119
1 RE meid pai, me jota kin japun ni al arail, me kin weweid ni kapun en Ieowa!
2 Re meid pai, me kin kolekol a kadede akan, me kin rapaki i jan nan monion arail!
3 Me jota kin wia me jued, a weweid nan a al akan.
4 Pein komui kotikidar japwilim omui kujoned akan, pwe jen porijok kapwaiada.
5 O ma al ai kan inen wei, pwen kapwaiada omui kujoned akan.
6 I ap jota pan jarodi, ni ai pan apapwali japwilim omui kujonod akan karoj.
7 I danke komui jan nan monion i melel, pwe kom kotin padaki don ia duen omui majan pun.
8 I pan kanai on japwilim omui kujoned akan, kom der likidmaliela.
9 Iaduen, manakap amen pan kak weweid ni makelekel? Ma a pan wiawia duen ar majan akan.
10 I raparapa kin komui jan nan monion. i; kom der kotin mueid on, i en pup wei jan ni omui kujoned akan.
11 I kolekol omui majan nan monion i, pwe i ender wia dip on komui.
12 Kapin en ko on komui, Main Ieowa! Kom kotin padaki don ia omui kujoned akan.
13 I kajokajoi ki au ai duen kujoned en jilan omui karoj.
14 I kin peren kita al en omui kadede kan, dueta dipijou toto.
15 I pan madamadaua duen omui kujoned akan, o kanai on omui al akan.
16 I kin peren kida omui kujoned akan, i jota pan monokela omui majan akan.
17 Kom kotin kamauiada japwilim omui ladu, pwe i en memaur eta; i ap pan kapwaiada omui majan o.
18 Kom kotin kapad pajan maj ai, pwe i en kilan manaman akan nan japwilim omui kapun o.
19 Nai men kairu men nin jappa; kom der kotin karir jan mo i omui kujoned akan.
20 Nen i okilar ai inon ion omui kujoned akan anjau karoj.
21 Kom kotin onioni me aklapalap o, me pan wuki wei jan omui kujoned akan, en riala.
22 Kom kotin katoror jan ia namenok o me jued; pwe i kin apapwali ar kadede kan.
23 Pil jaupeidi kan kin momod pena, kaokao ad ai; japwilim omui ladu kin madamadaua duen omui kujoned akan.
24 Melel, i kin peren kida omui kadede kan, pwe ir me jaua pa i.
25 Nen i onon nan pwel; kamana ia duen omui majan.
26 I potoan on komui duen al ai kan, komui ap kotin mani ai er; kotin padaki on ia omui kujoned akan.
27 Kom kotin padaki on ia duen al en japwilim omui kujoned akan, i ap pan madamadaua duen ar manaman akan.
28 Monion i luet kilar ai injenjued; kom kotin kamana ia da duen ar majan.
29 Re kotin pera wei jan ia al en likam, o kotiki on ia ar majan.
30 I piladar al en melel; i kin madamadaua duen omui kujoned.
31 I kin teneti on omui kadede kan; Main Ieowa, kom der mueid on, i en namenokala.
32 Ma kom pan kotin kamaitala monion i, i pan tan wei nan al en omui kujoned akan.
33 Main Ieowa, kom kotin kawewe on ia al en omui kujoned akan, pwe i en apapwali lao lel imwi.
34 Kotin padaki on ia, pwe i en kolekol omui kapun o peiki on jan nan monion i.
35 Kalua ia nan al en omui kujoned akan, pwe i kin peren kin irail.
36 Kainonion monion i omui kadede kan, a der norok moni.
37 Pirer wei maj ai, pwen der kilan me jued kot; a re kotin kakel ia da pon al omui.
38 Kolekol omui inau on japwilim omui ladu, pwe i en majak komui.
39 Kotiki jan ia namenok, me i juedeki; pwe omui kujoned akan me mau.
40 Kotin mani, i kin inon ion ar majan akan; kakele kin ia omui pun.
41 Main Ieowa, kom kotin maki on ia, o kotin jauja ia duen omui inau.
42 Pwe i en aja, japen ir, me mamale kin ia, pwe i kin liki omui inau.
43 O kom der kotiki jan au ai majan en omui melel; pwe i kapororporki omui kujoned akan.
44 I pan kolekol omui kapun o anjau karoj kokolata.
45 I pan weweid ni peren, pwe i raparapaki omui kujoned akan anjau karoj.
