4
Israelpa contran Tayta Dios rimashan
1 Israel runacuna, wiyay-llapa Tayta Dios rimashanta.
Paymi cay nasyuncho tiyajcunapa contran rimaj-aywan.
Paymi cayno nin: «Rasun cajta rimaj runacuna caychöga manami canchu.
Mananami cuyapänacunnapischu.
Nogataga manami pipis ‹Tayta Diosnë› nimannachu.
2 Chaypa ruquenga runacuna manacajpita jurarcaycan.
Llullacuypa rimaycan.
Wañuchinacurcaycan.
Suwacurcaycan.
Majayoj caycar jucpa majanwan cacurcaycan.
Jananman-jananman wañuchinacuyllami caycan.
3 Chayno captinmi cay nasyonga chaquiycanna.
Cay nasyuncho tiyajcunana callpaynajno ricacurcaycan.
Jirca animalcunapis, äbicunapis,
lamarcho caj pescäducunapis wañurcaycanna.»
Cüracunapa contran Tayta Dios rimashan
4 Tayta Dios nin: «Cüracuna, nogaga gamcunapa contrayquimi rimashaj.
Manami juccunatachu jitapaycä.
5 Gamcunaga quiquiquicunapa juchayquipitami pagaspa junajpapis mana alliman chayanquipaj.
Profëtacunapis mana alliman tunengapaj.
Mamayquitanami illgarachishaj.
6 «Acrashä runacunaga manami mayganpis ‹gammi Diosnë canqui› nimashachu.
Chaypitami paycunaga ushacaycan.
Ni gamcunapis cüracuna manami ‹Diosnë› nimashcanquinachu.
Chaypitami mana munänachu cürä canayquitapis.
Gamcunaga yachachicuynëta gongaycärishcanquimi.
Chaynöllami nogapis gongaycushaj gamcunapita mirar aywajcunata.
7 Mas achca cüracuna cashpanga masmi juchatapis ruraran.
Chayno juchanpitami cananga alliman churanäpa ruquin pengaymanna churashaj.
8 Cüracunaga acrashä runacuna juchata rurashanwanmi mas alli goyan.
Chaynöpami paycunaga munarcaycan mas juchata rurananta.
9 Acrashä runacunatawan iwalmi cüracunatapis
castigashaj chayno rurashanpita.
10 Nogata sirbiyta gongaycäramashanpitami
micurpis mana sacsangachu.
Pï-maywan cacuptinpis
wamrancuna mana cangapänachu.
Ïdulucunata adurajcunapaj rimashan
11 «Pipis jucwan-jucwan cacushpan y
amatar upyarpis pasaypami pirdican.
12 Acrashä runacuna imatapis musyayta munar
guerupita rurasha ïdulucunatami tapucurcaycan.
Ïdulucunata adurayta munayllawanmi pantacäcusha.
Chaymi mañösa warminöpis gongaycamar juccunatana adurarcaycan.
13 Altunnin puytush lömacunachömi insinsuta rupaycächin.
Uywacunatapis pishtarcaycan.
Chaynömi ruraycan ‹roble› yöracunapa,
‹álamo› yöracunapa, ‹encina› yöracunapa chaquinchöpis.
Chaymi warmi wamrancunaga pï-maywanpis cacun.
Llumchuynincunapis runancunata jucwan jananpaycan.
14 Quiquiquicunapis mañösa warmicunawanmi cacuycanqui.
Chay warmicunawan ïdulucunata aduraj aywaycanqui.
Chayno caycaptiquega noga mananami castigashänachu piwanpis cacushanpita wamrayquicunata,
ni llumchuyniquicunatapis runancunata jucwan jananpashanpita.
Chaynöpami runacunaga Diosnin cashäta mana musyashpan mana alliman chayan.
15 «Israelcuna, ïdulucunata aduraptiquipis
Judäcunaga ama juchata rurachunnachu ari.
Gamcuna ama aywaychu Gilgalman ni Bet-avenmanpis.
Ama ‹Tayta Diospa jutincho jurä› niypischu.
16 Israelcuna chucaru wäcano mana wiyacojmi carcaycanqui.
¿Chayno caycaptiquichu gamcunataga ricashayqui uysha-mallwacunata-jina?
17 Efraín runacunaga ïdulucunata aduraymanmi chayasha.
¡Mä chayno goyäcuchun ari!
18 Paycunaga upyananpaj mana captinnami warmicunaman aywacun.
Mandajnincunapis pengaypaj goyayllatami munan.
19 Chayno ïdulucunata adurashanpitami wayra shamushpan älancunacho apacongapaj.
Chayrämi pengaycho quëdangapäga.