23
Prësu aywajcuna cutimunanpaj cashan
1 Tayta Dios nin: «¡Ay imanöraj canqui mana alli uyshëruno caj mandajcuna! Gamcunaga uyshäno caycaj acrashä runacunatami mashtacächishcanqui, pantacächishcanqui.
2 Gamcunaga chay uyshäcunatami mashtarishcanqui. Mana sumaj ricaptiquimi gueshpir aywacusha. Mana allita rurashayquipitaga nogapis castigashayqui imanöpis rurashayquimannömi. Noga Tayta Diosmi chayno në.
3 Ichanga may-chaypapis aywacunanpaj camacächishäpita quiquëmi yapay shuntamushaj. Llapanta shuntarcurmi paycunataga tiyashancunaman cutichishaj. Chaychönami aypallaman miranga.
4 Nircur alli uyshërucunatanönami churashaj alli ricananpaj. Chaura runacunaga imapitapis mana manchaconganachu, jucnayllapis manami pishenganachu. Noga Tayta Diosmi chayno në.
5 «Juc junäga Davidpita lijïtimu mirar aywajnami ray cangapaj.
Payga alli yachaj cayninwanmi mandangapaj.
Cay nasyunchöga alli cajllatanami rurangapäpis.
6 Pay ray cashan wichan
Judá runacunaga allillami goyangapaj.
Israel runacunapis allimi goyanga.
Chay mandajpa jutintaga churapangapaj
‹Alliman churamajninchi Tayta Dios› nir.»
7 Tayta Diosmi nin: «Juc junäga manami juranganachu ‹Israelcunata Egiptupita jorgamoj Tayta Diospa jutincho jurä› nir.
8 Chaypa ruquenga jurangapaj ‹Israelcunapita mirar aywajcunata norte caj-lä nasyunpita cutichimoj, waquin nasyuncunaman mashtarishanpita shuntamoj Tayta Diospa jutincho jurä› nishpannami. Nircorga quiquincunapa nasyunninchönami tiyacongapaj.»
Llulla profëtacunapaj rimashan
9 Noga Jeremiasga, Tayta Diospa ñaupancho caycashpä,
profëtacunapaj Tayta Dios parlashanta wiyashäpitami pasaypa turwatashano caycä.
Intëru cuerpöpis sicsicyaycan.
Fiyupa machasha runano, mana yarpänancama upyasha runano caycä.
10 Cay nasyunchöga juchallatami rurarcaycan
majayoj-masincunawan cacushpan.
Mana allita rurananpäga bïbumi.
Paycuna chayno cashanpitami cay nasyuntaga Tayta Dios maldisyunaycusha.
Chauraga allpapis chaquicäcushami.
Chunyajcho wiñamoj guewacunapis rupacäcushami.
11 Tayta Diosmi cayno nin:
«Asta profëtacunawan cüracunapis manami manchacamanchu.
Templöchöpis tarishcä mana allita rurarcaycajtami.
12 Chayno cashanpitami caminuncunapis fiyupa llushca y chacaj ricaconga.
Nogami camacächishaj tangariptin chaycho tuninanpaj.
Juchancunapita jusgashpä paycunaman disigrasyatami chayachimushaj.
Noga Tayta Diosmi chayno në.
13 «Nogaga ricashcämi Samariacho profëtacuna
mana munashäta rurarcaycajta.
Paycunaga Baal diospa jutinchömi willacusha.
Chayno rurashpanmi acrashä Israelcunatapis pantacächisha.
14 Noga ricashcämi Jerusalencho caj profëtacunapis
fiyupa melanaypäcunata rurarcaycajta.
Paycunaga majayojcunawanmi cacurcaycan; llullacurcaycan.
Chayno rurarmi juchasapacunatapis mana allita ruraycashanta mana cachaycunanpaj shacyächin.
Chaymi paycunapis, siudächo tiyajcunapis
Nogapäga carcaycan Sodomawan Gomorra cashanno.»
15 Chayno cashanpitami noga munayniyoj Tayta Diosga llapan profëtacunapaj në:
«Jerusalencho caj profëtacunapitami
nasyun intëruchöpis yachacusha.
Chaypitami paycunataga fiyupa ashgajta garaj-aywä.
Bininasha yacutami upuchej-aywä.»
16 Munayniyoj Tayta Diosmi nin:
«Israelcuna ama cäsupaychu chay profëtacuna willacushantaga.
Paycuna willacushanga llapanpis llullacuyllami.
Chay willacurcaycashantaga quiquincunapa yarpaynillanpitami jorgurcaycan.
Nogaga manami willapashcächu.
17 Noga willachishäta manacajman churajcunata chay profëtacunaga nin
‹Llapanpis allimi llojshipäshunquipaj› nir.
