3
Il ob viac myad i nivɨha
1 Xam lige, xam o lêc nêl bê xam tɨbeac ob tu xomxo xolac nêlên lêm, ên il xovô bê buc tɨmuên wê Anutu obêc tɨtô il nêd kɨyang ge od obêc pɨlii xe wê xomxo xolac nêlên ge, xe nêm kɨyang lê, lêc vông myavɨwen nipaên vô xe luu xomxo baba vêl.
2 Il vɨhati mi vông môp soên, lêc xomxo ti obêc nêl kɨyang nivɨha dɨ ti soên ma ge od xomxo tibêge nivɨha yang, tɨyi wê ob viac i ninɨvi yuu môp vɨhati nivɨha êno ge.
3 Xam xovô lê. Il obêc tung ain nipwo tya vac xôhô mya ge od il ob pop xôhô nôn levac tige ya susu nipwo tya gedɨ i la bôbac vô môp wê il nêb il ob la vô ge.
4 Dɨ xam xovô lec sip êno. Sip ge susu mabu yocên lê, lêc obêc le pɨleva ge od lea obêc kô mɨ la vac gwec. Dɨ sip stia ge susu nipwo tya lê, lêc xomxo ti wê mi kô sip ge obêc hôm lec mɨ ngɨbina ge od sip la bôbac vô môp ti wê nêb ob la vô ge.
5 Dɨ get êno bêge. Il get ge nipwo tya, lêc yong i tɨyi xocbê susu levac ti.
Dɨ xam xovô lec ngwax. Ên ngwax nipwo tya tɨyi wê ob ya nagyi levac ma vêl.
6 Dɨ il get ge tɨyi xocbê ngwax. Ên il get wê dô vac il myad ge keac kɨyang nipaên tɨbeac dɨ vông il nidnɨvi vɨhati vô nipaên. Seten vaci vông nipaên vac il get, mêgem tum mahelac xocbê ngwax ge lec il nêd môp dɨ ya i vô nipaên.
7 Xomxo tɨyi wê ob kô bwoc vɨmen yuu menac dɨ myel yuu lɨlii wê dô vac nita dɨ dô vac mia ge vɨyang vɨyang dɨ vông he vô malehe lec ge, om xomxo mi vông bêge.
8 Lêc xomxo ti o tɨyi wê ici va ob vông get vô malehe lec ge lêm. Ên il get mi nêl kɨyang nipaên vaxvax tɨbeac om nipaên tige la vông xomxo nɨlô vuac dɨ hɨbu sea.
9 Il pɨmil Mag Apumtau ya il get lê, nang dêc il get so vya vô xomxo wê Anutu tung he tɨyi ici va kɨnu ge.
10 Om kɨyang yuu lam vac il myad tibed. Ngwe, il pɨmil Anutu, dɨ ngwe, kɨyang nipaên. Xam lige, môp bêge tɨyiên ma vêl.
11 Mia numên yuu mia gwec, yuu xôn o pɨtuv vac malɨyuhu tibed lêm.
12 Xam lige, kwacsung mêd tɨyi wê ob vuac nôn hɨguc ge, me? Me xeb tɨyi wê ob vô nôn xocbê gulac nôn ge, me? Ma vêl. Dɨ gwec êno o tɨyi wê ob pɨlepac mia numên ge lêm. Om xam xovô bêga bê xomxo wê kɨyang nipaên yêp vac i nɨlô ge od ob nêl kɨyang nipaên, dom xomxo wê kɨyang nivɨha yêp vac i nɨlô ge od ob nêl kɨyang nivɨha.
Pɨyôp yuu xovôên nivɨha lam vô Anutu
13 Xomxo wê pɨyôp yuu xovôên nivɨha ge od i lêc tup vô môp nivɨha dɨ i o lêc yong i lêm, êdêc xomxo i yê dɨ xovô bê i xomxo xovôên nôn.
14 Lêc xam obêc dô hɨxôn nɨlôm nipaên vô xomxo ya dɨ xam obêc xovô nêbê xam ob vông i tɨyi wê xam nɨlôm xovô ge ên i vô nivɨha vô xacxam va ge, od xam o lêc yong xam bê xam pɨyôp levac lêm, ên ge xam pwoo kɨyang nôn dɨ nêl kɨyang kɨtyooên.
15 Ên xovôên tibêge o lam gê lag puunê vô Anutu lêm. Nge, ge nipaên kɨbun ga wê xomxo nɨlô xovô dɨ Seten vaci tu kehe ge.
16 Ên xomxo obêc dô hɨxôn nɨlô nipaên vô xomxo ya, dɨ obêc xovô nêbê he ob vông i tɨyi wê he nɨlô xovô ge ên i vô nivɨha vô heche va ge od he ob dô vac nivɨha ti lêm. Nge, he ob dô vac vɨyin dɨ nipaên vɨyang vɨyang obêc hɨvun he xôn.
17 Lêc xomxo wê kô xovôên nivɨha vô Anutu ge od ob vông môp bêga bê nipaên ti o yêp vac he nɨlô lêm, dɨ he dô vac malehe, dɨ he lum nêl kɨyang vôma, dɨ he vô nɨnya lehe vô lie kɨyang, dɨ he xo vɨgwe pɨsiv ên xomxo dɨ vông môp nivɨha vô he, dɨ he vông môp nivɨha vô xomxo vɨhati tɨyima, dɨ he vông i vin nôn dɨ o nêl ya mya pɨleva lêm.
18 Dɨ xomxo wê nêl kɨyang malehe vô lie ên nêb he xôn ob dô hɨxôn xêyaa nivɨha ge, ge tɨyi xocbê he xin vê vac yuac om vê tige obêc tyip mɨ vô nôn nivɨha.