17
Kuindoxin xranchi tsjeꞌeni ndo Jesús
(Mr. 9:2-13; Lc. 9:28-36)
1 Kuatsingaja ikjaon nchakon ndo Jesús sabikao ndo ndo Pedro ko ndo Jacobo ko ndo Juan, ndo kichuu ndo Jacobo; jeꞌo sen ikjui sen naa ijna̱ tsango noi.
2 Ntiꞌa ste sen ko tuinxin bikon sen ixi kuindoxin ndo Jesús. Ikon ndo jitóngíxin xranchi chjiixro ko manta jitsáa ndo tjúá manta xranchi naa xroꞌi tóngíxin.
3 Ko kaxon bikon sen ntiꞌa jii ndo Moisés ko ndo Elías stetjao sen ndo Jesús.
4 Tjumeꞌe ndo Pedro ndache ndo ndo Jesús:
―Nchána, chao ndatsojuna ntiꞌi. Ko siá tjaunnta sintáñana níi nchia, naa nchia jaꞌanta ko naa nchia ndo Moisés ko naa nchia ndo Elías.
5 *Ko xrajinichja ndo Pedro, naa itjui̱ tsango jitóngíxin kuitsía sen ko ngakjenꞌen itjui̱ meꞌe kuinꞌen sen naa tée inaa sen nichja ko ndachro sen jaꞌin:
―Jiꞌin chjanꞌna tsango tjuaꞌa ko tsango juaxruxin ritjén ixi ixra̱ jincheꞌe jeꞌe xjan. Titikaonnta ngeꞌe nichja xjan.
6 Hora kuinꞌen sen chrikao ndo Jesús, tuinxin bakeꞌexin ntatuchiꞌin sen ko bakeꞌe ikon sen ngataꞌa inche ixi tsango xronka sen.
7 Tjumeꞌe ndo Jesús konchjiñeꞌe ndo ngajin sen, bakeꞌe itja ndo ngataꞌa sen ko ndachro ndo:
―Tingatjennta ko xrakonꞌanta.
8 Ko tuinxin ikjan tsjeꞌe sen ti no jii ndo Jesús ko xroꞌan ngisen bikon sen jikao ndo.
9 Ko hora xingajinxin sen ijna̱, ndo Jesús kuetuenꞌen ndo sen:
―Xroꞌan ngisen tekiꞌénta ngeꞌe bikonta jai, hasta ti xroxechónjan Chjenꞌen ndo Dio, xjan jongíꞌe xranchi chujni.
10 Ko sen teyuu chrikao ndo Jesús juanchangiꞌe sen ndo:
―¿Sonda ndachro sen tjako ley kuituanꞌan ndo Dio, ixi saꞌó tsi̱i̱ ndo Elías ko tjumeꞌe tsi̱i̱ ngisen tsajon juachaxin tsechón chujni kain nchakon?
11 Ko ndo Jesús juatingíexin ndo:
―Nduaxin meꞌe, saꞌó tsi̱i̱ ndo Elías ixi jeꞌe ndo sinchekonchjian ndo kain ngeꞌe.
12 *Ko janꞌan nduaxin xrontatjunta ixi ndo Elías ó kui̱i̱ ndo, ko chujni kuichúxinꞌa na̱ ndo, méxin chinga juinchekaon na̱ ndo. Ko janꞌan Chjenꞌen ndo Dio, xjan jongíꞌe xranchi chujni, jaña sinchena̱na kaxon ko tsango sinchenína na̱.
13 Meꞌe sen teyuu chrikao ndo Jesús kuienxin sen ixi jeꞌe ndo jinichja ndo ixi ndo Juan bikitée chujni.
Ndo Jesús juinchexruenꞌen ndo naa chjan chónda naa espíritu ñaꞌi
(Mr. 9:14-29; Lc. 9:37-43)
14 Ko naa nchakon kuiji sen ti jii tsango itsjé chujni, meꞌe konchjiñeꞌe naa xi, xi meꞌe bakeꞌexin ntatuchiꞌin xa ngajin ndo Jesús ko ndachro xa:
15 ―Nchána, tikonóeꞌénta chjanꞌna ixi jeꞌe xjan chonda xjan ichin tendaa ko tsango tangi tonꞌen xjan. Nanaunka titsinga xjan ngataꞌa xroꞌi ko ngangi inda.