Shongun munashannölla mana allita rurajcunatana
‹Gamcunataga manami ima disigrasyapis chayashunquipächu› nin.
18 «Paycunaga ¿maygantaj pacayllapa parlacunäpaj shuntacashäman shamusha?
Paycuna ¿maygantaj ricasha u wiyasha parlaycashäta?
Noga nishätaga ¿pitaj wiyacusha?
19 Chaymi mana wiyacamajcunataga rabyashpä löcu tamyano,
löcu wayra ima-aycatapis apacojno usharishaj.
20 Llapan yarpashäta manaraj rurayta ushashäcamaga rabyashä manami päsangachu.
Juc junäga cayno niycashäcunata sumaj yarpachacur tantiyacunquipämi.
21 «Chay profëtacunataga manami cachamushcächu.
Ni willayllapis manami willapashcächu.
Chaypis paycunaga cörriylla intërupa aywasha nogapa jutëcho willacuraycar.
22 Noga pacayllapa parlacushäman shamusha cashpanga
Noga nishätami acrashä runacunata willapanman caran.
Chauraga llutanta ruraycashanpitapis allitami ruranman caran.
23 «Carucho cajpäpis sercacho cajpäpis nogallami Tayta Diosga cä.
24 Noga ricanäpitaga ¿piraj pacacunman?
Syëluchöpis allpachöpis caycämi.
Noga Tayta Diosmi chayno në.
25 «Nogaga wiyashcämi chay llutan profëtacuna llullacuypa nogapa jutëcho willacur ‹Suyñushcämi. Suyñuynëchömi willapämasha› nir willacuycajta.
26 ¿Imaycamaraj chay profëtacunaga llullacuyllapa, quiquinpa yarpayllanpita willacurcaycanga?
27 Paycunaga suyñushancunata jucninpis-jucninpis willacushpanmi acrashä runacunawan gongaycachimayta munarcaycan. Chaynöllapami unay caj awiluncunapis Baalta adurashpan gongaycäramaran.
28 Chay profëtacuna suyñushallanta willacuyta munarga willacuchun. Noga willapashä cajcuna ichanga willapashänölla willacuchun. Päjapita rïgu mas bälishannömi willacuynëpis mas bälin.
29 Noga willacachishäga caycan ninanömi, gagata paquej cumbanömi. Noga Tayta Diosmi chayno në.
30 « ‹Diosmi willamasha› nej llulla profëtacunapa contranmi caycä.
31 Quiquinpa yarpaynillanpita jorgurcur noga nishätano willacoj llulla profëtacunapa contranmi caycä.
32 ‹Suyñushcä› nir llullacuypa willacojcunapa contranmi caycä. Manacajcunata willapashpanmi acrashä runacunata pantacarcaycächin. Chay profëtacunataga noga manami cachashcächu. Manami ‹willacuy› nishcäpischu. Chaynöpami paycunaga acrashä runacunata alli yanapayta mana camäpacunchu. Noga Tayta Diosmi chayno në.
Dios nishanta imano willacunanpäpis
33 «Jeremías, pï runapis, profëtacunapis u cüracunapis ‹¿ima llaquicuypätataj Tayta Dios nishurayqui?› nishuptiqui gampis ninqui: ‹Tayta Dios nimasha: «Llaquicuypämi gamcunataga cachaycushayqui.» ›
34 Cüra carpis, profëta carpis u jinan marca runapis: ‹Llaquicuypätami Tayta Dios nimasha› nejtaga noga castigashaj quiquinta llapan famillyancunatawanmi.
35 Chayno tapunanpa ruquenga rejsinacushanta u famillyantapis tapunman ‹Noganchïpaj ¿ima nintaj Tayta Diosga? ¿Imatataj cuntistamashcanchi?› nir.
36 Ichanga pipis ama tapuchunnachu ‹¿Ima llaquicuypätataj Tayta Dios nishurayqui?› nir. Pipis chayno niptenga chay rimajtami llaquicuyman chayachishaj. Paycunaga imaypis mana ushacaj munayniyoj Tayta Dios caycaptëmi alli willapashäcunata jucnöman ticrachisha.
37 Profëtataga tapuy: ‹¿Ima nintaj Tayta Diosga? ¿Imatataj cuntistamashcanchi?› nir.
38 ‹¿Ima llaquicuypätataj Tayta Dios nishurayqui?› niptin ichanga gam ninqui: ‹Tayta Diosga nin: Gamcunaga «amana rimanquichu» nishätapis jinallami rimarcaycanqui.
39 Chayno llaquicachimaptiquimi gamcunataga cachaycushayqui. Unay awiluyquicunata goycushä siudäpitapis carumanmi jitarishayqui.
40 Nircorga gamcunapaj camacächishaj imaycamapis manacajman churasha canayquipaj, pengaycho canayquipämi. Chaytaga manami imaypis gonganquipächu.› »