46
Nasyuncuna imano cananpaj cashantapis
(Jer. 41.1–51.64)
1 Nasyuncuna imano cananpaj cashantapis Tayta Diosga profëta Jeremiasta willaparan.
Egipto imano cananpäpis rimashan
2 Josiaspa wamran Joacim chuscu watana Judäpa raynin caycaran. Y Éufrates mayu lädun Carquemischo Egiptupa mandajnin faraón Necaopa suldäruncuna caycaptinmi paycunataga Babiloniapa raynin Nabucodonosor wañuchir illgächiran. Chay wichanmi Egipto imano cananpaj cashantapis Tayta Diosga profëta Jeremiasta cayno willaparan:
3 «¡Egipto runacuna, chapacuna escüduyquicunata listucuy!
¡Nircorga pillyaj ayway!
4 ¡Cawalluyquicunata sillacuy!
¡Muntacuyta yachajcuna muntacuy!
¡Cascuyquicunata chucucuy! ¡Nircur sumaj fïlacay!
¡Tucsicunayquicunata sumaj afilacuy!
¡Chapäshunayquipaj caj chalëcucunata jaticuy!
5 «Ichanga ¿imatataj ricä?
Egipto suldärucunaga fiyupa mancharishami gueshpir cuticurcaycan.
Binsiycuptinnami pillyajcunaga mashtaypa-mashtar aywacuycan.
Mana ticraycuypami gueshpir aywacurcaycan.
¡Intërupami manchariypaj caycan!
Noga Tayta Diosmi chayno në.
6 Fiyupa cörrejcunapis manami gueshpiyta puydinnachu.
Jinyunnincunapis gueshpiyta manami camäpacunchu.
Norte caj-lächo Éufrates mayu cantunchöga
tacacar llapanmi tunircaycan.
7 ¿Maygan nasyuntaj Nilo mayu chayajno achcayaycäga?
¿Maygan nasyuntaj mayu chayashpan bötiypa-bötir intërupa mashtacaycajnöga caycan?
8 Nilo mayu chayashpan achcayaycajnöga Egiptumi.
Bötiypa-bötir intërupa yacu mashtacaycajnömi caycan.
Egipto runacunaga nin: ‹Aypallaman mirashpä intërumanmi juntashaj.
Siudäcunatapis llapan runacunatapis ushashami.›
9 «¡Cawalluwan muntäducuna pillyaj yaycuy!
¡Carrëtawan cajcunapis ayway!
Pillyajcuna yaycuy.
Ayway Etiopía nasyun suldärucuna, Fut parti suldärucuna chapacuna escüduyquicunata camaricarcärir.
Camaricuy lëchawan illapay yachaj Lud parti suldärucuna.
10 Chay junäga cangapaj noga munayniyoj Tayta Dios castiganä junajmi.
Chay junajmi llapan conträcunata ayñita cutichishaj.
Sablëmi tucsenga yamacashancama.
Chayno tucsenga pasaypa yawar ñitinancamami.
Chay junäga noga munayniyoj Tayta Diosmi
norte caj-lächo caycaj nasyuncho, Éufrates mayu läduncho aypalla runata wañuchishaj.
11 «¡Donsëlla jipashno caycaj Egipto runacuna,
Galaadman ayway jampi ashej!
Aypalla jampita shuntar jampicushayquipis yangami canga.
Gamcunapäga mananami jampi cannachu.
12 Intëru nasyun runacunanami musyarcaycan manacajman churasha cashayquita.
Intëru nasyunmanmi wiyacaycan gaparpashayqui.
Pillyajniquicunaga quiquin-purami tacanacusha.
Nircur ishcanmi cuchpasha.»
Egiptuman Nabucodonosor yaycunanpaj cashan
13 Babiloniapa raynin Nabucodonosor Egiptuman pillyaj yaycunanpaj aywaycaptin Tayta Diosga profëtan Jeremiasta cayno niran:
14 «Egiptucho, Migdolcho, Menfischo, Tafneschöpis cayno willacuy-llapa:
‹¡Ricaj-ricajlla camaricushallana carcaycay!