16 Bikian xjan ntiꞌi ko sen chrjikuꞌunta juaꞌi juinchexruenꞌen sen xjan.
17 Ko ndo Jesús ndache ndo sen teyuu chrikao ndo:
―Jaꞌanta chujni ndakoꞌa xraxaon ko titikaonꞌaninta janꞌan. ¿Ti ngisa xrokonda tsakeꞌe ngajinnta?, ko, ¿ti ngisa tsokuaxinna ngeꞌe ncheꞌenta? Kuaxinta xjan ndaꞌi.
18 Ko tjumeꞌe ndo Jesús kuyakutee ndo espíritue xi ñaꞌi ko tuinxin espíritu meꞌe kuachrjexin xjan ko ndakoxruenꞌen xjan.
19 Tjumeꞌe sen teyuu chrikao ndo Jesús ndáꞌa kuiyeꞌe sen ndo ko juanchangiꞌe sen ndo:
―¿Sonda janꞌanna juaꞌi kuantsjena espíritu ñaꞌi?
20 *Meꞌe ndo Jesús juatingíexin ndo:
―Jaꞌanta chuntiaꞌininta. Ko janꞌan nduaxin ntatjunta siá jaꞌanta jeꞌo xrochuntianinta naanchion xranchi naa tse̱e̱ ntamostaza tsango nchíín tse̱e̱, meꞌe chao xrondachenta jna̱ jiꞌin: “Ndáꞌa tjia”; ko jaña xrokonꞌen ixi ijna̱ xrokuitikaon jna̱. Ko siá nduaxin xrochuntianinta, chao sincheꞌenta kain ixra̱ tsetuanꞌannta.
21 Ixi kain espíritu kichuu ña̱ jeꞌo tachrjexin siá nduaxin xronichjaꞌnaninta kain nchakon ko sinchekatse ñaonta jinta.
Íjngo chronga ndo Jesús ixi tsenꞌen ndo
(Mr. 9:30-32; Lc. 9:43-45)
22 Xrasteyáa sen chaꞌo nunte Galilea, ndo Jesús ndachro ndo ixi jeꞌe ndo Chjenꞌen ndo Dio, xjan jongíꞌe xranchi chujni, xrotsé na̱ ndo ko tsikao na̱ ndo ngajin ni tetuanꞌan,
23 ko naatsóñaxón na̱ ndo. Ko nchakon nínxin xrokonda xroxechón ndo. Ko ti ndachro jeꞌe ndo tsango juincheniꞌe aséen sen teyuu chrikao ndo.
Ndo Jesús juenga ndo ꞌna̱ ti juanchia na̱ kondee niꞌngo
24 Nchakon ndo Jesús ko sen teyuu chrikao ndo kuiji sen tjajna Capernaum, ni xengeꞌe ꞌna̱ neꞌe niꞌngo kuitsjeꞌe na̱ ndo Pedro ko juanchangiꞌe na̱ ndo:
―Ndo ntakuanꞌannta, ¿á tjenga ndo ꞌna̱ tomi neꞌe niꞌngo?
25 Ko ndo Pedro juatingíexin ndo:
―Jaán, tjenga ndo ꞌna̱.
Ko hora ndo Pedro kuixinꞌin ndo nchia ti ste kain sen, ndo Jesús saꞌó nichja ndo ko ndachro ndo:
―Ndachijiana, Pedro, xi tetuanꞌan ngataꞌa nunte ntiꞌi, ¿ngisen tjancheꞌe xa ixi xrokonda tsjenga na̱ ꞌna̱? ¿Á ni tjajnée xa o̱ ni tsiki̱ꞌxi̱n inaa tjajna?
26 Ko jaꞌin juatingíexin ndo Pedro:
―Ni tsiki̱ꞌxi̱n inaa tjajna.
Ko ndachro ndo Jesús:
―Sen tjajnée xrokondaꞌi tsjenga sen ꞌna̱.
27 Ko ixi tjaunꞌa tsoñao na̱, itjia ti jii ndachaon ko tjankaꞌngia chika tséxinni kuchee̱ ko kuchee̱ saꞌó xrotsé, tantjeꞌe roꞌa ba, ko tsinchia naa tomi ko tomi meꞌe tjenga ꞌna̱ ti tikinixin janꞌan ko jaꞌa.