8
Yesu Mtambika gwetu mkulu
1 Su shitwatira sha mana ndo ashi shatulonga, twenga twanayu mtambika mkulu gwa ntambu ayi, mweni kalikali uwega wa kumliwu mwa shibanta sha Utuwa sha Ukulu kumpindi.
2 Yomberi kankutenda lihengu lya Mtambika Mkulu pahala pananagala nentu, yani mngati mwa lipamanda lilii lya nakaka lyalinyawitwi na Mtuwa, kumbiti na muntu ndiri.
3 Kila Mtambika Mkulu kasyagulwa kumlavilira Mlungu malaviwu na tambiku, na hangu mtambika mkulu ayu mpaka nayomberi kaweri na shintu cha kulaviya.
4 Handa yomberi mekaweri gwa pasipanu mekaweri ndiri nakamu mtambika, tembera kwana watambika wamonga yawalaviya tambiku kulawirana na Malagaliru Mlungu gakamupananiti Musa.
5 Weni utambika wawu uweriti mfanu na shivuni sha galii yagawera kumpindi. Toziya Musa pakaweriti sambira kulinyawa lipamanda lilii, Mlungu kamgambiriti, “Gunyawi kila shintu ntambu yanukulanguziyiti shipindi paguweriti kulugongu kulii.”
6 Kumbiti vinu Yesu wampanana lihengu lya utambika yawuwera uherepa kuliku wa womberi, su kawera mkolaniziya wa lipatanu liherepa lyakalyanjiti kwa malagilu gaherepa.
7 Toziya handa lipatanu lilii lya kwanja meliweri lyahera likosa, meliweri ndiri na nfiru ya lipatanu lya pili.
8 Kumbiti Mlungu kawawona na makosa pakalongiti,
“Mtuwa kalonga, mashaka gankwiza,
Peni hantendi lipatanu lya syayi na wantu wa Israeli na wantu wa Yuda.
9 Lipatanu ali haliweri ndiri gambira lilii lyalitenditwi na wambuyi wawu
lishaka panuwakoliti liwoku lyawu, nuwalonguziyiti kulawa Misri.
Waweriti ndiri wajimirika mulipatanu lyangu,
na hangu neni nuwashera ndiri.
10 Na ali ndo lipatanu hanulitendi na wantu wa Israeli,
mashaka gankwiza,
hantuli malagaliru gangu mumahala mwawu,
na kulilemba mumyoyu mwawu,
na neni haweri Mlungu gwawu,
na womberi hawaweri wantu waneni.
11 Kwahera muntu yakamfunda muyaguwi,
ama hakamgambiri muyaguwi,
‘Gummani Mtuwa.’
Toziya woseri hawamani neni,
wantu yawamanika na wantu yawamanika ndiri.
12 Hanuwalekiziyi matendu gawu gadoda,
na hapeni nuviholi kayi vidoda vyawu.”
13 Pakalongiti kwa lipatanu lya syayi, Mlungu kalisakaziya lilii lya kwanja, na shoseri shashisakaziwa na kuwera shigona sambira hashiwuki.