SENESIS
Oaralap en Pwuhk wet
Eden pwuhk wet, Senesis, wehwehki ‘tapi’. Eri, Pwuken Senesis iei koasoiepen kepikipikdahn mehkoaros me mi nanleng oh sampah, koasoiepen tepin aramas, pil tepin dihp oh lokolok nin sampah, oh pil duwen kupwur en Koht ong aramas akan. Pwuken Senesis kak pwalpeseng wiahda irair riau:
1) Ire laud 1-11 wia koasoiepen kepikipikdahn sampah oh mehkoaros nanleng, oh pil duwen poadopoad en aramas nin tapio. Eri, iei koasoiepen Adam oh Ihp, Kain oh Eipel, Noha, oh nohlik lapalapo; oh duwen kengkeng en imwen doulik nan Papilon.
2) Ire laud 12-50 koasoia duwen tepin semen mehn Israel kan kawao. Eri, iei keieun sahm Eipraam, me ndandkihla eh pwoson oh peikiong Koht. Mwuri, poadopoad en nah pwutak Aisek ahpw usehla, oh poadopoad en nein Aisek pwutak, iei Seikop (me pil adaneki Israel); a mwuri, koasoiepen nein Seikop pwutak ehk riemen me wia poahsoan en kadaudok eisek riaun Israel. Petehk mwahu pil wiawihong emen nein Seikop ko, ede Sosep, oh irair kesempwal kan me pweida ahnsowo me kahrehiong Seikop oh nah pwutak teiko ar soula oh kousoanla Isip.
Pwuhk wet wia poadopoad en aramas, ahpw me keieu kesempwal, e wia poadopoad en sapwellimen Koht wiewia kan. Pwuhk wet tepkihda koasoia duwen Koht eh ketin kapikada lahng oh sampah, oh imwikihla inou me Koht pahn ketin dadaurete, sapwellime inou en apwahpwalih sapwellime aramas akan. Wasa koaros nan pwuhk wet mwekid en Koht me keieu dehde, pwe iei ih me kin ketin kapwungala oh kaloke aramas akan me kin wiahda sapwung, e kin ketin kahluwa oh sewese sapwellime aramas akan, oh ketin wiahda poadopoad arail. Pwuhk wet wiawihda pwe en koasoia duwen pwoson en mehn Israel kan oh sewese kakairada pwoson wet.
Audepe ni Oaralap
Kepikipikdahn mehkoaros oh pil aramas 1.1—2.25
Tepidahn dihp oh lokolok 3.1-24
Sang Adam lel Noha 4.1—5.32
Noha oh nohlik lapalap 6.1—10.32
Kengkeng en imwen doulik nan Papilon 11.1-9
Sang Sehm lel Eipram 11.10-22
Ohlen kawa ko: Eipraam, Aisek oh Seikop 12.1—35.29
Kadaudok en Esau 36.1-43
Sosep oh rie ko 37.1—45.28
Mehn Israel ko nan Isip 46.1—50.26
1
Poadopen Kepikipikdahn Mehkoaros
1 Ni ahnsou me Koht tepin kapikada sampah oh mehkoaros me mi pahnlahng,
2 sampah me liseliping de sohte mwomwe. Rotorot kipe wasa loal kan, oh ngehn en Koht kin ketiketseli pohn pihl kan.
3 Koht eri ketin mahsanih, “Marain en miehla”—marain ahpw pwarada.
4 Koht eri kupwurperenkihda lingan en maraino. E ahpw ketin katohrepeseng maraino oh rotorot,
5 oh ketikihong eden maraino, “Rahn,” a eden rotoroto, “Pwohng.” Eri, pwohngo imwiseklahr oh marain en rahn pwarodohr—iei met wadepen keieun rahn.
6-7 Koht pil ketin mahsanih, “Pwalang ehu en miehla pwe en irepeseng pihl kan ong ni wasa tohrohr riau”—eri, e ahpw pweida. Koht eri ketin wiahda pwalang en lahng ehu me katohrepeseng pihl kan me mi pah oh powe.
8 Koht eri ketikihong eden pwalango, “Lahng.” Eri, pwohngo imwiseklahr oh marain en rahn pwarodohr—iei met wadepen keriaun rahn.
