán tí chꞌín Herodes kíxin chónta chꞌán tí tjan Herodías, mé tí ichjién kíchó chꞌán Felipe, la ko kjuentuéhe chꞌán tí chꞌín Herodes kíxin tí í so nkehe jínahya tsíkjichꞌe chꞌán.
20 Kjánchó chꞌín Herodes ánto̱sén chꞌán kjónté kuínhin chꞌán la kjuínchekꞌánkí chꞌán tí iji̱é chꞌán ínaá kíxin kjua̱kꞌe̱chji̱na chꞌán tí chꞌín Juan tí nto̱echiso.
Kuíkite chꞌín Jesús
(Mt. 3.13-17; Mr. 1.9-11)
21 A̱ ntá na̱xa̱ kuènhya tíha na̱xa̱ kjuákꞌe chꞌín Juan kui̱ki̱te chꞌán chojni ntá kja̱xin chꞌín Jesús mé kuíkite chꞌán. A̱ ntá tjenixje̱he̱ chꞌán Dios ntá xitje̱he̱ nka̱jní
22 ntá kꞌuínkajin Ncha̱kuen Dios éxí ijnko kontóá tsjehe la kjuákꞌe chrítaón kja chꞌán. Ntá xrína̱hya kuínhin sín itén nkexro nkaya nka̱jní ntáchro kíxin:
―Jaha mé xja̱nna la tjua̱ha tí jaha. Imá chàna kíxin nchexiteyána tí jaha.
Tí sín tsíkꞌaxrjeníxin chꞌín Jesucristo
(Mt. 1.1-17)
23 Chꞌín Jesús kꞌuéchónta chꞌán chjino treinta nánó tió kjuankíxin kjuako chꞌán. Ntá kjuenka̱yáxin sín kíxin itꞌé la mé chꞌín José. Ntá itꞌé tí chꞌín José la mé chꞌín Elí.
24 A̱ ntá itꞌé tí chꞌín Elí la mé chꞌín Matat; a̱ ntá itꞌé tí chꞌín Matat la mé chꞌín Leví, a̱ ntá itꞌé tí chꞌín Leví la mé chꞌín Melqui; a̱ ntá itꞌé tí chꞌín Melqui la mé chꞌín Jana; a̱ ntá itꞌé tí chꞌín Jana la mé chꞌín José.
25 A̱ ntá itꞌé tí chꞌín José la mé chꞌín Matatías, a̱ ntá itꞌé tí chꞌín Matatías la mé chꞌín Amós, a̱ ntá itꞌé tí chꞌin Amós la mé chꞌín Nahum, a̱ ntá itꞌé tí chꞌín Nahum la mé chꞌín Esli; a̱ ntá itꞌé chꞌín Esli la mé chꞌín Nagai,
26 a̱ ntá itꞌé tí chꞌín Nagai la mé chꞌín Maat, a̱ ntá itꞌé tí chꞌín Maat la mé chꞌín Matatías, a̱ ntá itꞌé tí chꞌín Matatías la mé chꞌín Semei, a̱ ntá itꞌé tí chꞌín Semei na mé chꞌín José, a̱ ntá itꞌé tí chꞌín José na mé chꞌín Judá,
27 a̱ ntá itꞌé tí chꞌín Judá na mé chꞌín Joana, a̱ ntá itꞌé tí chꞌín Joana la mé chꞌín Resa, a̱ ntá itꞌé tí chꞌín Resa na mé chꞌín Zorobabel, a̱ ntá itꞌé tí chꞌín Zorobabel na mé chꞌín Salatiel, a̱ ntá itꞌé tí chꞌín Salatiel na mé chꞌín Neri,
28 a̱ ntá itꞌé tí chꞌín Neri na mé chꞌín Melqui, a̱ ntá itꞌé tí chꞌín Melqui na mé chꞌín Adi, a̱ ntá itꞌé tí chꞌín Adi na mé chꞌín Cosam, a̱ ntá itꞌé tí chꞌín Cosam na mé chꞌín Elmodam, a̱ ntá itꞌé tí chꞌín Elmodam na mé chꞌín Er,