46 O i pan kajokajoi on nanmarki kan duen omui kadede kan, ap jota namenok.
47 Pwe I kin peren kida omui kujoned akan, o i kin pok on ir.
48 I kin pokadan pa i kat omui kujoned akan, me i pok on, o i pan madamadaua duen omui kujoned akan.
49 Kotin tamanda japwilim omui ladu, duen omui majan, me i kin kaporoporeki.
50 I me kin kamait ia la ni ai luet; omui ianu kan kin kakel ia da.
51 Me aklapalap akan kin mamale kin ia; ari jo, i jota kin meui jan omui kapun o.
52 Main Ieowa, ma I lamelame duen omui kujoned akan jan nin tapin jappa, i ap injenamau kila.
53 I makar kila me doo jan Kot akan, me kin mui jan japwilim omui kapun o.
54 Omui kujoned akan, iei ai kaul en kapin nan ai im en kairu.
55 Main leowa, ni pon i kin madamadaua duen mar omui, o peiki on omui kapun.
56 Mepukat wiaui on ia er, pweki ai peiki on omui kujoned akan.
57 Main leowa, iet pwaij ai, en kolekol omui majan kan.
58 I kin nidinid on komui jan nan monion i; kom kotin maki on ia duen omui inau o.
59 I kin madamadaua duen al ai, ap kainen won omui kadede kan na i kat.
60 I kin nantion o jota pwapwand kolekol omui kujoned akan.
61 Pwin en me doo jan Kot akan kapil ia pena, ari jo, i jota monokela omui kapun kan.
62 Ni ailep en pon i kin paurida, pwen danke komui, pweki omui kujoned pun.
63 I kin waroki on ir karoj, me majak komui o ir, me apapwali omui kujoned akan.
64 Main leowa, jappa direki omui kalanan; padaki on ia omui kujoned akan.
65 Main leowa, komui me kotin wiai on japwilim omui ladu kamau kan duen omui inau o.
66 Padaki on ia tiak mau o lolekon, pwe i kin liki omui kujoned akan.
67 Mon ai aktikitikila, i kin japujapun, a met i kin apapwali omui majan.
68 Komui me mau o kapunlol, kotin padaki don ia japwilim omui kujoned akan.
69 Me aklapalap akan kin kalikama ia; a nai kin apapwali omui kujoned akan jan nan monion i.
70 Monion arail majul kila wi; a i kin peren kida omui kapun.
71 Meid mau on ia omui kaopampap ia la, pwe i en padakki omui kujoned akan.
72 Kapun jan nan jilan omui mau on ia, jan kold o jilper kid toto.
73 Lim omui kan kapik o wia ia dar, padaki on ia, pwe i en aja omui kujoned akan.
74 Me kin majak komui, pan kilan ia, ap peren kida, pwe i auiaui omui majan.
75 Main Ieowa, i aja, me omui kadeik kan me pun, o kom kotin kaopampap ia la ni omui melel.
76 Omui mak pan kamait ia la, duen me kom kotin inauki on japwilim omui ladu.
77 Kom kotin kupura ia, i ap pan memaur eta, pwe i kin peren kida omui kapun.
78 Me aklapalap akan en jarodi, pwe re japun on ia ni jokarepa; a nai madamadaua duen omui kujoned akan.
79 Me majak komui, ren waroki on ia, o me aja duen omui kadede kan.
80 Monion i en pun ni omui kujoned akan, pwe i ender jarodi.
81 Nen i kin inon ion omui dore ia la, i auiaui omui majan.
82 Por en maj ai kin anane omui inau, kalelapok: lad me kom pan kotin kamait ia la?
83 Pwe i luetalar rajon deun pil eu nan adiniai, i jota monokela omui kujoned akan.
84 Arai da, japwilim omui ladu pan memaurada? lad me kom pan kotin kadeikada ai imwintiti kan?
85 Me aklapalap akan weiradan ia por akai, irail me jota kin duki on japwilim omui kapun o.
86 Japwilim omui kujoned akan karoj me melel. Irail raparapakin ia ni jota karepa; kom kotin jauaja ia!
87 Me ekij, re pan kame ia la jan nin jappa, a nai jota mui jan omui kujoned akan.
88 Kamaur ia da duen omui kalanan, a nai pan kolekol kadede en jilan omui.
89 Main Ieowa, omui majan pan potopot eta nanlan.
90 Omui melel kin jan eu kainok lel eu; komui me kotin kajonedier jappa o a pan mimieta.
