RI WUJ RI XUTZꞌIBꞌAJ RI PABLO CHIKE RI KOJONELABꞌ AꞌJ ÉFESO
Majibꞌal re
Naqꞌatalik chi we wuj riꞌ ubꞌiꞌnam Efesios, pune man chike ta ri kojonelabꞌ pa Éfeso xtzꞌibꞌax wi. Jujun chike ri nabꞌe taq uwach wuj re Efesios ri xesaxik man kanaꞌtax taj ri tzij Éfeso, we wuj riꞌ kuqꞌalajisaj chi ri Pablo man retaꞌmam ta wi kiwach ri winaq ri xutaq wi we wuj.
Waral ri Pablo kutzijoj rij kebꞌ jastaq. Nabꞌe kutzijoj rij ri kuxik ri kꞌakꞌ winaq pa Cristo xuqujeꞌ jas jeꞌ kape chirij jun are jewaꞌ ubꞌanik.
Ri Dios xukꞌam loq ronojel ri jastaq chuxeꞌ raqan uqꞌabꞌ ri Mesías, xuqujeꞌ xuya nim uqꞌij ri Jesús puꞌwiꞌ ronojel ri jastaq. Ri Pablo kunaꞌtaj rukꞌ chuqꞌabꞌ ri kubꞌij pa ri Tyoxalaj wuj pa Salmos 8. Ri Dios xuya ronojel ri jastaq xe raqan uqꞌabꞌ jeriꞌ xukꞌutu chi xwi ri Jesús nim pa kiwiꞌ konojel.
Ri Jesús kusukꞌumaj kanoq ri nabꞌe sikꞌinik ri xyaꞌtaj che ri achi ojer rech are kabꞌan re puꞌwiꞌ ronojel ri jastaq ri tiktalik.
Ri winaq aꞌj Israel xuqujeꞌ ri winaq ri man aꞌj Israel taj xbꞌan jun chike are kijolom ri Jesús.
Ri Dios kamik tajin kuya jun kꞌakꞌ kꞌaslemal chike konojel ri e kꞌo cho ri uwachulew rumal re ri uchak ri Mesías. Kel kubꞌij waꞌ chi rajawaxik chi ri e tereneꞌl re ri Jesús kakikꞌaslebꞌej jun chꞌajchꞌoj laj kꞌaslemal pa ri kiriqoj ibꞌ.
Ketaqchiꞌx we winaq chi kakikꞌutu jas jeꞌ rajawaxik kenoꞌjinik jacha ri karaj ri Dios. Ri Pablo kubꞌij chike ri e sikꞌil taq re ri uwuj chi jer e kꞌo pa jun chꞌoꞌj. Rajawaxik kakikoj ronojel ri kicheꞌyabꞌal tobꞌal kibꞌ kꞌa pa ri qꞌij are ri Mesías kubꞌan xa jun che ri jastaq pa ri kaj xuqujeꞌ cho ri uwachulew.
1
1 Ri Pablo, taqoꞌn rech ri Cristo Jesús rumal ri urayibꞌal ukꞌuꞌx ri Dios, chike ri e tyoxalaj taq winaq ri jeqel kikꞌuꞌx pa Cristo Jesús, ri e kꞌo pa ri tinimit Éfeso.
2 Chikꞌamawaꞌj toqꞌobꞌ xuqujeꞌ jaꞌmaril che ri Tataxel Dios xuqujeꞌ ri Ajawxel Jesucristo.
Ri tewechibꞌal rech chikajil, kakꞌamawaꞌx pa Cristo
3 Tewchiꞌtal ri ubꞌiꞌ ri Dios, Tataxel rech ri Ajawxel Jesucristo, ri ujutewechiꞌm rukꞌ ronojel tewechibꞌal pa ri uxlabꞌal pa Cristo Jesús, pa ri chikajil kꞌolibꞌal.
4 Rumal cher ri Areꞌ xujuchaꞌo are majaꞌ katiktaj loq ri uwachulew, rech kujux tyoxalaj taq winaq xuqujeꞌ chꞌajchꞌoj cho Areꞌ. Pa ri loqꞌanik
5 xujuchꞌa loq, rech kujok che ralkꞌwaꞌl xa rumal ri Jesucristo, rumal ri sibꞌalaj utz laj rayibꞌal ukꞌuꞌx,
6 rech kaqaqꞌijilaꞌj ri juluwem rech ri utoqꞌobꞌ ri xuya chaqe rumal ri loqꞌalaj Ukꞌojol.
