45
Koulen Kapwopwoud ong Nanmwarki men
1 Pato kaselel kei kipedier nan mohngiongiet,
ni ei pahn wiahda ei koulen kaping ong nanmwarki.
Loweiet pahn rasehng nein sounnting pinsel
ni ei pahn koulki melkahka pwoatet.
2 Komwi me keieu masamwahu nanpwungen ohl akan;
sang ni doauasomwien mahsen lingan kin pwilipwilsang.
Koht kin ketin kupwuramwahwih komwi ahnsou koaros.
3 Nanmwarki roson, komw ketin kapwatahkinkomwihda sapwellimomwi kedlahs;
komw meid diren roson oh lingan kowalahpie!
4 Ni roson lapalap komw ketin wonowohng omwi lingan en powehdi,
pwe komwi me kin wia soundoarepen me pwung oh mehlel!
Omwi powehdi kowahlap pahn sang ni sapwellimomwi roson!
5 Sapwellimomwi arep keng kan
pahn lelete pwar mohngiong en sapwellimomwi imwintihti kan;
wehi kan kin poaridi pahn aluweluwomwi kan.
6 Wehio me Koht ketikihong komwi
pahn kin poatopoat kohkohlahte.
Komw kin ketin kakaun sapwellimomwi kan ni me pwung;
7 komw kin ketin poakohng dahme pwung oh kin ketin kalahdeki me suwed.
Ihme kahrehda Koht, omwi Koht, ketin pilkomwidahr
oh ketin kapwildier pohmwi peren
laudsang me e ketikihong nanmwarki teikan.
8 Sapwellimomwi likou kan pwohmwahuki pwohn mir oh alos;
sounkeseng kan kin kamwakamwait komwi nan tehnpas lingan akan me kapwatki aipori.
9 Sapwellimen nanmwarki serepein kan me wia erirpen mwoalomwi,
oh sapwellimomwi likendo me uh ni pali maun,
kapwatki kohl kaselel.
10 Maing likend en nanmwarki, komw karonge mahs dahme I pahn patohwan—
komw ketin meliehla sapwellimomwi kan oh kisehmwi kan.
11 Sapwellimomwi lingan me pahn kahrehiong nanmwarkio eh pahn inengieng komwi;
ih me omwi kaun, komwi uhdahn pahn kin peikiong.
12 Mehn Dair kan pahn patohwandohng komwi ar kisakis kan;
me kepwehpwe kan pahn kin song en alkenkenla rehmwi.
13 Sapwellimen nanmwarki serepeino patopato nan tehnpaso—ia uwen eh kaselel!
Kohl me wia dereht en eh likou.
14 Ni eh kapwatkihda soangen kapwat kaselel pwukat, eh ahpw pakahrlahng rehn nanmwarkio,
ni kapar en erir, iangahki pwihn en meipwon akan;
irail koaros pil pakahrlahng rehn nanmwarkio.
15 Re ahpw nsenamwahu oh pereperen
patohlong nan tehnpas en nanmwarki.
16 Maing ei nanmwarki, komw pahn ketin sapwellimanikihla pwutak tohto
me pahn wiliandi omwi pahpa kahlap ako nin duwen nanmwarki kei,
oh komw pahn kasapwilirailda pwe re en kaunda sampah pwon.
17 Ei koulet pahn kalaudehla kapingpen mwaromwi kohkohlahte,
oh aramas koaros pahn pil kapinga komwi ni ahnsou kan me pahn kohdo.