91 Irail karoj mimieta lao leI ran wet, duen omui kujoned akan, pwe karoj kin upa komui.
92 Ma omui kapun jota pan kaperen pa i, i pan mela ni ai luet.
93 I jota pan monokela omui kujoned akan kokolata, pwe ir me komui kakela kin ia da.
94 Nai japwilim omui, kom kotin jauaja ia! Pwe i inon ion japwilim omui kujoned akan.
95 Me doo jan Kot akan mamajan ia, pwen kame ia la; i kin apwali omui kadede kan.
96 I kilaner imwin meakaroj, a japwilim omui kujoned pan mimieta.
97 Ia wan ai pok on japwilim omui kapun! Nin ran karoj i kin kajokajoi due.
98 Kom kin kalolekon kin ia omui kujoned akan jan ai imwintiti kan, pwe irail pan ieian ia kokolata.
99 Nai lolekon jan ai jaunpadak kan karoj, pe I kin madamadaua duen omui kadede kan.
100 Nai lolekon jan me ma kan, pwe I kin apapwali japwilim omui kujoned akan.
101 I jota mued on na i, en weweid pol al japun, pwe i en kolekol omui majan.
102 I jota wuki wei jan omui kujoned akan, pwe kom kotin padaki on ia er.
103 Omui majan me iau jan onik nan au ia.
104 Omui kujoned akan kin kalolekon ia, i me i kin tataki al japun karoj.
105 Japwilim omui majan me jer pan na i, o kamarain pan al ai.
106 I kaukilar, me i pan kolekol omui kujoned pun kan, o i pan kapwaiada.
107 I injenjued melel; Main Ieowa, re kin kotin kamaur ia da duen omui inau.
108 Main Ieowa, kom kotin kupura kijakij en au ai, o kotin padaki on ia omui kujoned akan.
109 I kin wewa maur i nan pa I kat; i jota monokela omui kapun.
110 Me doo jan Kot akan injenjare ia, a i jota wuki wei jan omui kujoned akan.
111 Omui kadede kan iei ai jojo joutuk, pwe re kaperenda monion i.
112 Monion i kin inon ion kapwaiada omui kujoned akan anjau karoj kokolata.
113 I kin kailonki me lol riapot, o i kin pok on omui kapun.
114 Komui ai kadauk o pere pa i, i kaporoporeki omui majan.
115 Komail me jued akan en muei jan ia! I men apapwali kujoned en ai Kot akan.
116 Jauaja ia duen omui inau, i ap pan memaur eta; o kom der kotin mueid on, i en namenokala ni ai kaporopor.
117 Kamana ia da, i ap pan kelailada, i ap pan apapwali omui kujoned akan anjau karoj.
118 Kom kin kotin tiakedi karoj, me pan wuki wei jan omui kujoned akan; pwe arail japun me dir en likam.
119 Kom kin kotin kaje jan jappa me doo jan Kot akan karoj dueta jamit; i me i kin pok on ki omui kadede kan.
120 I kin majak komui, i me i kin mujerereki, o i kin majak omui kadeik kan.
121 I kin apapwali me inen o pun; kom der kotin pan ia lan ren me kin wia jued on ia.
122 Jauaja japwilim omui ladu o kamaitala i; me aklapalap akan ender jued on ia.
123 Por en maj ai inon ion omui kamaur ia, o omui inau pun.
124 Wia on japwilim omui ladu duen omui kalanan, o kotin padaki on ia omui kujoned akan.
125 Nai japwilim omui ladu; kotin padaki on ia, pwe i en dedeki japwilim omui kujoned kan.
126 Anjau leler, me Ieowa pan kotin wiawia; pwe irail kawala japwilim omui kapun.
127 I me i kin pok ki on japwilim omui kujoned akan, jan kold o kold linan.
128 I me i kin kajampwaleki japwilim omui kujoned akan karoj, i tata ki al en likam karoj.
129 Omui kadede kan meid kapuriamui, i me monion, i apapwali kin ir.
130 Ma omui majan pan janjalada, a pan kareda peren o lolekon on me opampap akan.
131 Au ai kin jar pajan o inon ion japwilim omui kujoned akan; pwe i kin anane ir.
132 Kom kotin wukedoke don ia, o maki on ia, duen me kom kin wiai on ir, me pok on mar omui.
133 Kotin kainenela al ai nan japwilim omui majan, o der mueid on, me jued kot en wiawia ia.