29 a̱ ntá itꞌé tí chꞌín Er na mé chꞌín Josué, a̱ ntá itꞌé tí chꞌín Josué na mé chꞌín Eliezer, a̱ ntá itꞌé tí chꞌín Eliezer na mé chꞌín Jorim, a̱ ntá itꞌé tí chꞌín Jorim na mé chꞌín Matat,
30 a̱ ntá itꞌé tí chꞌín Matat la mé chꞌín Leví, a ntá itꞌé tí chꞌín Leví na mé chꞌín Simeón, a̱ ntá itꞌé tí chꞌín Simeón na mé chꞌín Judá, a̱ ntá itꞌé tí chꞌín Judá na mé chꞌín José, a̱ ntá itꞌé ti chꞌín José na mé chꞌín Jonán, a̱ ntá itꞌé tí chꞌín Jonán na mé chꞌín Eliaquim,
31 a̱ ntá itꞌé tí chꞌín Eliaquim na mé chꞌín Melea, a̱ ntá itꞌé tí chꞌín Melea na mé chꞌín Mainán, a̱ ntá itꞌé tí chꞌín Mainán na mé chꞌín Matata, a̱ ntá itꞌé tí chꞌín Matata na mé chꞌín Natán,
32 a̱ ntá itꞌé tí chꞌín Natán na mé chꞌín David, a̱ ntá itꞌé tí chꞌín David na mé chꞌín Isaí, a̱ ntá itꞌé tí chꞌín Isaí na mé chꞌín Obed, a̱ ntá itꞌé tí chꞌín Obed na mé chꞌín Booz, a̱ ntá itꞌé tí chꞌín Booz na mé chꞌín Salmón, a̱ ntá itꞌé tí chꞌín Salmón na mé chꞌín Naasón,
33 a̱ ntá itꞌé tí chꞌín Naasón na mé chꞌín Aminadab, a̱ ntá itꞌé tí chꞌín Aminadab na mé chꞌín Aram, a̱ ntá itꞌé tí chꞌín Aram na mé chꞌín Esrom, a̱ ntá itꞌé tí chꞌín Esrom na mé chꞌín Fares, a̱ ntá itꞌé tí chꞌín Fares na mé chꞌín Judá,
34 a̱ ntá itꞌé tí chꞌín Judá na mé chꞌín Jacob, a̱ ntá itꞌé tí chꞌín Jacob na mé chꞌín Isaac, a̱ ntá itꞌé tí chꞌín Isaac na mé chꞌín Abraham, a̱ ntá itꞌé tí chꞌín Abraham ná mé chꞌín Taré, a̱ ntá itꞌé tí chꞌín Taré na mé chꞌín Nacor,
35 a̱ ntá itꞌé tí chꞌín Nacor na mé chꞌín Serug, a̱ ntá itꞌé tí chꞌín Serug na mé chꞌín Ragau, a̱ ntá itꞌé tí chꞌín Ragau na mé chꞌín Peleg, a̱ ntá itꞌé tí chꞌín Peleg na mé chꞌín Heber, a̱ ntá itꞌé tí chꞌín Heber na mé chꞌín Sala,
36 a̱ ntá itꞌé tí chꞌín Sala na mé chꞌín Cainán, a̱ ntá itꞌé tí chꞌín Cainán na mé chꞌín Arfaxad, a̱ ntá itꞌe tí chꞌín Arfaxad na mé chꞌín Sem, a̱ ntá itꞌé tí chꞌín Sem na mé chꞌín Noé, a̱ ntá itꞌé tí chꞌín Noé na mé chꞌín Lamec,
37 a̱ ntá itꞌé tí chꞌín Lemec na mé chꞌín Matusalén, a̱ ntá itꞌé tí chꞌín Matusalén na mé chꞌín Enoc, a̱ ntá itꞌé tí chꞌín Enoc na mé chꞌín Jared, a̱ ntá itꞌé tí chꞌín Jared na mé chꞌín Mahalaleel, a̱ ntá itꞌé tí chꞌín Mahalaleel na mé chꞌín Cainán,
38 a̱ ntá itꞌé tí chꞌín Cainán na mé chꞌín Enós, a̱ ntá itꞌé tí chꞌín Enós na mé chꞌín Set, a̱ ntá itꞌé tí chꞌín Set na mé chꞌín Adán, a̱ ntá Dios mé xje̱en chꞌín Adán.