RI WUJ RI XUTZꞌIBꞌAJ RI PABLO CHIKE RI KOJONELABꞌ AꞌJ GÁLATAS
Majibꞌal re
Ri Galacia jun leꞌaj re Roma, ri kꞌo pa ukꞌuꞌx ri Asia menor. Ri Pablo oxmul xeꞌ je laꞌ chutzijoxik ri utzij ri Jesús. Ri winaq aꞌj Galacia xkikꞌamawaꞌj rukꞌ jororemal ri xutzijoj ri Pablo chike.
Are ikꞌowinaq chi jun janipa qꞌij ri Pablo kutzijoj chi xepe jujun winaq are xkaj xkichoqꞌ uwach ri ukꞌutuꞌn ri Pablo. Rumal riꞌ ri Pablo xutzꞌibꞌaj jun wuj tzalibꞌal wach rumal xchoqꞌ uwach ri uchak ri re taqoꞌn ri xubꞌano, rumal riꞌ xubꞌij chi ri kojobꞌal che ri Mesías are kabꞌanow che jun kux kachiꞌl ri kꞌakꞌ uwok ri Dios.
Ri Pablo man kumajij ta we wuj riꞌ rukꞌ yojonik chike ri e taqoꞌn pa Jerusalén, xane are kubꞌij chi ri utz laj tzij man rukꞌ ta winaq petinaq wi, xane are xukꞌamawaꞌj rumal ri xkꞌut choch rumal ri Jesús ri Cristo.
Ri Pablo xuchap ukꞌuꞌx chutzijoxik ri kolotajem xuqujeꞌ xrilo chi ri nikꞌaj e taqoꞌn chik xkimajij tobꞌanem rukꞌ.
Ri Pablo katzalij kanoq pa ri nabꞌe chomabꞌal ri kubꞌij chi ri winaq ri man aꞌj Israel taj ri xuꞌx e tereneꞌl taq re ri Jesús man rajawaxik taj kakikoj ketal che ri kityoꞌjal. Ri kꞌakꞌ wok winaq ri xtzuj loq che ri Abraham ojer rukꞌ ri kojobꞌal kabꞌanik man rukꞌ ta ri utaqanik ri Moisés.
Ronojel ri kutzijoj ri Tyoxalaj wuj rukꞌaꞌm ribꞌ ronojel. We man are ri nimanem che ri utaqanik ri Moisés ri ujeqelibꞌal ri utz laj tzij, ¿la sukꞌ kꞌu riꞌ?
Ri Pablo kutzijoj chike ri e tereneꞌl taq re ri Jesús jachin rukꞌ kajunumataj wi ri Uxlabꞌixel ri kuya kꞌaslemal. Ri Pablo kukꞌis utzaꞌm ri wuj rukꞌ chuqꞌabꞌ kutzalij ubꞌixik junmul chik kubꞌij chi man are ta ri kojoj etal o ri man kakoj taj nim ubꞌanik xane are nim ubꞌanik ri kꞌakꞌ tikoꞌn.
1
1 Ri Pablo, taqoꞌn man kech ta winaq xuqujeꞌ man winaq taj taqowinaq, xane rumal are ri Jesucristo xuqujeꞌ rech ri Dios Tataxel ri xkꞌastajisan ri Jesucristo chikixoꞌl ri kaminaqibꞌ.
2 Konojel ri alaxik ri e kꞌo wukꞌ, kakitaq rutzil kiwach ri e komontyox ri e kꞌo pa ri tinimit Galacia:
3 Are ri qatat Dios xuqujeꞌ ri Ajawxel Jesucristo cheyoꞌw jaꞌmaril xuqujeꞌ toqꞌobꞌ chiꞌwe.
4 Ri Jesucristo xujach ribꞌ xa rumal ri qamak rech jeriꞌ xujresaj chuxeꞌ raqan uqꞌabꞌ ri uwachulew rech we qꞌij junabꞌ, are waꞌ ri rayibꞌal ukꞌuꞌx ri qatat Dios.
