Eclesiastés
¿Imapätaj cay pachacho caycanchi? ¿Imanirtaj fiyu runacunataga imapis alli llogshipan?
¿Imataj caycan cay librucho? Eclesiastés libruta isquirbej runa caran musyaj yachaj yarpaysapa Israel runami. Payga Yachachicoj cashantami niycan (1.1,12). Payga estudyaran «cay pachacho runa cawar imanöpis goyashantami» (1.13). Yachachicöga llapantami estudyaran. Tucuytami ruraran. Waquin runacuna cawashannöpis cawaran. Chaypis ushanantaga pay nin «mas yacharga masmi ñacanchi» nir (1.18). Chaynöpis pay nin «Runata Diosga rurasha allitami. Runaga quiquinnami llutanta rurashpan mana alliman chayasha» nir (7.29).
Chuscu cösatami cay librucho yachachimanchi: 1) Runaga manami simrichu tantiyan Tayta Dios imanöpis rurashanta (3.11; 8.17). 2) Tayta Diosllami llapantapis pay munashanno camacächisha (3.12–14). 3) Runa rurashan waquinga manacajllami yangallami caycan. 4) Llapanchïpis wañushunmi. Wañuyga llapantapis apacunmi: rïcucunata, pobrita, musyaj yachajta, mana tantiyaj upacunatapis.
Yachachicoj niycan llapanpis cashgallan tumaycämushantami. Chaymi pay nin «Cay pachachöga manami imapis canchu mushojraj yurimöga» (1.9). Pay nin «llapanpis yangallami» nir (1.2–3). Nircur ichanga nin «cada cösa imay päsananpäpis caycan. Llapanpis timpuyojllami» nir (3.1). Pay nin cay caway-bïdaga wayranöpis rätu päsacojlla cashantami.
1
Llapanpis yangalla cashan
1 Cayga caycan yachachicoj isquirbishanmi. Payga caran Davidpa wamranmi. Paymi Jerusalencho ray caran.
2 Noga yachachichöga në:
¡Llapanpis yangallami! ¡Yangallami!
3 ¿Imataraj jorgun runaga cay pachacho may-jina ñacar arurpis?
Manami imatapis jorgunchu.
4 Runaga yuriycan, y wañuycan.
Cay pachami ichanga imaypis mana rucanchu.
5 Intipis yagarcamun, yagacurcun.
Yapay yagarcamun yapay yagacurcun.
6 Wayraga yaparir yaparirmi wayraycan.
Wayra sur caj lädupa wayran.
Nircorga norte caj lädupana tumamun.
Imaypis chaynöllami wayraga wayraycan.
7 Mayucunaga llapan aywar chayaycan lamarllaman.
Chaypis lamarga manami imaypis juntamunchu.
Mayucunaga cutin llojshimushanman
imaypis aywashanno yapay aywananpaj.
8 Llapanpis fiyupami uticächicun.
Runaga imanöpa tantiyachiytapis manami puydinmanchu.
Chaypis runaga mana yamacaypami ricaycan;
mana yamacaypami wiyaycan.
9 Unay cashanga yapaymi canga.
Unay ruracashanga yapaymi ruracanga.
Cay pachachöga manami imapis canchu mushojraj yurimöga.
10 Waquenga nenga:
«¡Caymi ichanga imaypis mana cashan!» nir.
Chaypis maynami caran
manaraj noganchi cashanchi wichan.
11 Unay cashancunataga gongaycärishami.
Chaynöllami canan caycajtapis shamoj watacunachöga gongayconga.
Guepata yurej cajtapis mas guepa runacuna gongaycongami.
Yachachicojta imapis päsashancuna
12 Noga yachachicöga Jerusalenchömi Israelcunapa raynin carä.
13 Nogaga cay pachacho imano goyashallanchïtapis sumaj musyanäpaj estudyarä. Alli tantiyanäpaj llapan shongöpa estudyarä. Tayta Diosmi camacächisha chayno estudyananchïpaj. Runacunapäga chay estudyu fiyupa sasami caycan.
14 Chaymi tantiyacushcä llapanpis cay pachacho rurashanchëga manacajllapaj cashanta. Wayrata chariyta munajnöllami caycanchi.
15 Wicsushatapis manami allchayta camäpacunchïnachu.
Mana captinnaga manami yupashwannapischu.
16 Shongullächo yarparä: «Canan nogaga sumaj yachajmi cä. Ñaupäta Jerusalencho caj raycunapita masmi musyaj yachaj cä» nir.
17 Llapan shongöpami yachaj canäpaj estudyashcä. Llutan ruraycuna imano cashantapis estudyashcä. Ichanga chaycunapis caycan wayrata chariyta munashanchïnöllami.
18 Rasunpaga
mas yachaj carga masmi uma nanayta tarenga.
Mas yacharga masmi ñacanpis.