142
Kapakap en Peki Sawas
1 I likweriong KAUN-O pwehn ketin sewese ie;
oh ngidingidki ei pekipek.
2 I patohwanohng ei kaulim kan koaros;
I patohwan wehkadahng ei apwal akan koaros.
3 Ni ngeniet e mwoatohtalahr kowahlap,
e mwahngih dahme konehng I en wia.
Ei imwintihti kan ekihla lidip ehu mehn lidipihiehdi,
nan ahl me I kin weweid ie.
4 Ni ei kilikilengseli limwahi
I kilang me sohte mehmen me kak sewese ie,
sohte mehmen me kak sinsile ie.
Sohte mehmen me kesempwal kin ie.
5 Maing KAUN, I patohwan likweriong komwi pwe komwi en ketin sewese ie;
komwi maing KAUN, iei komwi, me silepei;
komwihte me I anahne nan mour wet.
6 Komw ketin karonge ie ni ei pek sawas,
pwe I kihrlahr nan apwal.
Komw ketin doareiesang ei imwintihti kan;
re me nohn kehlail sang ie.
7 Komw ketin kasaledekihiehla sang nan ei pwunod akan;
eri I ahpw pahn kapinga komwi ni pokon en sapwellimomwi aramas akan
pwehki omwi ketin kupwur mwahu ong ie.