7 Pa Areꞌ xujtortaj wi rumal ri ukikꞌel, xkuyutaj ri qamak rumal ri uqꞌinomal ri utoqꞌobꞌ.
8 Ri xutixtobꞌisaj la pa qawiꞌ, rukꞌ ronojel noꞌjibꞌal xuqujeꞌ chomanik.
9 Xuqujeꞌ xukꞌut chiqawach ri awatal loq najtir ojer, pa ri rutzilal, uchomam loq ubꞌanik qukꞌ we rayibꞌal ukꞌuꞌx riꞌ.
10 Xuchomaj loq unukꞌikꞌ pa areꞌ ronojel ri jastaq rech uwachulew xuqujeꞌ ri jastaq rech chikajil.
11 Pa Cristo xuqujeꞌ xqakꞌamawaꞌj ri echabꞌal, rumal cher ojer xujchaꞌ loq, jacha ri uchomanik ri kakwin chubꞌanik ronojel ri jastaq, jeꞌ jas ri kurayibꞌej ukꞌuꞌx.
12 Rech ri uj ri uj nabꞌe chuyaꞌik ri qakuꞌlibꞌal kꞌuꞌx chirij ri Cristo kaqaya qꞌijilaꞌnem che ri ujuluwem.
13 Ri ix xuqujeꞌ, are xita ri utz laj tzij rech ri qas tzij, ri utz laj tzij re koltajem, xkoj iwetal rumal ri Tyoxalaj Uxlabꞌixel, ri bꞌiꞌtal kanoq,
14 are waꞌ ri naꞌtabꞌal re ri qechabꞌal, kꞌa jampaꞌ kuꞌriqa qꞌij rech ri kolotajem rech kaqꞌijilaꞌtaj ri ujuluwem.
Bꞌanoj chꞌawem xuqujeꞌ tyoxinik che ri Dios
15 Rumal kꞌu ri, are xinta ri ikojobꞌal pa Cristo Jesús, xuqujeꞌ ri kibꞌan chi kiloqꞌaxik ri tyoxalaj taq winaq,
16 man intanalinaq ta che utyoxixik che ri Ajawxel piꞌwiꞌ pa ri nuchꞌawem ri kinbꞌano,
17 kinta che ri Dios, Tataxel rech ri Ajawxel Jesucristo, Tataxel rech juluwem chuya iwetaꞌmabꞌal pa ri uxlabꞌixel xuqujeꞌ chuqꞌalajisaj chiꞌwach pa jun jeꞌlalaj etaꞌmanik.
18 Xuqujeꞌ kinbꞌan chꞌawem piꞌwiꞌ rech kajaqataj ri ibꞌoqꞌoch rech kiwetaꞌmaj jas ri kuꞌlibꞌal kuꞌx rech ri sikꞌinik, xuqujeꞌ jas ri qꞌinomal rech ri echabꞌal ri yaꞌtal chike ri tyoxalaj taq winaq.
19 Xuqujeꞌ ri sibꞌalaj nim utoqꞌobꞌ qukꞌ uj ri kujkojon che. Are riꞌ nimalaj chuqꞌabꞌ rech ri ukwinem.
20 Ri xubꞌan chak are xuwaꞌjilisaj ri Cristo chikixoꞌl ri kaminaqibꞌ, xuqujeꞌ xutꞌuyubꞌaꞌ pa ri uwiqiqꞌabꞌ pa ri chikajil kꞌolibꞌal.
21 Xuqujeꞌ xya taqanik pa uqꞌabꞌ pa kiwiꞌ konojel ri e taqanelabꞌ cho ri uwachulew, pa kiwiꞌ ronojel kwinem, xuqujeꞌ ronojel taqanik pa kiwiꞌ ronojel bꞌiꞌaj, man xaq xwi ta pa we qꞌotaj re kamik, xane xuqujeꞌ ri kape na.
22 Ri Dios xuya ronojel ri jastaq chuxeꞌ raqan uqꞌabꞌ ri Cristo, xuqujeꞌ xubꞌan che chi xux ujolom ri komontyox.
23 Rumal cher ri komontyox are utyoꞌjal ri Cristo, xuqujeꞌ are ri Cristo kayoꞌw ronojel ri jastaq ri kajawatajik, pa ronojel qꞌotaj.