134 Kotin dore ia la jan mor jued en aramaj akan, a i ap pan kolekol omui kujoned akan.
135 Kotin kamarainiki omui ladu jilan omui, o kotin padaki on ia duen omui kujoned akan.
136 Por en maj ai me dir en pil, pweki ar jota peiki on omui kapun.
137 Main Ieowa, komui me kotin pun, o omui kujoned akan me pun.
138 Komui me kotiki on kit er kadede pan omui pun o melel, pwe i en nantion kapwaiada.
139 I injenjued melel, koren ion mela, pweki ai imwintiti kan monokela omui majan akan.
140 Omui majan meid makelekel, o japwilim omui ladu kin pok on.
141 Nai me tikitik o mo inn I amen, a i jota kin monokela omul kujoned akan.
142 Omui pun me pun joutik eu, o omui kapun me melel.
143 Majak o apwal lel don ia omui kujoned akan ai peren.
144 Pun en japwilim omui kadede kan me joutuk, padaki on ia, i ap pan memaur eta.
145 I nidinid jan nan monion i, Ieowa kom kotin mani ia! I pan apapwali omui kujoned akan.
146 I likwir won komui, kom kotin jauaja ia, a i ap pan kolekol omui kadede kan.
147 Nin joran i kodo o nidinid, i auiaui omui majan.
148 I kin pirida ni ailep en pon, pwen madamadaua duen omui majan.
149 Ereki nilai duenar kalanan; Main Ieowa, kamaur ia da duen omui kujoned akan.
150 Ai imwintiti jued akan koren ion ia, a re doo jan japwilim omui kapun.
151 Main Ieowa, komui me koren ion ia, o omui kujoned akan karoj me melel.
152 I aja jan maj o, me komui kajonedier japwilim omui kadede kan, pwen potopot eta.
153 Kom kotin ireron ai luet, o kamaio ia da! Pwe i jota monokela omui kapun.
154 Kotin apapwali ia, o dore ia la, o kamaur ia da duen omui inau.
155 Me doo jan Kot akan kin doo jan maur, pwe re jota kin ijenoki omui kujoned akan.
156 Omui kalanan meid laud, Main Ieowa; kom kotin kamaur ia da duen omui kujoned akan.
157 Me pakipaki ia, o palian ia me toto; ari jo, i jota wuk wei jan omui kadede kan.
158 I kin kilekilan me mor jued akan, ap pokela, o i kin juedeki, pwe re jota kin peiki on omui kujoned o.
159 Kotin majando, me i kin pok on japwilim omui kujoned akan; Main Ieowa, kotin kakel ia da, duen omui kalanan.
160 Omui majan me dir en melel, o majan en omui kapun pan duedueta.
161 Jaupeidi kan kin majamajan ia ni jokarepa; a monion i kin makaj omui majan akan.
162 I kin peren kida omui inau dueta amen, me diarada pai kajapwal eu.
163 I kailonki likam o juede kin irail, a i kin pok on japwilim omui kapun.
164 Pan ije pak i kin kapina komui ni ran ta ieu, pweki kujoned en omui kapun kan.
165 Me kin pok on japwilim omui kapun, kin popol melel, re jota pan jalonala.
166 Main Ieowa, i kin auiaui omui kamaur, o i kin peiki on japwilim omui kujoned akan.
167 Monion i kin kolekol japwilim omui kadede kan, o kin pok on irail melel.
168 I kin kolekol japwilim omui kujoned o kadede kan, pwe al ai kan karoj me janjal momui.
169 Main Ieowa, kotin mani ai nidinid, o kotin padaki on ia duen omui majan.
170 Re kotin mani ai kapakap, o dore ia la duen omui inau.
171 Komui lao padaki on ia omui kujoned akan, kil en au ai ap pan kapina komui.
172 Lo i pan kauleki duen omui majan, pwe omui kujoned akan karoj me pun.
173 Lim omui en jauaja ia, pwe i piladar omui kujoned akan.
174 Main Ieowa, i kin inon ion omui kamaur, o i kin peren kida omui kapun.
175 Kom kotin ieian nen i, pwen memaur eta ap kapina komui, o lim omui pali maun en jauaja ia.
176 Nai raj on jip amen me janjalon jili o jalonala; kom kotin rapaki japwilim omui ladu, pwe i jota monokela omui kujoned akan.