3
योहन बप्तिस्मा देवनवारा
(मरकुस 1:1-8; लूका 3:1-18; योहन 1:19-28)
1 ओनो दिवस मा, योहन बप्तिस्मा देवन वालो, यहुदिया देस को सुनसान जंगल मा आयो अना परचार करन लगयो।
2 अपरो पाप लक दुहूर भय जाव, काहे की सरग को राज कठा आय गई से।
3 योहन वोच से जोन को गोस्टी यसायाह भविस्यवक्ता न कहिसेस का:
“जंगल मा एक मानूस हाकल रहयो से
का परमेस्वर की रास्ता ला तैयार करो,
अना वोकी सरक सरल करो”
4 योहन को कपरा ऊट को चुन्दी लक बनयो होतो। अना आपरी कमर मा चमड़ा को पट्टा बांधत होतो। ओको जेवन फाफा अना सहेद होतो।
5 तबा येरुसलेम नगर, अना सारो यहुदिया देस, अना यरदन नदी को इतानी-उतानी को सब जघा, का लोक ओको जवर हिटके आइन।
6 उनना आपरो-आपरो पाप ला मानके यरदन नदी मा ओको लक बप्तिस्मा लेईन।
7 जबा योहन न लगत सा मोसे को नियम को सिक्सक अना सदुकि फरिसी इनला बप्तिस्मा लेवन काजी आपरो जवर आवत चोविस, ता उनलक कहीस “हे सरप को अवलाद, तुमीला कोनी ना हेत दिलाइसेस, का आवन वालो कोप लक बचो”
8 वोनो काम गीनला चोवके तुमी अपरो पाप लक मन हटाव अना आपरो आप मा साजरो फर पावो।
9 अना असो नोको सोचो, का तुमी यो कहेके दंड लक बच सकासेव का अबराहम तुमरो पुरखा से, मी तुमरो लक कव्हसु का परमेस्वर एना पहाड़ी को गोटा मा लक अबराहम को लाई आवलाद पैदा कर सकासे।
10 अता टँगिया झाड़ की जड़ पर राखियो से, जेना-जेना झाड़ साजरो फर नही आना से, उ कापो अना स्तो मा झोको जाहेत।
11 मि ता तुमी ला पानी लक “पाप लक मन हटाव को बप्तिस्मा देवासेउ, पर जोन मोरो मंघा आवन वालो से, उ मोरो लक ताकतवर से, मि ओको सेन्डिल उचलन को लाईक नही सेऊ। उ तुमला पवीतर आतमा अना स्तो लक बप्तिस्मा देहे।
12 ओको सुपड़ो, ओको हात मा से, उ आपरो खरीयान साजरो लक सफा करेत। अना आपरो गहुँ ला आपरो ढोला मा जमा करेत पर भुसा ला ओना स्तो मा पेटाहे जोन कबच नही झिझाहेत।”
यीसु को बप्तिस्मा
(मरकुस 1:9-11; लूका 3:21-22; योहन 1:31-34)
13 ओना बेरा मा यीसु ना गलील छेतर लक, यरदन नदी को किनार मा, योहन लक बप्तिस्मा लेवन वोको जवर आयो।
14 पर योहन यो सांगके, ओला रोकन लग्यो “मोला ता तोरो हात लक, बप्तिस्मा लेवनो से, अना तु मोरो जवर आयीसेस”
15 यीसु ना ओला जवाब देइस “अबा ता असो च होवन दे, काहे की आमी ला येना रित लक सबच धरम-करम ला पूरो करनो से।” तबा योहन, यीसु को गोस्टी ला मान लेइस।
16 जसोच यीसु बप्तिस्मा लेइस, त वसोच बाहेर आयो तबा वोको लई सरग को किवाड़ उघड़ गयो, अना वरता लक परमेस्वर को आतमा ला परेवा को जसो आपरो वरता उतरता चोइस।
17 अना सरग लक आवाज आयकु आई “यो मोरो चहेतो टूरा से, जेना लक मि सब लक ज्यादा खुस सेव।”