5 Che Areꞌ yaꞌtal wi kaya ri juluwem chibꞌe qꞌij saq. Jeriꞌ.
Xa jun ri utz laj tzij ri kꞌolik
6 Sibꞌalaj kinmayijanik rumal chi aninaq xitzaq kanoq ri xixsikꞌin apanoq pa ri utoqꞌobꞌ ri Cristo rech xitereneꞌj chik ri jer kabꞌantaj jun utz laj tzij chik.
7 Man kel ta kubꞌij chi kꞌo chi jun utz laj tzij, xane xa e kꞌo chi nikꞌaj winaq ri kakaj kix kisubꞌu rech jeriꞌ kakikꞌex ubꞌixik ri utz laj utzij ri Cristo.
8 We kꞌu ne kꞌo jun chaqe uj, o jun ángel rech chikaj kutzijoj chi jun utz laj tzij chiꞌwe ri man are ta ri qatzijom uj chiꞌwe, chetzelataj uwach.
9 Jetaq ri qabꞌim chik chiꞌwe: We kꞌo ne jun kutzijoj jun utz laj tzij chik chiꞌwe ri man are ta xqatzijoj chiꞌwe, qaj kꞌax puꞌwiꞌ.
10 ¿Jas kꞌu kawaj rukꞌ we riꞌ? ¿La are kꞌu kawaj kinqaj chikiwach ri winaq, o rech kinqaj cho ri Dios? ¿Teꞌq piꞌkꞌuꞌx ix are kawaj kinqaj chikiwach nikꞌaj chik? We kinqaj chikiwach ri winaq, man in rajchak ta bꞌa ri Cristo riꞌ.
Are ri Dios xsikꞌin apanoq ri Pablo
11 Wachalal, kawaj kiwetaꞌmaj chi ri utz laj tzij ri kintzijoj in, man winaq taj tikowinaq loq.
12 Man rukꞌ ta winaq xinwetaꞌmaj wi xuqujeꞌ man che ta winaq xinkꞌamawaꞌj wi, xane tzi are ri Jesucristo xkꞌutuw chinuwach.
13 Jeriꞌ rumal iwetaꞌm jas jeꞌ kinnoꞌjin kanoq nabꞌe are in kꞌo chikixoꞌl ri winaq aꞌj Israel, are xwaj xinbꞌan kꞌax che ri ukomontyox ri Dios, rech kakꞌis puꞌwiꞌ.
14 Are xinkꞌojiꞌ kukꞌ ri winaq aꞌj Israel in kꞌo na chikiwach ri e wachiꞌl pa ri nukojobꞌal, qas nim xinbꞌan chi rilik ri kinaqꞌatajibꞌal ri nutat nunan.
15 Pune jeriꞌ, ri Dios xinuchaꞌo are in kꞌo chupam ri nunan, xinusikꞌij apanoq pa ri utoqꞌobꞌ.
16 Xuqꞌalajisaj ri Ukꞌojol chinuwach rech jeriꞌ kintzijoj chike ri winaq ri man aꞌj Israel taj, man nabꞌe taj xinta che jachinaq.
17 Man xinpaqiꞌ ta xuqujeꞌ pa Jerusalén chutayik chike ri e nabꞌe taq taqoꞌn chinuwach, xane xintzalij pa Arabia, kꞌa te riꞌ xineꞌ chik pa Damasco.
18 Are xikꞌow oxibꞌ junabꞌ, kꞌa te riꞌ xinpaqiꞌ pa Jerusalén xeꞌnsolij ri Pedro, xinkanaj kan rukꞌ oꞌlajuj qꞌij.
19 Man xinwil ta chi jun chike ri e taqoꞌn chilaꞌ xaq xwi ri Jacobo ri rachalal ri Ajawxel Jesús.
20 Qas karil ri Dios chi man bꞌanoj tzij ta ri tajin kinbꞌij chiꞌwe.
21 Kꞌa te riꞌ xineꞌ pa taq ri tinimit rech Siria xuqujeꞌ Cilicia.
22 Ri e komontyox kꞌut ri e kꞌo pa Cristo je laꞌ pa Judea man ketaꞌm ta nuwach che riꞌ.
23 Xwi kitom ri kakibꞌij ri winaq: Ri achi ri xubꞌan kan kꞌax chaqe nabꞌe, kutzijoj chi ri kojobꞌal ri xraj xuchup uwach.
24 Kakiya kꞌu uqꞌij ri Dios rumal we.