2
Tsjako ndo Tito chijni jian
1 Kain ngeꞌe tsjakoa xrokonda jian sinchekuenꞌen sen xranchi jitaxin chijnie ndo Dio.
2 Nchekuenꞌén sen tachríi ixi xrokuanꞌi sen, jian sincheꞌe sen ko jian xronichja sen ngajin kain chujni. Xroxraxaon sen jian, ko jian xrochuntia sen, ko xrotjueꞌe sen sen kichuu sen ko takaꞌi xrochjée sen juañao.
3 Ko kaxon jaña janachri jian sincheꞌe jan ko xronichjaꞌi jan juancheya ko xrokuanꞌi jan. Jian tsjakoxin jan ixi titikaon jan Ncháina,
4 ixi jaña tsjakoꞌe jan nchrichajan xranchi xrotjueꞌe nchra ndoxiꞌe nchra ko xranchi xrotjueꞌe nchra chjenꞌen nchra,
5 ko jian xroxraxaon nchra, ko tjúá aséen nchra tayakonꞌen nchra ndoꞌa nchra ko tsingijna nchra kain chujni, ko tsitikaon nchra ndoxiꞌe nchra ixi jaña xroꞌan ngijni xronichjangíꞌe chijnie ndo Dio titikaꞌonna.
6 Kaxon nchexraxaoan sen chajan ixi jian sincheꞌe chán ko jian xroxraxaon chán.
7 Jaꞌa jian ncheꞌe kain ngeꞌe ixi jaña tsjakoxian ngajin kain sen ixi jaꞌa jian. Ko nchakon tsjakoa, chjenteꞌa ko tjakoa ti nduaxin.
8 Nichja ngeꞌe nduaxin ixi xroꞌan chujni tsjankataꞌa na̱ ijie̱, ko jaña tsosueꞌe ni ningakonꞌen chijni, ko xroꞌan ngeꞌe ti ñaꞌi xrondachro na̱ kondee jai̱na.
9 Tetuenꞌén ni ncheꞌe ixra̱ ixi tsitikaon na̱ nchée na̱ ixi jian sincheꞌe na̱ ti kuetuenꞌen na̱ ko xronichjangíꞌa na̱,
10 ko xrotse̱eꞌa na̱ ngeꞌe jeꞌa neꞌe na̱. Ko jaña kain na̱ tsikon na̱ ixi chijnie ndo Dio tsango chaxro chijni ko tajon ndo juachaxin tsechónni kain nchakon.
11 Ixi ndo Dio juakoi̱na ndo xranchi tjuai̱na ndo ixi jeꞌe ndo sincheméꞌe ndo jíee kain chujni sínká.
12 Ti tjuai̱na ndo Dio nchekuai̱na ixi tsintuꞌena kain ti ndakoꞌa ko kain ngeꞌe ñaꞌi xraxaonna. Ko jian tsakeꞌena nunte xasintajni ko ndako xroxraxaonna ko tsitikaonna ndo Dio.
13 Kaxon tjakoi̱na ndo xranchi xrochonꞌenna nchakon tsi̱i̱ ndo Dio naꞌina, ndo Jesucristo, ndo chónda kain juachaxin ko tajon ndo juachaxin tsechónna kain nchakon.
14 *Jeꞌe ndo kuenꞌen ndo ixi jai̱na ixi tjaun ndo tsajon ndo juachaxin tsechónna kain nchakon ixi kuantsje ndo kain ti ndakoꞌa chondana, ko tjumeꞌe tsayéꞌena ndo xranchi naa chujnie ndo ko juaxruxin sintuꞌuna kain ngeꞌe tjaun ndo.
15 Tito, jiꞌi tjakoꞌé sen ko nchexraxaoan sen ko tetuenꞌén sen ixi juachaxien ndo Dio. Tintueꞌa ixi xrojan ngisen xronichjangíꞌa ko tsjanoa sen ixi ngeꞌe tjakoa.