37
Josepa ivi matu.
1 Jeikap na ina mamai meni dobunai imakamakai na nani dobunai imakai, dobuna na Keinan.
2 Weni tuna na Jeikap ma natunatuna i varagutugutu. Natuna Josepa na ghamoghamo kana koyakoyagha, varevaresina yavata ikoyakoyaghisi. Tuna na yaragina, kana madegha 17 ma ti na iyarokosi, ina mamai kakawana Biliya da Silpa natunatusi. Mara sago i ghamoghamo ikoyakoyagha na Josepa varevaresina i bera ikitai ma ke iti vaghinei, tuna kubiine inae ma i berabero peyarina i mamai kurina ivi mamatarei.
3 Ma i mamai Jeikap na ina nuwaviina ghamana Josepa, ke natunatuna viya nakanani, iyamna imagura kirakai ma ivi tuwei. Mara sago Josepa kana tarasovo biibiina iyamoni da iverei. Tuna garana na gurina ma kirukirumina, ma imana gurigurina.
4 Varevaresina nani garana ikitai na damina iviiya da i mamai ina nuwaviina Josepa kurina irakata kirakai, ma ti kurisi na kegha. Tuna kubiine inuwanuwapughuwei da ke sisiya pikanai ita vivisisiya kurina.
5 Didibara sago Josepa ivi matu ma inae da varevaresina ivi akovisi na varevaresina inuwapughu kamokamowi.
6 Ivonesi bo, “Kovi yana ma aku matu ani sisiyei.
7 Peyarita witi vaona kamonai witi tabawabawa ma kadeni ma aku bawa ivomiiri da basunai ivi kiimiiriyei ma peyarimi ami bawa iriyei da aku bawa imiiriviviri da irurunomei.”
8 Ma varevaresina ivonei bo, “Tam kenotanotai da kuni kiivavo da kuni badekai bo?” Ma ina matu ma ikikava ivi sisiyei kubiine na varevaresina nakeda inuwapughu kamokamowi.
9 Muriyai Josepa ivi matume na bade varevaresina ivi akovisi, ivonesi bo, “Aku matu kamonai akitai da madegha da nawaravi ma gwamegwame ivi 11 irurunomeku.”
10 Ma bade ina matu na ina mamai kurina ivi mamatarei. Ma ina mamai iyeghai ma ivonei bo, “Weni tuna na avi matuna kukenei? Tam kenotanotai da am maduwa da taku ma varevaresim kana runomem, bo?”
11 Ma vaghina, Josepa varevaresina inuwakapiyei ma ina mamai na weni berana ivi nuwanotanota kirakiiyei.
Josepa varevaresina ivi gimarei.
12 Mara sago Josepa varevaresina inae ku Sekem da i mamai ina ghamoghamo ikoyakoyaghisi.
13 Muriyai Josepa ina mamai ikwatui ma ivonei bo, “Ana vonatawem kuna nae ku Sekem da varevaresim ghamoghamo ekoyakoyaghisi na kuna kitisi.”
Ivonapotei bo, “Vaghina, ana nae.”
14 Vaghina ina mamai ivonei bo, “Kenae da varevaresim kuna kitisi da ti na yawayawasisi bo kegha. Ma bade ghamoghamo kekitisi da ti na vaghina bo kegha. Ma kuna vovira da kuni akoviku.” Ma vaghina Hibron anaghinai ivomiiri inae da ku Sekem inekiibau.
15 Ma warereyai ibababa yawara na tomowa sago ikitai na tomowina ivi tarakiiyanei bo, “Aviyavisina kekwekwai?”
16 Ma Josepa ivonapotei bo, “Varevaresiku aekwekwisi. Kade kuta voneku da ti na meni dobunai ghamoghamo ekoyakoyaghisi.”
17 Tomowina ivonapotei bo, “Ti namada inae. Avi yanesi da ivona bo, ‘Tanae ku Dotan.’ ”
Ma Josepa na varevaresina murisiyai inae da Dotan dobunai ipananisi.
18 Ma varevaresina ikitataweyana da nokomanaki ikitai ipipisi, karakava da ita nekiibau kurisi na ivi ogatara da ita kiivunui.
19 Ti mani kavakava ivi sisiya, ivona bo, “Nani matu wawayina wepiyai.
20 Kopisi, takiivunui ma weni ku dogosi sago imotomtawei na ku kamona tawanaoruwei. Ma tavona da ghamoghamo dipa ivowai. Ma takitai da aviyavisina ina tupuwa ina vimatu kubiine.”
21 I tuwa Ruben sisiya ivi yanei na ibera tovoni da Josepa kana papara ita vowai. Ivona bo, “Ke takiivunui.
22 Ke vaghina da tarana ina sororo. Weni dogona imotomtawei na ku kamona tatawanaoruwei ma ke takiivunui.” Kana papara ita vowai, tuna kubiine nakanani ivi sisiya, ina nota da muriyai Josepa ita rutini ita nae ina mamai kurina.
23 Vaghina ma, Josepa inekiibau na varevaresina ivomiiri da ivotatani ma kana tarasovo kirukirumina ikotekotei na irukovowi.
24 Iviiya inae da ku dogo kamona itawanaoruwei. Ma dogona rorova kava imotomtawei.
25 Nani murinai imakiivipikapika da ikamkam ma ita kita da Ismayel tupurereghina ikitisi, ti na Midiyan damsi. Giliyadi dobunai ipipisi ma inenae ku Egypt. Ma i kamel tepanai na vavai kii tavighabughabu ma bade gegura gubaga kubiine na iuwana da iti gimara.
26 Juda varevaresina ivonesi bo, “Josepa takiivunui na avi biibiina tapanani?
27 Tigimarei vigimaragimara wawayisi kurisi ma ke takiivunui, iyamna tuna na varesita ma tarata vaghata.” Weni nakanani ivi sisiya na varevaresina peyarisi ivi vaghinei.
28 Midiyan damsi inekiibau kurisi, ti na vigimagimara wawayisi. Vaghina ma Josepa varevaresina dogo kamonai itinepai da ivi gimarei kurisi. Miiyanina na silva ririghina ivi 20. Ti damsi Josepa iviiya ma ineyei ku Egypt dobuna.
29 Nani murinai Ruben ivovira da dogona kamonai Josepa ikita kavai na ivi nuwapoya kirakai da kana gara isikai.
30 Ivovira titina yoghoyogho kurisi da ivona bo, “Tita kikei ke nani, taku aviyavisina ana berai?”
31 Nani murinai peyarisi inae da gote ikiivuni ma tarana iviiya da Josepa kana tarasovo ikiipasipasiya.
32 Ma ikavari inae da tarasovona i mamai iverei ma ivonei bo, “Weni sawarina kapanani, mede kevovirevirei kuna kitai, natum kana tarasovo bo?”
33 Ikitai da ivogiini ma ivona bo, “Weni tuna na natuku kana tarasovo! Ghamoghamo kayakayayina sago natuku ivowai. Vona bubuna da Josepa na ivi kutabedibediyanei!”
34 Jeikap nuwapoya ikiivunui da kana gara isikai ma mowasi modimodina ikotei. Ma natuna kubiine itou kirakai.
35 Natunatuna tomotomowisi da wivinesi peyarisi ipisi da iti nuwabiibiini. Ma kegha, iwenotaweyana da ivona bo, “Taku ana siyapa ina nene da ana rabobo. Anoru raborabobosi i ku dobu.”
36 Nani kamonai Midiyan damsi inene ku Egypt. Inekiibau na Josepa ivi gimarei Potipa kurina. Potipa na kiivavo Pero ina numa kana potapota i bada ghamana.