¡Intëru ñaupayquipanami sabliwan wañuycächin!›
15 Apis jutiyoj töru diosniquega ¿imanirtaj tunisha?
Noga Tayta Diosmi sajtarishcä.
Chay töru diosniquega ¿imanirtaj jinalla mana ichiraycanchu?
Chaytaga noga Tayta Diosmi tunirachishcä.
16 Suldäruyquicunapis tacanacushpan tunin.
Jucnin-jucninpis ninacun:
‹Caypitaga llapanchi cuticushun marcanchïman-cama.
Yurishanchi marcanchïman cuticushun.
Wañuchinacuypita gueshpir aywacushun› nir.
17 Chayno ninacur gaparpan: ‹Egiptupa mandajnin faraonga ricayllanmi.
Manami imata ruraytapis camäpacunchu› nir.
18 «Nogaga munayniyoj Raymi cä.
Jutëcho jurarmi në:
Puntacunapa chaupincho Tabor punta ichiraycajno,
lamarpita ichiraycaj Carmelo puntanömi
Egipto runacunapa contran shamunanpaj caycäga caycan.
19 Egipto runacuna camaricuyna prësu aywanayquipaj.
Menfisga chunyajmi ricacongapaj.
Juchusha ragällan captin pipis manami tiyangapänachu.
20 Egiptucunaga caycan cuyayllapaj ternëra-nirajmi.
Chayno caycajta cañiycunanpämi norte caj-läpita upucruy aywaycämun.
21 Guellaypaj pillyaj mincaynincunapis wera töru-mallwacunanömi.
Ichanga paycunapis upucruypita gueshpirmi aywaconga.
Pillyananpäpis manami ichipangapänachu.
Paycuna disigrasyaman chayanan junäga chayaycämunnami.
Castigasha canan junäga chayaycämunnami.
22 Yöracunata mutur sajtajnöpis aypalla suldärucuna yaycapaycuptinmi
Egiptucho tiyajcunaga gueshpir
aywaconga culebra wichyashpan gueshpejnöraj.
23 ¡Chay contrancunaga jirasha caycaj muntincunatapis chagurengami!
Yaycoj runacunaga chüpacacunapitapis mas aypallami canga.
Yupaytapis manami pipis atipangachu.
Noga Tayta Diosmi chayno në.
24 Egiptucho tiyajcunaga fiyupa pengay-tucushami ricaconga.
Paycunaga norte caj-lä nasyun runacunapa maquinchönami ricaconga.»
25 Israelcunapa munayniyoj Tayta Diosninmi nin: «Tebaspa diosnin Amonta, Egiptupa diosnincunata, raynincunata, faraonta, faraonman yäracojcunatapis llapantami castigashaj.
26 Nogami camacächishaj fiyupa chiquej Babiloniapa raynin Nabucodonosorpa maquincho cananpaj, pay mandashan runacunapa maquincho cananpaj. Chaypita mas unaytanami ichanga unay tiyashannöna yapay Egiptucho runacuna tiyacongapaj. Noga Tayta Diosmi chayno në.»
Acrashancunata Tayta Dios salbananpaj cashan
(Jer. 30.10–11)
27 «Jacobpita mirar aywaj Israelcuna ama manchacuychu.
Sirbimajcuna ama juc-nirajyaypischu.
Maymanpis caru nasyunman apashushayquipitami
gamcunata, llapan wamrayquicunatapis jorgamushayquipaj.
Chaypitaga allillanami goyäcunquipaj.
Pipis manami manchachishunquipänachu.
28 Jacobpita mirar aywaj sirbimajcuna ama manchacuychu.
Nogami gamcunawan caycä.
Gamcunata jitarishächo tiyaycashayqui nasyun runacunataga
llapantami illgächishaj.
Gamcunatami ichanga mana illgächishayquipächu.
Chaypa ruquenga juchayqui-tupullami castigashayqui.
Castigänillataga manami cachaycushayquipächu.
Noga Tayta Diosmi chayno në.»