9 Koht pil ketin mahsanih, “Pihl kan me mi pahnlahng en kohpene wasateieu, pwe pwehl madekeng en pwarada”—eri, e ahpw pweida.
10 Ih eri ketikihong eden pwehl madekengo “Sahpw,” a pihl kan me kohpene wasatehkis “Madau.” Koht eri kupwurperenkihda wiepen nin lime wet.
11 E ahpw pil mahsanih, “Sahpw en kawosehda soangen tuhke koaros me kin kapwarehda wah laud oh wah tikitik”—eri, e ahpw pweida.
12 Eri, sahpw ahpw tapihada kawosehda soangen tuhke koaros me kin kapwarehda wah laud oh wah tikitik. Koht eri kupwurperenkihda wiepen nin lime pwukat.
13 Eri, pwohng imwiseklahr oh marain en rahn pwarodohr—iei met wadepen kesiluhn rahn.
14 Koht pil ketin mahsanih, “Marain kei en miehla pahnlahng, mehn irepeseng rahn oh pwohng, oh mehn kilelehdi ahnsou me rahn akan, sounpar akan, oh iren ahnsou kan pahn kin tepida;
15 re pahn kin lingaling pahnlahng oh kamakamarainih sampah”—eri, e ahpw pweida.
16 Koht eri ketin wiahda marain kalaimwun riau, iei ketipin me pahn kin kakaun nin rahn, oh maram me pahn kin kakaun nipwong; e pil ketin wiahda usu kan.
17 E ketikidahng marain pwukat pahnlahng, pwe re en kin dakedaker sampah,
18 kakaun rahn oh nipwong kan, oh ireirepeseng marain oh rotorot. Koht eri kupwurperenkihda wiepen nin lime pwukat.
19 Eri, pwohngo imwiseklahr oh marain en rahn pwarodohr—iei met wadepen kapahieun rahn.
20 Koht pil ketin mahsanih, “Soahng koaros me kin mie ar mour en audehla pihl akan, oh menpihr kan en audehla pahnlahng.”
21 Koht eri ketin kapikada mwahmw kalaimwun kan, oh soahng mour koaros me kin kousoan nan pihl, oh soangen menpihr koaros. Koht eri kupwurperenkihda wiepen nin lime pwukat.
22 E ahpw ketin kupwuramwahwih irail koaros, mahsanih, “Kumwail koaros me momour nan pihl oh nansed, kumwail en kaparaparala oh audehla madau kan, a menpihr kan en pil tohtohla.”
23 Eri, pwohngo imwiseklahr oh marain en rahn pwarodohr—iei met wadepen kelimaun rahn.
24 Koht pil ketin mahsanih, “Pwelin sampah en kapwarehda soangen mahn mand oh lawalo koaros oh soangen mahn laud oh tikitik koaros”—eri, e ahpw pweida.
25 Koht eri ketin wiahda soangen mahn pwukat koaros. E ahpw kupwurperenkihda wiepen nin lime pwukat.
26 Koht eri pil ketin mahsanih, “A met kitail pahn wiahda aramas; kitail pahn wiahda aramas rasehng kitail. Re pahn ahneki manaman en kaunda mwahmw akan, menpihr kan, mahn mand oh lawalo, mahn laud oh tikitik koaros.”
27 Koht eri ketin wiahda aramas; e ahpw ketin wiahda aramas rasehng ih. E ketin wiahda ohl oh lih,
28 oh kupwuramwahwih ira, mahsanih, “Kumwa kaparaparala pwe kadaudokamwa kan pahn kousoanla wasa koaros nin sampah oh kaunda mehkoaros. I kihong kumwa manaman en kaunda mwahmw akan, menpihr kan oh mahn lawalo kan koaros.”
29 Koht ahpw pil ketin mahsanihong ira, “Kumwa kilang pwe I kihong kumwa met soangen tuhke koaros me wararail kin mie, oh soangen wahntuhke koaros, pwe kumwa en wiahki amwa mehn tungoal;
30 a ong mahn lawalo kan oh pil ong menpihr kan, I kihong tehntuhke kan oh kisintuhke kan pwe re en kin kangkang”—eri, e ahpw pweida.
31 Koht eri inenen kupwurperenkihda wiepen nin lime pwukat koaros. Eri, pwohngo imwiseklahr oh marain en rahn pwarodohr—iei met wadepen keweneun rahn.