Pol Ina Giruma
Pirimon
Kurina
(Philemon)
Vonaviakova
Pirimon na Keresiyana varatetena ma karako wawaya inotanotai da tuna na vitumaghana damsi Kolosei kamonai i wawaya ghamana. Ma sleiv sago kana vava Onesimas na tuna ina bada Pirimon gwabinai iverau. Mara sago Pol na gabura kamonai ma Onesimas ipanani da Yesu Keriso varana biibiina ivi debei kurina da ivi tumaghana. Muriyai Pol, Onesimas weni girumina yavata ivonatawei inae ina bada Pirimon kurina da ina rewapana gaburinai ita makai. Girumina kamonai ivi nowi da Pirimon nuwanuwana iti tete bubuni da nuwanubiiyai ina sleiv Onesimas ita vii meyei ma iti kiikiiwei ma ina bera berona ita notatawei, iyamna namada vonavaghata ivi tumaghanei da ivi Keresiyana. Igiruma da karako Onesimas na ke ina sleiv kava ma bade varesina Keriso avanai.
Pol ina nota weni nakanani irereghi.
Vesis 1-3 Giruma ivotawei.
Vesis 4-7 Pirimon ighegheni.
Vesis 8-22 Onesimas kubiine ivi nowi.
Vesis 23-25 Vikiikiiwa ma giruma igudui.
1
Pol ina vikiikiiwa Pirimon kurina.
1 Taku Pol, ma Yesu Keriso kubiine na ku gabura itereku da gabura kamonai amakamakai ma varesita Timoti yavata kagirugiruma kwinakai Pirimon kurim. Tam na nuwanuwakai ma yavata tabigabiga patapata.
2 Ma bade agirugiruma Keresiyana wawayisi kurisi, ti na mara nonowa am numiiyai ikiidaburana vokavakavara kubiine, novuta Apiya ma varesita Akipas yavata. Akipas tuna taku nakanani, Keriso kubiine evovokwarakwara.
3 Ainowi ita Mamai God ma Bada Yesu Keriso kurisi da i agabiibai ma i nuwanuba gwabimiyai ina makai.
Pirimon ina nuwaviina ma ina vitumaghana.
4 Mara nonowa aku nipowana kamonai na tam Pirimon anotanotim ma aku God aikiikiiwei,
5 iyamna sisiya avi yanei da ikikava Bada Yesu Keriso kitumaghanei ma God ina wawaya kurisi am nuwaviina irakata.
6 Aniponipowana kubiim da am vitumaghana ina rakata kirakai da vitumaghana damsi yavata ami vinuwasago ina rakata. Nakanani kuna berai na akovina kuna viiya da ikikava Keriso gwabinai vibiibiina ghamana tapanani.
7 Tam varesiku, ma Keresiyana wawayisi nuwanuwasi kekiikiivipikapikai. Tuna kubiine mara nonowa nuwabiibai keverevereku ma bade kekiikiiepepa kirakiiyeku.
Pol ina sisiya Onesimas kubiine.
8 Keriso avanai aku rewapana kovokovoghina da ata darum da aviyavisina maninina kava kuta berai.
9 Ma kegha da nuwaviina kubiine na nuwanuwaku pikanai ainowi kurim, iyamna taku Pol amagura ma wekarakava Keriso kubiine na ku gabura itereku.
10 Ma Onesimas kubiine ainowi kurim. Taku gabura kamonai na tuna tomowina avi noravei da Keriso ivi tumaghanei da nani yawasinai avi natunei.
11 Rorova Onesimas tam kubiim ke ita biga bubuna. Ma karako na ke tam kava ma taku yavata kubiita ina biga bubuna.
12 Tuna na nuwanuwaku ma kegha da avonavonatawei ina vovira kurim.
13 Keriso varana biibiina kubiine na ku gabura itereku ma nani kamonai akayowei da Onesimas gwabikuwai ita makai da tam kam gawara ita viiya da iti viteku.
14 Ma ke ana darum, akayokayowei da tam mani am kayowanai kuni viteku ma Onesimas ke ana votani da kunona kuni vaghinei na ana berai.
15 Weni nakanani kuta notai. Mikeda God ina kayowana da Onesimas mara gisina kava ikuyowem da karakava ina vovira na gwabimuwai ina makii vaghata.
16 Kunona Onesimas na am sleiv kava, ma karako tuna patana da nakanani ma kegha da ku tepana tuna na varesim biibiina Keriso avanai. Tuna nuwanuwaku ma ana vonatawei kurim na tam mani kuna vopanani da tuna wekarakava ikikava wawayina na kuna kayowana kirakiiyei.
17 Kenotai da tam ma taku na Bada Yesu kubiine tabigabiga patapata, tuna kubiine Onesimas ina vovira na kevi kiikiiwei nakanani ma taku kuti kiikiiweku.
18 Mikeda aviyavisina ibera beroi kurim bo am sawara iyapini na kevona, da peyarina taku ani miiyei.
19 Taku Pol imakuwai weni tuna agirugirumi, “Ani miiyem!” Ma sago, ke aku kayowana da ata vonavinotim da Keresiyana yawasina na takuwai da kupanani, kam tupi gwabikuwai.
20 Aku kayowana da Bada avanai kuna berai na kuna kiiepepiku iyamna Keriso kubiine tam varesiku biibiim.
21 Weni girumina avonavonatawei kurim na aitumaghanem da kuna votekateka, ma bade akovi da ku tepana kuna bera kirakiiyei.
22 Ma ku tepana ata vonem da ikikava koniponipowana da ata vovira kurimi na anotanotai da God ini vaghinei. Tuna kubiine numa tupayaraghina sago kevovunaghi kubiiku.
Pol ina vikiikiiwa turina.
23 Epapiras ikiikiiwem. Tuna yavata ku gabura iterekai Yesu Keriso kubiine.
24 Ma bade Mak, Aristakas, Demas ma Luk ikiikiiwem. Ti yavata kabigabiga patapata.
25 Ainowi Bada Yesu Keriso kurina da ina agabiibai kanumimiyai ina makai.