1 KOMAIL kaalemoni Kot dueta jeri kompok kan. 2 O kekeid ni limpok dueta Krijtuj, me kotin, pok on kitail, ap kotin jokonpaude kin kitail, pwen wiala kijakij o mairon eu, me kin pomau on Kot. 3 A nenek, o jon en jaut karoj, o norok kapwa ender man pwaida re omail, duen me kon on jaraui kan. 4 Pil der lokaia jued, o kaman, o lokaia mal, me jota kon on, a iet: Komail en danke. 5 Mepukat komail en aja o dedeki, me jota me nenek, de jamin, de me norok kapwa, me poni ani tikitik, pan kak jojoki wein Krijtuj o Kot. 6 Jota amen en kotau ki komail lokaia mal, pwe mepukat kin kareda onion en Kot on jeri jopeik kan. 7 Komail ender kij arail. 8 Pwe maj o komail me rotorot, a met komail marainlar ren Kaun o; weweid wei duen jeri en marain akan. 9 Pwe wan marain mepukat: Kamau, o pun o melel. 10 O kajauiada, me kin kaperenda kupur en Kaun o. 11 O der waroki on wiawia jued en me rotorot akan, a mak eta, en kapun on irail. 12 Pwe me re kin wiada waja rir, me jued o jota mau on, en inda. 13 A karoj me pan kajanjaleda, pan kadiarok kida marain, pwe marain kin kajanjaleda meakaroj. 14 I me a kotin majani: Pirida koe me mamair, o paurida jan ren me melar akan, a Krijtuj pan kamarain uk ada. 15 Kalaka, pwe komail en keid ineneweita, kaidin duen me lolepon a duen me lolekon kan. 16 Audaud anjau mau, pweki ran akan me jued. 17 Komail ari ender lamponla, a en lolekon, pwe i duen kupur en Kaun. 18 Ender kamom wain, pwe a kin kareda tiak jued, a komail en direki Nen. 19 O jauaj pena ki pjalm, o kaul en kapin, o kaul nenin; komail kaul o kajan on Kaun o nan monion omail. 20 Danke kaukaule Kot o Jam ni mar en atail Kaun Iejuj Krijtuj. 21 O papa komail pena amen amen ni majak dol en Krijtuj. 22 Komail li akan, udi on pein omail warok kan dueta on Kaun. 23 Pwe ol o me tapwin a paud, dueta Krijtuj me tapwin momodijou, o i me Jaunkamaur pan war a. 24 A duen momodijou kin udi on Krijtuj, iduen li akan en udi on ar warok kan ni meakaroj. 25 Komail ol akan pok on pein omail warok kan, dueta Krijtuj kotin pok on momodijou o kotiki don i pein i. 26 Pwen kajarauiala i, o kamakelekeleda i ki pil o, iei a majan. 27 Pwen kajanjale don pein i momodijou linan, me jota topala o omrok ape, a me jaraui o jo kaopa kot. 28 Nan iduen ol akan en pok on ar warok kan dueta pein war arail akan. Me kin pok on a warok, kin pok on pein i. 29 Jota amen kin juedeki pein uduk a; pwe a kin kamana o kanainai eta, dueta Krijtuj kin kotin apwali momodijou. 30 Pwe kitail me kajan en war a, o uduk a, o a kokon akan. 31 I me aramaj o pan muei jan jam a o in a, ap muei on a paud, ira ari pan uduk ta ieu la. 32 Meid kaponepon lapalap eu; a nai kaparokki duen Krijtuj a warokeki on momodijou. 33 Pil dueta komail, amen amen komail en pok on a warok dueta pein i, a li o en kakaki a warok.