RI UKABꞌ WUJ RI XUTZꞌIBꞌAJ RI PABLO CHIKE RI KOJONELABꞌ AꞌJ TESALÓNICA
Majibꞌal re
Are xtzꞌibꞌataj ri nabꞌe wuj chike ri Tesalonicenses, ri Pablo xutzꞌibꞌaj chi jun wuj chike chusukꞌumaxik ri kikꞌutuꞌn ri esal taq kiwach ri e qꞌalajisal taj tzij rumal riꞌ xubꞌij chike chi ri uqꞌijal ri Dios kꞌulmatajinaq chik. Ri uqꞌijal ri Dios are jun tzij ri xkikoj ri e qꞌalajisal taq utzij ri Dios aꞌj Israel, jewaꞌ xkibꞌij rumal che ri xkiqꞌalajisaj ri uchꞌekenem ri Dios puꞌwiꞌ ri itzel xuqujeꞌ ri tojbꞌal ke ri e ralkꞌwaꞌl.
Ri winaq aꞌj Tesalónica xkꞌaxir kikꞌuꞌx rumal chi pa kikꞌuꞌx chi xikꞌow ri upetibꞌal ri Cristo xuqujeꞌ chi aꞌreꞌ man xebꞌe ta rukꞌ, man ikꞌowinaq ta kꞌut. Rumal kꞌu che ri xkichapleꞌj uriqik kꞌax xaq are chi katzijox rij.
Ri Pablo pune kꞌamajaꞌ kutzalij uwach ri kikꞌutuꞌn ri esal taq kiwach qꞌalajisal taq tzij, xubꞌij chike chi ri Dios kutoj na ri kꞌaxal ri xbꞌan chike ri kojonelabꞌ kumal ri man e kojonelabꞌ taj. Xuqujeꞌ ri Pablo kunaꞌtaj ronojel ri jastaq ri utzijom chike pa kiwinaqil xuqujeꞌ kunaꞌtaj chi ri upetibꞌal ri Ajawxel xnaqajir loq. Xuqujeꞌ kutzalij ubꞌixik chike ri ucholajil ri xubꞌij chike pa ri nabꞌe wuj jawjeꞌ kubꞌij wi chike chi choqꞌaqꞌ kechakunik kakichꞌek ri kakitijo, man xaq ta kesaqꞌorinik.
Pa ri kꞌisbꞌal re ri wuj, ri xtzꞌibꞌax rumal jun ajtzꞌibꞌ, ri Pablo rukꞌ ri utzꞌibꞌ kutaq jun rutzil kiwach ri winaq aꞌj Tesalónica, rech jeriꞌ kakilo chi qas areꞌ xyoꞌw bꞌik ri kꞌutuꞌn.
1
1 Ri Pablo, ri Silvano xuqujeꞌ ri Timoteo chike ri e kojonelabꞌ ri e kꞌo pa ri komontyox ke ri aꞌj Tesalónica, chiꞌwe ix ri ix rech ri Dios xuqujeꞌ ri Tataxel rachiꞌl ri Ajawxel Jesucristo:
2 Are ri Tataxel Dios xuqujeꞌ ri Ajawxel Jesucristo cheyoꞌw toqꞌobꞌ xuqujeꞌ jaꞌmaril chiꞌwe.
Tyoxinik che ri Dios xuqujeꞌ bꞌanoj chꞌawem
3 Qachalal, sibꞌalaj choqꞌaqꞌ wi kujtyoxin che ri Dios rumal iwe, jetaq ri qas usukꞌ kabꞌanik, jeriꞌ rumal ri ikojobꞌal sibꞌalaj amaqꞌel tajin kakꞌiyik xuqujeꞌ tajin kanimar pa iwanimaꞌ ri loqꞌanik chike nikꞌaj chik.
4 Rumal kꞌu riꞌ kaqanaꞌ nimal are kaqatzijoj iwij pa taq ri nikꞌaj ukomontyox ri Dios chik. Jeriꞌ rumal pune tajin kixikꞌow pa taq sibꞌalaj kꞌi kꞌax xuqujeꞌ jaljoj taq kꞌaxkꞌolal, xaq jeꞌ ko ix kꞌolik, jeqel ikꞌuꞌx chirij ri Dios.
5 Ronojel waꞌ kukꞌutu chi sukꞌ ronojel ri uqꞌatoj tzij ri Dios, rumal kꞌu riꞌ ri Dios kubꞌan chiꞌwe chi taqalik kixkꞌojiꞌk pa ri rajawarem, ri rumal rech tajin kiriq kꞌax kamik.
6 Ri Dios sibꞌalaj sukꞌ kuqꞌat na tzij pa kiwiꞌ ri kakibꞌan kꞌax chiꞌwe ix.
7 Ri ix kꞌut ri kiriq kꞌax, kuya na uxlanem chiꞌwe, xuqujeꞌ kuya na uxlanem chaqe uj. We jastaq riꞌ kakꞌulmataj na are kukꞌut ribꞌ ri Ajawxel Jesús cho ri kaj, rukꞌ qꞌaqꞌ ri kajininik, e rachiꞌl ri rangelibꞌ ri kꞌo kikwinem,
8 kuluqꞌata tzij pa kiwiꞌ ri man kakinimaj ta ri utz laj tzij rech ri Ajawxel Jesús.
9 Ri winaq ri man kekojon ta che ri utz laj tzij kakiriq na jun alik kꞌaxkꞌolal, keꞌsax na bꞌik cho ri ukaꞌyebꞌal ri Ajawxel, kekꞌam na bꞌik naj jawjeꞌ ri man kekwin taj kakil wi ri ujuluwem xuqujeꞌ ri ukwinem ri Dios.
10 Jeriꞌ kakꞌulmataj na pa ri qꞌij are kape ri Ajawxel Jesucristo rech jeriꞌ konojel ri utinimit ri uchaꞌom apanoq nim karilo xuqujeꞌ kuqꞌijilaꞌj. Ri ix kꞌut ix kachiꞌl we tinimit riꞌ rumal xixkojonik che ri qꞌalajisanik ri xqabꞌij chiꞌwe.
11 Rumal riꞌ amaqꞌel kaqabꞌan chꞌawem pa iwiꞌ rech jeriꞌ ri Dios kubꞌano chi kataqiꞌk ri sikꞌinik ri xuya apanoq chiꞌwe xuqujeꞌ pa ri ukwinem chubꞌana pa iwanimaꞌ ronojel ri rayibꞌal ukꞌuꞌx rech utzilal xuqujeꞌ chutzꞌaqatisaj ronojel chak ri kabꞌan rukꞌ kojobꞌal.
12 Rumal riꞌ kaqabꞌan chꞌawem pa iwiꞌ rech kaqꞌijilaꞌtaj na ri ubꞌiꞌ ri Ajawxel Jesús xa rumal iwe xuqujeꞌ kanimarisataj na iqꞌij ix rumal are, rumal ri utoqꞌobꞌ ri Dios xuqujeꞌ ri Ajawxel Jesucristo.